رەسەيدە ءاليحان بوكەيحانعا ءمۇسىن ورناتىلدى

سانكت-پەتەربوردا الاشوردا كوسەمى, رەسەيدىڭ تۇڭعىش مەملەكەتتىك دۋماسىنىڭ دەپۋتاتى (1906 ج.) ءاليحان بوكەيحاننىڭ ەسكەرتكىش-ءبيۋستىن تمد-عا قاتىسۋشى مەملەكەتتەردىڭ پارلامەنتارالىق اسسامبلەياسىنا تارتۋ ەتۋ سالتاناتى بولدى. بۇل تۋرالى سەناتتىڭ ءباسپاسوز قىزمەتى حابارلادى. بيۋست رەسەيدىڭ العاشقى دۋماسىنىڭ وتىرىسى وتكەن تاۆريا سارايىنداعى تمد پارلامەنتارالىق اسسامبلەياسىنىڭ شتاب-پاتەرىنە قويىلدى. ءمۇسىندى جاساعان – ومىرزاق شاڭوۆ. سالتاناتتى اشا كەلىپ, سەنات توراعاسى قاسىم-جومارت توقاەۆ «قازاقستان تاۋەلسىزدىگىنىڭ 25   جىلدىعى مەن حح عاسىردىڭ باسىنداعى كورنەكتى قازاق زيالىسىنىڭ تۋعانىنا 150 جىل تولعانى اتالىپ وتەتىن جىلى ءبيۋستىنىڭ سانكت-پەتەربورداعى تاۆريا سارايىنا ورناتىلۋى ەرەكشە ماعىناسى بار ەكەنىن اتاپ ءوتتى. توراعا وسى مەرەيتويعا بايلانىستى ەستەلىك شارالار يۋنەسكو اياسىندا ءوتىپ وتىرعانىن ەسكە سالدى. «ءاليحان بوكەيحاننىڭ قىزمەتى بيىك ادامگەرشىلىكتىڭ, ۇلتتىق جانە ازاماتتىق پارىزىنا كىرشىكسىز ادالدىق پەن شىنايى بەرىلۋدىڭ ۇلگىسى بولىپ تابىلادى», – دەپ اتاپ ءوتتى قاسىم-جومارت توقاەۆ. سالتانات بارىسىندا قازاقستان پارلامەنتى ءماجىلىسىنىڭ توراعاسى نۇرلان نىعماتۋلين, تمد پاا كەڭەسىنىڭ توراعاسى, رەسەي فەدەراتسيا كەڭەسىنىڭ توراعاسى ۆالەنتينا ماتۆيەنكو, رەسەي مەملەكەتتىك دۋماسىنىڭ توراعاسى ۆياچەسلاۆ ۆولودين, ازەربايجان ميللي مەدجليسىنىڭ توراعاسى وكتاي اسادوۆ ءسوز سويلەدى. «بۇگىنگى تاڭدا قازاقستان مەن رەسەي ەكى ەلدىڭ باسشىلارى نۇرسۇلتان نازارباەۆ پەن ۆلاديمير ءپۋتيننىڭ ساليقالى ساياساتىنىڭ ارقاسىندا ەۋرازيا كەڭىستىگىندەگى ينتەگراتسيانىڭ قوزعاۋشى كۇشىنە اينالىپ وتىر. وسى ورايدا, ءبيۋستتىڭ تانىستىرىلۋ سالتاناتى قازاقستان تاۋەلسىزدىگىنىڭ 25 جىلدىعىنا وراي ءوتۋىنىڭ سيمۆوليكالىق ءمانى بار. وتكەن جىلدار ىشىندەگى بىزدەردىڭ مەملەكەتتەرىمىزدىڭ قارىم-قاتىناسى ىلگەرىلەمەلى دامۋدى ايشىقتاپ, تمد كەڭىستىگىندە ستراتەگيالىق جانە وداقتاستىق سەرىكتەستىكتىڭ جارقىن ۇلگىسى بولا ءبىلدى», - دەدى نىعماتۋلين. سالتاناتتى شارانى اياقتاي كەلىپ ق. توقاەۆ, ءا.بوكەيحاننىڭ ءبيۋستى رەسەي, قازاقستان جانە دوستاستىق ەلدەرىنىڭ اراسىنداعى تاريحي بايلانىستار ۋاقىتى مەن دوستىق قارىم-قاتىناستاردىڭ بەلگىسىنە اينالاتىنىنا نىق سەنىم ءبىلدىردى.