تۇركىمەنستاندا سايلاۋشىلاردىڭ 74 پايىزى داۋىس بەردى

  تۇركىمەنستاندا ساعات 13:00 كەزىندەگى جاعداي بويىنشا پرەزيدەنت سايلاۋىنا قاتىسۋشىلاردىڭ 74%-ى (2 ميلليون 406 مىڭ 253 ادام) داۋىس بەردى. بۇل تۋرالى ريا «نوۆوستي» اقپارات اگەنتتىگى حابارلادى. داۋىس بەرۋ جەرگىلىكتى ۋاقىت بويىنشا ساعات 07:00 (08:00 است.) كەزىندە باستالىپ, 19:00-گە دەيىن جالعاسادى. ساعات 09:00 كەزىندەگى جاعداي بويىنشا سايلاۋعا 25,5 پايىز ادام قاتىسسا, 11:00-دە بۇل كورسەتكىش 51 پايىزدى (1 ميلليون 661 مىڭ 342 ادام) قۇرادى. سايلاۋعا تۇركىمەنستاننىڭ قازىرگى پرەزيدەنتى گۋربانوعلى بەردىمۇحاممەدوۆ تە قاتىستى. سونداي-اق, ونىڭ اتا-اناسى ماليكوعلى جانە وعۋلابات بەردىمۇحاممەدوۆتەر, سونداي-اق, ۇلى مەن نەمەرەسى اشحاباد قالاسىنداعى اننانياز ارتىق اتىنداعى №68 مەكتەپتەگى سايلاۋ ۋچاسكەسىندە داۋىس بەردى. «بۇگىن حالقىمىز ءۇشىن ماڭىزدى كۇن. ميلليونداعان ادام كونستيتۋتسيالىق قۇقىعىن پايدالانا وتىرىپ, الداعى جەتى جىلدا تۇركىمەنستانعا لايىقتى باسشى بولاتىن تۇلعاعا داۋىس بەرىپ جاتىر», - دەدى بەردىمۇحاممەدوۆ. جەرگىلىكتى باق وكىلدەرى وزگە دە كانديداتتاردىڭ سايلاۋعا قاتىسقانىن حابارلادى. ايتا كەتەيىك, تۇركىمەنستاننىڭ 2016 جىلى 14 قىركۇيەكتە قابىلدانعان كونستيتۋتسياسى بويىنشا پرەزيدەنتتىك قىزمەت ۋاقىتى بەس جىلدان جەتى جىلعا سوزىلعان. سونىمەن قاتار, بۇرىنعىداي 70 جاستان جوعارى بولماۋى كەرەك دەگەن شەكتەۋ الىنىپ تاستالعان بولاتىن.