ەلباسى ىشكى ءتۋريزمدى دامىتۋدى تاپسىردى

پرەمەر-مينيستر ب.ساعىنتاەۆ, پرەزيدەنت اكىمشىلىگىنىڭ باسشىسى ءا.جاقسىبەكوۆ, ۇلتتىق بانك توراعاسى د.اقىشەۆ, ۇكىمەت مۇشەلەرى مەن مەملەكەتتىك ورگاندار باسشىلارى قاتىسقان جاڭعىرتۋ جونىندەگى ۇلتتىق كوميسسيا جۇمىسىنىڭ ماسەلەلەرى جونىندەگى كەڭەستە ەلباسى تۋريستىك سالانى دامىتۋدىڭ 2020 جىلعا دەيىنگى تۇجىرىمداماسىن ىشكى ءتۋريزمنىڭ باسىمدىعى بار باعىتتارىن ەسكەرە وتىرىپ جاڭارتۋدى تاپسىردى. – وڭىرلىك ءتۋريزمدى ىلگەرىلەتۋ ءۇشىن بارلىق كۇش-جىگەردى جۇمىلدىرۋ قاجەت. بۇل ەكونوميكامىز ءۇشىن دە, قازاقستاندىق بىرتەكتىلىك پەن بىرلىكتى نىعايتۋ ءۇشىن دە ماڭىزدى, – دەدى مەملەكەت باسشىسى. بۇدان باسقا دا ماسەلەلەر قاراستىرىلعان جيىندا قازاقستان پرەزيدەنتى «ۇكىمەت – ازاماتتار ءۇشىن» باعدارلاماسى ارقىلى حالىققا كورسەتىلەتىن قىزمەتتەر ساپاسىن ارتتىرۋ جونىندەگى جۇمىستاردى دا ودان ءارى جەتىلدىرۋ قاجەتتىگىن اتاپ ءوتتى. سونىمەن قاتار كەڭەسكە قاتىسۋشىلارعا ۇلت جوسپارىنىڭ بارلىق باعىتى بويىنشا جۇمىستى ىلگەرىلەتىپ, باقىلاۋ جۇرگىزۋدى كۇشەيتۋ قاجەتتىگىن ايتتى, باسشىلاردىڭ دەربەس جاۋاپكەرشىلىگى جونىندە ەسكەرتتى.