ازىرلىك ويداعىداي

كاسپي تەڭىزى جاعالاۋىندا ورنالاسقان ويماشا پوليگونىنا قازاقستاننىڭ ءارتۇرلى گارنيزوندارىنان قارۋ-جاراق پەن  اسكەري تەحنيكا تيەلگەن ەشەلوندار كەلدى. مۇندا  قازاقستاننىڭ باتىسىندا قىركۇيەك ايىنىڭ سوڭعى دەكاداسىندا ءىرى كولەمدى بىرلەسكەن «ورتالىق-2011» ستراتەگيالىق جاتتىعۋى وتەدى. قازاقستانداعى پوليگوندا وتەتىن جاتتىعۋمەن قوسا, رەسەي فەدەراتسياسىنىڭ استراحان وبلىسىنداعى اشۋلۋك پوليگونىندا  دا اسكەرلەردىڭ  ءىس-قيمىلدارى جۇزەگە اسىرىلادى. قازاقستان مەن رەسەي  اسكەري كونتينگەنتتەرىمەن ءبىر ساپتا بەلارۋس جانە ۋكراين بولىمشەلەرى دە جاتتىعۋدىڭ اتالعان كەزەڭىنە قاتىساتىن بولادى. «ورتالىق-2011» جاتتىعۋىنا قازاقستان, رەسەي, بەلورۋسسيا, تاجىكستان, قىرعىزستان جانە ۋكراينا قارۋلى كۇشتەرىنىڭ  باسقارۋ ورگاندارى مەن قۇرالىمدارى جانە بولىمدەرى تارتىلعان. ال ول ءتورت ەلدىڭ اۋماعىندا وتەدى: اشۋلۋك پەن ويماشا پوليگوندارىنان باسقا وقۋ-جاتتىعۋ قيمىلدارى قىرعىزستاننىڭ پودگورنوە جانە تاجىكستاننىڭ لياۋر پوليگوندارىندا جالعاسىن تاپپاق. اتالعان ەكى مەملەكەتتە «ورتالىق-2011» ستراتەگيالىق جاتتىعۋى شەڭبەرىندە ۇقشۇ جەدەل ارەكەت ەتۋ ۇجىمدىق كۇشتەرى مەن ورتالىق ازيا اۋماعىنىڭ جەدەل ورىستەتۋ ۇجىمدىق كۇشتەرى قۇرامى بولىمدەرىنىڭ تارتىلۋىمەن جاتتىعۋلار وتكىزىلەدى. قازاقستان قارۋلى كۇشتەرى جاتتىعۋلاردىڭ بارلىعىنا دا تارتىلىپ, ءوز ۇلەستەرىن قوسادى. جاتتىعۋعا باسشىلىق رەسەي فەدەراتسياسى قارۋلى كۇشتەرى ورتالىق اسكەري وكرۋگىنىڭ شتابى ورنالاسقان ەكاتەرينبۋرگ قالاسىنان جاسالادى. بىرىككەن شتابتىڭ قۇرامىنا كىرەتىن قازاقستاندىق جەدەل باسقارۋ توبىنىڭ وفيتسەرلەرىن شتابتار باستىقتارى كوميتەتى توراعاسىنىڭ ورىنباسارى گەنەرال-مايور مۇقان دۇيسەكەەۆ باسقارادى, دەپ حابارلادى قر قم ءباسپاسوز قىزمەتى.