شىعارمانىڭ تانىستىرىلىمى بۇگىن, 24 قاراشادا اتىراۋ قالاسىندا وتكەن 2006-2016 جىلدارعا ارنالعان گەندىرلىك ستراتەگيا تۋراسىنداعى كونفەرەنتسيا بارىسىندا بولدى. تۋىندىنىڭ اۆتورى, قوعام قايراتكەرى راشيليا مۇرساليەۆانىڭ ايتۋىنشا, كىتاپتا پاراسات-پايىمىمەن, ەرلىگىمەن, ونەرىمەن ەستە قالعان انا-اپالارىمىزدىڭ ءومىرى جايلى سىر شەرتىلەدى. «كىتاپتا قوعامنىڭ ءار سالاسىندا سالماقتى ۇلەس قوسقان ايەلدەر قاۋىمى تۋرالى ايتىلادى. ايماقتا ەڭبەك ەتكەن مۇنايشىلار, بالىقشىلار, ونەر, قوعام قايراتكەرلەرى تۋرالى اقپارات فوتوسۋرەتتەرىمەن بەرىلگەن. البەتتە, ءبىر كىتاپتىڭ ىشىنە ەڭبەگى ەرەن انالارىمىزدىڭ ءبارىن سىيعىزا المادىق», – دەدى اۆتور.
اتىراۋ وبلىسىنىڭ اكىمى نۇرلان نوعاەۆ كىتاپتىڭ تۇساۋىن كەسىپ تۇرىپ, ەل تاريحىنداعى انالارىمىزدىڭ ءرولىن ءسوز ەتتى: «حالقىمىزدىڭ باسىنان قيلى زاماندار ءوتتى. قيىن-قىستاۋ كەزەڭدەردە ارداقتى انالارىمىز تەك وتباسىنىڭ بەرەكەسىن كەلتىرۋمەن اينالىسقان جوق. ەلگە ءجون سىلتەپ, ەرلەرمەن بىرگە ەلىن-جەرىن قورعاۋعا شىققان قايراتكەرلەر كوپ بولدى. كەشەگى فاتيما, بوپاي انالارىمىز, بەرتىندەگى حيۋازداي باتىرلارىمىز حالىق ءۇشىن جان اياماي تەر توكتى. ەلىمىز ەگەمەندىك العان تۇستا دا ايەلدەردىڭ ءرولى ەش كەمىگەن جوق. بۇل كىتاپ سول ارداقتى انالارىمىزعا ارنالعان. وسكەلەڭ ۇرپاق بۇل تۋىندىنى وقىپ-تانىسىپ, انالارىنىڭ ەرلىگىنەن ۇلگى الۋى كەرەك. كىتاپتىڭ مۇنىمەن توقتاپ قالماي, كەلەسى تومدارىنىڭ دا جازىلىپ, جارىق كورۋىن تىلەيمىن», – دەدى نۇرلان نوعاەۆ. ايماق باسشىسىنىڭ ايتۋىنشا, باسپاعا 15 جىل دايىندالعان كىتاپتىڭ يدەياسى قر پرەمەر-ءمينيسترىنىڭ ورىنباسارى يمانعالي تاسماعامبەتوۆكە تيەسىلى. تۋىندىعا باس رەداكتورلىق ەتكەن – ءتىلشى-عالىم عاريفوللا انەس, ال رەداكتسيا القاسىندا جۇمىس ىستەگەندەر – فاريزا وڭعارسىنوۆا, ايگۇل اجىعاليەۆا, قويشىعۇل جىلقىشيەۆ, سارسەنباي ەڭسەگەنوۆ, باقىت يمانعاليەۆ جانە ءابىلحان تولەۋىشەۆتەر.
