كۇشتىلەردىڭ قاتارى سەتىنەگەن جوق

پاۆلوداردا ءوتىپ جاتقان بوكس­تان قازاقستان چەمپيوناتىندا سوڭعى ەكى كۇننىڭ ىشىندە جارتىلاي فينالعا شىققاندار تولىق بەلگىلى بولدى. ەلىمىزدىڭ نامىسىن وليمپيالىق ويىنداردا, الەم جانە ازيا چەمپيوناتتارىندا قورعاپ جۇرگەن تاڭداۋلى بىلعارى قولعاپ شەبەرلەرى ساپتارىن بۇزباي, «مەدالدار اۋلاسىنا» قاراي قادام باستى. كەشەگى جارتىلاي فينالدىق ايقاستاردا ءوزىن جاقسى قىرىنان تانىتقانداردىڭ ءبىرى ريو وليم­پياداسىنا قاتىسۋشى, الەمنىڭ 2013 جىلعى قولا جۇلدەگەرى, شىمكەنتتىك  قايرات ەراليەۆ (56 كگ) بولدى. قارقىنى قاتتى سپورتشى شيرەك فينالدا 18 جاستاعى الاڭ يەسى ابىلاي سايلاۋبەكوۆتى تالاسسىز جەڭدى. ال كەلەسى كە­زەڭدە ول ازيا ويىندارىنىڭ چەمپيونى, جاقىندا وسى سال­ماققا اۋىسىپ كەلگەن ءىلياس سۇلەيمەنوۆپەن فينالعا شىعۋ جولىندا شاي­قاسادى. ءوزىنىڭ جاڭا سالماقتاعى ءبىرىنشى دوداسىن پاۆلودار رينگىندە وتكىزگەن استانالىق بوكسشى بۇل جولى اسىلحان ۇزاقباەۆپەن جەكپە-جەگىن مەر­زىمىنەن بۇرىن اياقتادى. سەبەبى, ءىلياستىڭ قارشا بوراعان سوققىسىنان شاكىرتىن ساقتاپ قال­عىسى كەلگەن اتىراۋلىق جات­تىق­تىرۋشى ەكىنشى راۋندتا ۇرىس­تى جالعاستىرۋدان باس تارتتى. بۇدان ءارى 64 كيلوعا دەيىنگى سپورتشىلار شارشى الاڭعا شىق­تى. ونى كوكشە­تاۋلىق سابىر­جان بەكبەر­گەنوۆتى تىزە بۇكتىرگەن الماتىلىق ءدىلمۇرات مەجي­توۆ جەڭىسپەن باستاپ بەردى. ال پاۆ­لودارلىق 20 جاسار قۋان قۋاتوۆ قوستانايلىق نيكولاي شۆابتى تارتىستى تالاس ۇستىندە ادەمى ۇتتى. 75 كيلوعا دەيىنگى سالماقتا دا تارتىستى شايقاستار از بولعان جوق. سول قولعاپ تۇيىستىرۋلەردە ەرىك ءالجانوۆ, مانات ومىرزاقوۆ, تۇرسىنباي قۇلاحمەتوۆ جانە ءابىل­حان امانقۇل مەدالدار ساراپقا سالىناتىن شەڭبەردەن تابىلدى. 91 كگ سالماقتا ازيا مەن ازيا ويىندارىنىڭ چەمپيونى انتون پينچۋك ەكى جىلدىق ۇزىلىستەن سوڭ رينگكە قايتا ورالعان قاراعاندىلىق المات سەرىموۆتىڭ وسال تۇسىن تاپتى. سونداي-اق, بۇل سالماقتا اربەك ابدۋعانيەۆ, ەركىن مۇحامەتجان جانە سەرىك ءمۇسادىلوۆ جارىستى جالعاستىرۋعا مۇمكىندىك الدى. بۇگىن – چەمپيوناتتىڭ دەم-ال­ى­س كۇنى. ەرتەڭ جارتىلاي في­نالدىق جەكپە-جەكتەر وتەدى. ال 27 قاراشادا چەمپيونات مارەگە جەتەدى. فارحات امىرەنوۆ پاۆلودار سۋرەتتى تۇسىرگەن دانيار مايلىباەۆ