سەمەيدەگى شىعىس قازاقستان وبلىستىق نەۆزوروۆتار وتباسى اتىنداعى بەينەلەۋ ونەرى مۋزەيىندە شۆەد سۋرەتشىسى تۋۆە كرابونىڭ «تۇزەلمەيتىن قاتەلىك: العاشقى جارىلىس» جەكە كورمەسىنىڭ اشىلۋى ءوتتى.
كورمە شۆەتسيا كورولدىگىنىڭ قازاقستانداعى ەلشىلىگىنىڭ قولداۋى ارقىلى مۋزەيدىڭ «مادەنيەت ارقىلى ءۇن قاتىسۋ» حالىقارالىق جوباسى اياسىندا ۇيىمداستىرىلىپتى. كورمەدە وسىدان 25 جىل بۇرىن قازاقستان پرەزيدەنتىنىڭ جارلىعىمەن جابىلعان سەمەي يادرولىق پوليگونىنداعى يادرولىق سىناقتاردىڭ ادامزاتقا ءجانە قورشاعان ورتاعا تيگىزگەن زاردابىن كورسەتۋگە ارنالعان جۇمىستار سەرياسى ۇسىنىلىپتى.
سۋرەتشى تۋۆە كرابونىڭ قىلقالامىنان تۋعان كارتينالاردا يادرولىق قارۋدان زارداپ شەككەن ورىندار بەينەلەنەدى. بۇل كورىنىستەر قازىرگى كەزدەگى قاۋىپ-قاتەرلەرگە قايتارىلعان قاتقىل جاۋاپ سەكىلدى. سۋرەتشى قولتاڭباسىنىڭ ءبىر ەرەكشەلىگى, ونىڭ كارتينالارى اڭگىمەنى باياندايتىن ساحنالىق كورىنىسكە اينالعاندىعىندا. تۋۆە كراۆو تۋىندىلارى توپتامالارىنا نەگىز بولعان تەمىرقازىق-ۇعىم – «بارلىق ز ۇلىمدىقتىڭ ارتىندا ادام تۇرادى». اششى دا بولسا, اقيقات.
«كوبىنە ءوز وبرازدارىمدى ينتەرنەت جەلىسىنەن الامىن, ولاردىڭ باسىم ءبولىگى – ادامزات تراگەدياسى مەن ەكولوگيالىق زارداپ شەككەن ورىندار. مەن قازىرگى قوعامداعى اپاتتى وقيعالار اعىمى ادامزاتتى مەيىرىمسىز ەتە مە دەپ قورقامىن. ادامزاتقا شىنايى ءمان-ماعىنا بەرەتىن جاناشىرلىق پەن ءتۇسىنىستىك سەكىلدى سەزىمدەردى بەينەلەۋ ونەرى ارقىلى قايتارعىم كەلدى», دەيدى سۋرەتشى.
تۋۆە كرابو ءوزى ايتپاقشى, «سوعىستى جان الىسقان ۇرىس الاڭى رەتىندە ەمەس, قىلمىس جاساعان ورىندار رەتىندە سالعىسى كەلگەن». سەمەي پوليگونى – قىلمىس جاسالعان ورىننىڭ ءبىرى. قازاق حالقىنىڭ قاسىرەتىنەن شۆەدتىك سۋرەتشىنىڭ قولتاڭباسى ارقىلى تورتكىل دۇنيە حاباردار بولىپ جاتسا, بۇل دا اقيقاتتىڭ سالتانات قۇرعاندىعىنىڭ تاعى ءبىر ايعاعى. شۆەد سۋرەتشىسىنىڭ ىقىلاسىنا ۇيتىنىمىز دا سول. كورمەدەگى ادام قولىمەن جاسالعان قىلمىس ورىندارى كارتينالارعا كوز تاستاي وتىرىپ, يادرولىق قارۋسىز الەمنىڭ ماڭىزىن تەرەڭىرەك ۇعىنا ءتۇسكەندەيمىز.
قازىرگى ۋاقىتتا تۋۆە كرابو شۆەتسيانىڭ گەتەبورگ قالاسىندا جۇمىس ىستەيدى. ول 16 جىل بويى شەت ەلدە تۇرعان, سونىڭ ىشىندە فرانتسيا, اۆستراليا, يوردانيا ەلدەرى بار. ول مارسەل جانە پاريجدە بەينەلەۋ ونەرىنە ۇيرەنىپ ماشىقتاندى, ال 2003 جىلى پاريجدە بەينەلەۋ ونەرى مەكتەبىن بىتىرگەن. اۆتور كينو, پروزا, بەينەلەۋ ونەرى ءتارىزدى ونەردىڭ ءتۇرلى سالاسىمەن شۇعىلدانادى.
راۋشان نۇعمانبەكوۆا,
جۋرناليست
سەمەي
