رەسپۋبليكالىق بيۋدجەتتەن 140 ميلليون تەڭگە قارجى بولىنگەن بۇل قۇرىلىستى «گسۋ قۇرىلىس» سەرىكتەستىگى بيىلعى جىلدىڭ ناۋرىز ايىندا باستاپ, بەلگىلەنگەن مەرزىمدە اياقتادى. ەندى كورشىلەس بايقونىس, قىزىلتاڭ, تىلەۋباي اۋىلدارىنىڭ دا تۇرعىندارى وسى ەمحانادا ەمدەلە الادى. كۇنىنە 30-40 ادام قابىلدايدى. دارىگەرلىك مەكەمەدە بارلىق جاعداي جاسالعان, ماماندار دا جەتكىلىكتى. «بيىل وبلىستا 60-قا جۋىق وسىنداي بولىمشەلەر اشىلادى», دەدى پەسچانداعى دارىگەرلىك بولىمشەنىڭ اشىلۋىنا قاتىسقان وبلىس اكىمى باقىتجان ساعىنتاەۆ.
فاريدا بىقاي. پاۆلودار وبلىسى.
«100 كۇن – 100 يگى ءىس» اكتسياسى باستالدى. مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتتەرى تاۋەلسىزدىگىمىزدىڭ 20 جىلدىعىنا بايلانىستى «100 كۇن – 100 يگى ءىس» دەپ اتالعان شارانى باستادى. ونىڭ بارىسىندا ەل تاۋەلسىزدىگىنىڭ مەرەيتويىن اتاپ وتەتىن كۇنگە دەيىن ءتۇرلى تانىمدىق شارالار وتكىزىلەتىن بولادى. ۋنيۆەرسيتەتتىڭ نەگىزگى عيماراتىنا كىرە بەرىستە تاۋەلسىزدىك مەرەيتويىن اتاپ وتەتىن كۇندى كەرى قاراي سانايتىن كۇنتىزبە ورنالاستىرىلدى. ۋنيۆەرسيتەتتىڭ ءار ستۋدەنتى 100 كۇندى ءوزى ءۇشىن دە, وتانى ءۇشىن دە پايدالى وتكىزۋگە مىندەتتەمە الدى. بەلسەندى ستۋدەنتتەر باس بولىپ, جوعارى وقۋ ورنىنىڭ باسشىلىعىمەن كەلىسىپ, ءار كۇنى وتكىزىلەتىن شارالاردىڭ كەستەسىن جاسادى.
باقتيار تايجان. شىمكەنت.
الىس اۋىلعا اۋىز سۋ جەتكىزىلدى. رەسپۋبليكالىق قازىنادان بولىنگەن 0,5 ميلليارد تەڭگەگە اقجار اۋدانىنداعى بوستاندىق اۋىلىنا 52 شاقىرىمدىق سۋ قۇبىرى جەلىسى تارتىلىپ, سۋ مۇناراسى قوسا پايدالانۋعا بەرىلدى. ونىڭ اشىلۋ سالتاناتىنا قاتىسقان اۋدان اكىمى اعزام تاستەمىروۆ «تازا سۋ» مەملەكەتتىك باعدارلاماسى شەڭبەرىندە قىرۋار جۇمىس اتقارىلىپ, 14 مەكەنگە ساپالى اۋىز سۋ جەتكىزىلگەنىن اتاپ ءوتتى. الداعى ۋاقىتتا دا بۇل باعىتتاعى شارالار جالعاساتىن بولادى. باس مەردىگەر «پەتروپاۆلسپەيكوممۋنستروي» جشس-ءنىڭ باسشىسى ۆ.كالمىكوۆ بىرەر ايدىڭ ىشىندە كيەۆ اۋىلى تازا سۋمەن قامتىلاتىنىن مالىمدەدى. ءسويتىپ, اۋدان تۇرعىندارىنىڭ 90 پايىزدايى ساپالى تىرشىلىك نارىمەن سۋسىنداپ وتىر.
ءومىر ەسقالي. سولتۇستىك قازاقستان وبلىسى.
«سەن ماعان قىمباتسىڭ, قازاقستان!». ەل تاۋەلسىزدىگىنىڭ 20 جىلدىق مەرەكەسىنە ارنالعان شارانىڭ ءبىرى رەتىندە اتىراۋداعى ش. ساريەۆ اتىنداعى ونەر مۇراجايىندا جەرگىلىكتى سۋرەتشىلەردىڭ كورمەسى اشىلدى. ءۇش كۇن بويى اتىراۋلىقتاردىڭ قىزىعۋشىلىعىن وياتقان كورمەدە سۋرەتشىلەر سۆەتلانا گۋزەۆا مەن نادەجدا ەكسۋزياننىڭ شىعارماشىلىق شەبەرحاناسىنان ءار ءتۇرلى تاقىرىپتاردى قامتىعان 90 سۋرەت قويىلدى. سۋرەتتەردىڭ بارلىعى دا مايلى بوياۋمەن سالىنىپتى. – ءبىز ءوز شىعارماشىلىعىمىزدا قازاقستاننىڭ ادەمى تابيعاتىن, ىنتىماعى جاراسقان ادامدارىنىڭ دوستىق ءراۋىشىن كورسەتۋدى ماقسات تۇتتىق. سەبەبى, ءوزىمىز مەكەن ەتكەن ەلدەگى بىرلىك پەن دوستىق بارىنەن قىمبات. ءتىپتى, تاسى مەن تاۋى دا, وزەن-كولدەرى دە, ادامدارى دا ءبىز ءۇشىن قىمبات ەكەنىن سەزىنە تۇستىك, – دەيدى سۋرەتشى نادەجدا ەكسۋزيان.
