ازەربايجاندا تۇركى ەلدەرى تاۋەلسىزدىگىنە ارنالعان جيىن ءوتتى

بۇگىن تۇركىتىلدەس ەلدەردىڭ پارلامەنتتىك اسسامبلەياسى (تۇركپا) ازەربايجان رەسپۋبليكاسى ميللي ءماجليسى جانە تۇركى مادەنيەتى مەن ميراسى قورىمەن بىرلەسە وتىرىپ, باكۋدە بىرقاتار تۇركىتىلدەس ەلدەر تاۋەلسىزدىكتەرىنىڭ 25-جىلدىق مەرەيتويىنا ارنالعان كونفەرەنتسيا وتكىزدى, دەپ حابارلادى «قازاقپارات». ءىس-شاراعا قازاقستان, قىرعىزستان, ازەربايجان مەن تۇركيانىڭ زاڭ شىعارۋشى ورگاندارىنىڭ وكىلدەرىمەن, اتالعان ەلدەردىڭ, باكۋدەگى ديپلوماتيالىق وكىلدىكتەرىنىڭ باسشىلارى قاتىستى «بۇل تاريحي كۇن, بىلتىر عانا تويلاپ وتكەن قازاق ەلى مەملەكەتتىلىگىنىڭ 550 جىلدىعىنىڭ قورىتىندى جەتىستىگى. ءۇش عاسىرعا جۋىق وتارشىلدىقتى باسىنان كەشكەن قازاق ەلى, حح عاسىردىڭ اياعىندا قايتا جاڭعىرعان مەملەكەت. تاۋەلسىزدىكتىڭ 25 جىلدىق  مەرەيتويى جاڭا تاريحىمىزدا زاماناۋي مەملەكەت قۇرعان ەلىمىزدىڭ اۋقىمدى تاريحي جەتىستىكتەرىنىڭ جارقىن كورىنىسى. قازاقستان ءۇشىن تاۋەلسىزدىكتىڭ 25 جىلى - ىلگەرىلەۋ مەن قارقىندى دامۋدىڭ كەزەڭى بولدى. ءبىز جاڭا تاريحىمىزدا تابىستى جانە ورتالىق ازيا وڭىرىندە كوشباسشىسى مەملەكەت ەكەندىگىمىزدى دالەلدەدىك. ءوز تاۋەلسىزدىگىنىڭ 25 جىلىندا ەلىمىزدىڭ ەكونوميكاسى بەلسەندى دامىعان, تابىسقا جەتۋدىڭ بىرىڭعاي, بىرەگەي تاجىريبەسى بار ساياسي-الەۋمەتتىك تۇراقتى مەملەكەت رەتىندە قالىپتاستى», ­– دەدى قر ازەربايجانداعى توتەنشە جانە وكىلەتتى ەلشىسى بەيبىت يساباەۆ. سونداي-اق ەلشى, ءوز سوزىندە تاۋەلسىز قازاقستاننىڭ بارلىق جەتىستىكتەرى مەن جەڭىستەرى ءاربىر قازاقستاندىقتىڭ تاباندى دا تىنىمسىز ەڭبەگىنىڭ ارقاسىندا مۇمكىن بولعاندىعىنا باسا توقتالدى. «ەڭ باستىسى مەملەكەت باسشىسى ناقتىلاعان «قازاقستان 2030» ستراتەگياسىنىڭ ماقساتتارى مەن مىندەتتەرى ويداعىداي جۇزەگە اسىرىلدى. ەلباسىمىزدىڭ ساياسي ەرىك-جىگەرى جانە ستراتەگيالىق كورەگەندىگى دامۋدىڭ قازاقستاندىق ۇلگىسىنىڭ تابىستى بولۋىن ايقىنداپ, قازاقستاننىڭ ورنىقتى ءوسىپ-وركەندەۋ جولىنا شىعۋىنا مۇمكىندىك تۋدىردى. قازىر ەلىمىز «قازاقستان 2050» ستراتەگياسىن دايەكتى تۇردە جۇزەگە اسىرا وتىرىپ, الەمنىڭ وزىق 30 ەلىنىڭ قاتارىنا قوسىلۋعا قارىشتى قادام باستى. ەلباسى ن.نازارباەۆتىڭ بايىپتى حالىقارالىق  باستامالارىمەن ەلىمىز ۇلكەن حالىقارالىق بەدەلگە يە بولىپ, عالامدىق يادرولىق قارۋسىزدانۋ قوزعالىسىنىڭ تانىمال كوشباسشىسىنا اينالدى. ءوزىنىڭ جاڭا تاريحىندا بىرنەشە رەت وتكەرگەن عالامدىق ەكونوميكالىق داعدارىستار كەزەڭىندە دەر كەزىندە جۇزەگە اسىرىلعان ساياسي ەكونوميكالىق رەفورمالاردىڭ ارقاسىندا ەلىمىز ەكونوميكاسىن تۇزەپ, تىعىرىقتان شىعا ءبىلدى. سارابدال سىرتقى ساياسي باعىتتى قالىپتاستىرىپ, ەكونوميكاسى نىعايا وتىرىپ, ءوزىن بۇكىل الەمگە سەنىمدى, ءارى تۇراقتى سەرىكتەس رەتىندە تانىتتى», ­– دەپ اتاپ ءوتتى. سونىمەن قاتار, قازاقستاننىڭ ەۋروپاداعى قاۋىپسىزدىك جانە ىنتىماقتاستىق ۇيىمىندا, شانحاي ىنتىماقتاستىق ۇيىمىندا, يسلام ىنتىماقتاستىعى ۇيىمىندا توراعالىق ەتۋى قازاق ەلىنىڭ دۇنيە ءجۇزى قاۋىمداستىعى الدىنداعى بەدەلىن بيىكتەتە تۇسكەنىن ايتتى. ءىس-شارانىڭ اشىلۋىندا سويلەگەن ازەربايجان رەسپۋبليكاسى ميللي ءماجليس توراعاسىنىڭ ءبىرىنشى ورىنباسارى ءزيافات اسكاروۆ تۇركىتىلدەس ەلدەردەن كەلگەن دەپۋتاتتارعا, وسى ەلدەردىڭ باكۋدە ورنالاسقان ەلشىلەرىنە جانە دە حالىقارالىق ۇيىمداردىڭ وكىلدەرىنە جىلى لەبىزىن ءبىلدىردى.