بوكسشى ماديار اشكەەۆتىڭ كەلەسى قارسىلاسى بەلگىلى بولدى

قازاق كاسىپقوي بوكسشىسى ماديار اشكەەۆتىڭ كەلەسى قارسىلاسى بەلگىلى بولدى. بۇل تۋرالى vesti.kz حابارلادى. ماديار اشكەەۆ كەلەسى كەزدەسۋىن 34 جاستاعى امەريكالىق بوكسشى شون كەمەرونعا قارسى وتكىزەدى. 2012 جىلى كاسىپقوي بوكسقا كەلگەن كەمەرون 12 كەزدەسۋ وتكىزىپ, 10 جەكپە-جەكتە جەڭىسكە جەتىپ (ونىڭ 5 نوكاۋتپەن جەڭگەن), تەك سوڭعى وتكىزگەن ەكى كەزدەسۋىندە جەڭىلگەن. ال وتانداسىمىز ءوز مانسابىندا وتكىزگەن جەتى كەزدەسۋدە دە جەڭىسكە جەتتى (3 نوكاۋتپەن). سوڭعى كەزدەسۋىندە ماديار 23 جاستاعى امەريكالىق ماركۋس بەكفوردتى 6-راۋندقا جوسپارلانعان جەكپە-جەكتە ۇپاي ايىرماسىمەن ۇتتى. كەزدەسۋ 15 ساۋىردە اقش-تىڭ سولتۇستىك-شىعىسىنداعى كوننەكتيكۋتتە بولادى. جەكپە-جەك 8 راۋندقا جوسپارلانعان. ايتا كەتەيىك, ماديار اشكەەۆ اۋەسقوي بوكستا "Astana Arlans" ساپىندا باق سىناعان. كاسىپقوي بوكستاعى مانسابىن 2015 جىلى باستادى. "Main Events" پروموۋتەرلىك كومپانياسىنىڭ ۇيىمداستىرۋىمەن جەكپە-جەكتەرگە قاتىسىپ كەلەدى. اقش-تىڭ كاليفورنيا شتاتىندا جاتتىعادى.