جولداسبەك شوپەعۇل. اتىراۋ وبلىسى.
جيىرما بەس اجە ...«جۇمىسسىز» قالدى. «جۇمىسسىز» ادامدار, ادەتتە, قاباعىن ءتۇيىپ, قوبالجىپ جۇرمەۋشى مە ەدى, سويتسەك, مۇنداي «باقىتقا» قۋاناتىندار دا بار ەكەن. مىسالى, جاقىندا, جۋالى اۋدانىنىڭ توعىزتاراۋ اۋىلىنداعى ءبىر توپ اجە وزدەرىن قىزمەتتەن «بوساتقان» جەرگىلىكتى بيلىككە راحمەت ايتىپ, ءماز-مەيرام بولدى دا قالدى. قۋانىشتىڭ سەبەبى, اۋىلدان 25 بۇلدىرشىنگە ارنالعان بالاباقشانىڭ اشىلۋىنا بايلانىستى ەكەن. ول مەملەكەتتىك «بالاپان» باعدارلاماسى شەڭبەرىندە دۇنيەگە كەلىپتى. ءسويتىپ, بالاباقشاداعى 18 قىزمەتكەر بالا باققان اجەلەردىڭ جۇمىسىن تولىعىمەن ءوز مويىندارىنا الىپتى. ءبىر بالاباقشانىڭ ارقاسىندا الىستاعى اۋىلداعى جيىرما شاقتى جاسقا جۇمىس تابىلىپ, ال جيىرمادان استام اجەنىڭ... «جۇمىسسىز» قالۋى, ارينە, جاقسىلىق.
كوسەمالى ساتتىباي ۇلى. جامبىل وبلىسى.
مەملەكەتتىك ءتىل ۇلتتى ۇيىتادى. تالدىقورعاننىڭ شىعىسىنداعى اسەم عيمارات – ءتىل سارايىندا مەرەيلى 20 جىلدىعىمىز قارساڭىندا ۇلتجاندىلىققا ۇيىتاتىن انا ءتىلىمىزدىڭ كەلەشەگى جايلى كەڭ كولەمدە «دوڭگەلەك ۇستەل» ءوتتى. وبلىستىق تىلدەردى دامىتۋ باسقارماسى ۇيىمداستىرعان شاراعا مەملەكەتتىك ءتىلدىڭ ەرتەڭىنە ۇلەس قوسىپ جۇرگەن بۇقارالىق اقپارات قۇرالدارىنىڭ وكىلدەرى مەن جالپى جۇرتشىلىق بەلسەنە قاتىستى. «دوڭگەلەك ۇستەلدە» اتا زاڭىمىزعا سايكەس بۇگىنگى كۇنى الەۋمەتتىك ساياسي ومىردە مەملەكەتتىك ءتىلدىڭ قولدانىس اياسى ارتا تۇسكەنى ايتىلدى. سونىمەن قاتار, ۇلتتىق رۋحىمىز نىعايىپ, كەمەلدەنۋ ۇستىندە. وسى ماسەلەلەر جايلى جۋرناليستەر اتساليم يديگوۆ, جۇماتاي وسپان ۇلى, ءماۋلىتحان اقسان, ايتاقىن بۇلعاقوۆ جانە باسقالار وي ءبولىسىپ, كەلەلى پىكىر ايتتى.
كۇمىسجان بايجان. الماتى وبلىسى.
ۇكىمەتتىك ەمەس ۇيىم – ۇلكەن كۇش. قاراعاندىدا ۇكىمەتتىك ەمەس ۇيىمداردىڭ ۇيىتقىسىمەن «قازاقستان تاۋەلسىزدىگىنىڭ 20 جىلدىعى – ازاماتتىق باستامالاردىڭ قۇرىلۋى مەن دامۋىنىڭ 20 جىلدىعى: ورلەۋ قەزەڭدەرى, تابىستى تاجىريبەسى مەن بولاشاعى» اتتى كونفەرەنتسيا ءوتتى. وندا «الەۋمەتتىك سۇيەمەلدەۋ جانە بەيىمدەلۋ», «وتباسى مەن نەكە ماسەلەلەرى, «قازاقستانداعى ۆولونتەرلىك قوزعالىستىڭ تاجىريبەسى» سەكتسيالارى بويىنشا وسى باعىتتاعى ءىس-شارالار, ىزدەنىستەر تالداندى. «ەڭ تاڭداۋلى ۇەۇ», «ۇزدىك الەۋمەتتىك جوبا» نوميناتسيالارىنىڭ جەڭىمپازدارى انىقتالىپ, ديپلومدار مەن باعالى سىيلىقتار تابىس ەتىلدى. قازاقستاننىڭ V ازاماتتىق فورۋمىنا دەلەگاتتار سايلاندى.
ايقىن نەسىپباي. قاراعاندى.
