قاشاعان كەن ورنىنان كۇنىنە 450 مىڭ باررەل مۇناي الۋ جوسپارلانىپ وتىر

كاسپي تەڭىزىنىڭ قازاقستاندىق سەكتورىندا ورنالاسقان قاشاعان كەن ورنىندا ءبىرىنشى يگەرۋ كەزەڭىندە تاۋلىگىنە 450 مىڭ باررەل مۇناي ءوندىرۋ جوسپارلانۋدا, دەپ حابارلادى قازاقپارات. «قاشاعان كەن ورنىن يگەرۋ جوباسىنىڭ ءبىرىنشى كەزەڭىنىڭ پايدالانۋ تسيكلى ون جىلدى قۇرايدى, كەلەسى يگەرۋ كەزەڭدەرى قازىرگى ساتتە جوسپارلاۋ ساتىسىندا, ءارى ءبىز ءبىرىنشى يگەرۋ كەزەڭىندە ءوندىرىستى ودان ءارى كەڭەيتۋ جوباسى اياسىندا دايىنداۋ ينجەنەرلىك-تەحنيكالىق جۇمىستاردى جۇرگىزۋگە قر ۇكىمەتىنىڭ ماقۇلداۋىن الدىق.  «تسك01» دەپ اتالاتىن ءبىرىنشى كەزەڭ اياسىنداعى ءوندىرىستى كەڭەيتۋ جوباسى ءوندىرۋ كولەمىن 80 مىڭ باررەلگە ۇلعايتۋعا باعىتتالعان كاپيتال سالىمىن بولجايدى.  ۇكىمەتتىڭ ماقۇلداۋى 2017 جىلى دايىندىق ينجەنەرلىك-تەحنيكالىق جۇمىستارىن باستاۋعا جانە 2018 جىلعا ودان ءارى جۇمىستاردىڭ جوسپارلارىن ازىرلەۋگە مۇمكىندىك بەرەدى. جوبا اياقتالعاننان كەيىن ءبىرىنشى كەزەڭدەگى ءوندىرۋ كولەمى تاۋلىگىنە 450 مىڭ باررەل ماقساتتى دەڭگەيگە جەتە الادى», - دەدى «نورت كاسپيان وپەرەيتينگ كومپاني ب.ۆ.» كونسورتسيۋمىنىڭ باسقارۋشى ديرەكتورى برۋنو جاردەن.