وزىق تەحنولوگيالار – وتىزدىققا ەنۋ كەپىلى

اتىراۋ وبلىسىنا جۇمىس ساپارى بارىسىندا مەملەكەت باسشىسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن ءتۇسىندىرۋ جانە ناسيحاتتاۋ ماقساتىمەن ءماجىلىس دەپۋتاتتارى جامبىل احمەتبەكوۆ, نۇرلان دۋلاتبەكوۆ جانە گەننادي شيپوۆسكيح يساتاي اۋدانىنىڭ تۇششىقۇدىق جانە اققىستاۋ اۋىلدارىنا كەلدى. تۇششىقۇدىق اۋىلىنداعى سايلاۋشىلارمەن كەزدەسۋدى اۋدان اكىمى تۇراربەك سۇلتانبەكوۆ اشىپ, جۇرگىزىپ وتىردى. ءماجىلىس دەپۋتاتى جامبىل احمەتبەكوۆ ەلباسىنىڭ جولداۋىنداعى نەگىزگى باعىتتار تۋرالى ايتا كەلىپ, وسى باع­دار­لامالىق قۇجات ەلىمىزدىڭ كەلەسى دامۋ بەلەسىن باعىندىراتىندىعىنا سەنىم مول ەكەندىگىن ايتتى. – ەلىمىزدىڭ دامىعان 30 ەلدىڭ قاتارىنا قوسىلۋى ءۇشىن جولداۋدا ايتىلعان يننوۆاتسيا­نى, تسيفرلى تەحنولوگيانى, IT تەحنولوگيانى, عىلىم جەتىستىكتەرىن, ءبىر سوزبەن ايتقاندا, الەم­دىك وزىق تەحنولوگيانى وندىرىسكە ەنگىزۋمىز قاجەت, ياعني ەلدىڭ ەكونوميكاسىنىڭ مۇلدە جاڭا مودە­لىن دامىتۋ شارتى تۇر. ەلباسى جولداۋىنىڭ نەگىز­گى تاقىرىبى, مىنە, وسى ماسەلەلەردى قامتي­دى. حالىقتى الەۋمەتتىك قورعاۋ ماسەلەسى دە جول­داۋدىڭ باستى باعىتى, – دەپ اتاپ ءوتتى ج.احمەتبەكوۆ. حالىق قالاۋلىلارى سايلاۋشىلاردىڭ كوپتەگەن سۇراقتارىنا جاۋاپ بەردى. كەزدەسۋگە اۋىل تۇرعىندارى, مەملەكەتتىك كاسىپورىندار مەن بيزنەس وكىلدەرى, اقساقالدار مەن اۋدان بەلسەندىلەرى قاتىستى. باقىتگۇل باباش, «ەگەمەن قازاقستان» اتىراۋ وبلىسى