بەلگىلى پروديۋسەر بايان ەسەنتاەۆا كەشYOU توبىنىڭ جاڭا قۇرامىن تانىستىردى. بۇل تۋرالى tengrinews.kz حابارلادى.
ونىڭ ايتۋىنشا, توپتىڭ بۇرىنعى قۇرامىنان تەك بالجان بيداش قانا قالعان. وعان «لاشىن» توبىنىڭ بۇرىنعى مۇشەلەرى سارا امانگەلدى مەن ەليزات بەرىكوۆا قوسىلدى, سونداي-اق, قازاق ەستراداسىنا جاڭادان كەلگەن نازىم ءابىلدينا دا بار.
«ءبىز توپتىڭ كونتسەپتسياسىن تولىعىمەن وزگەرتتىك. مەنىڭ ويىمشا 10 جىل ىشىندە كەشYOU توبىندا ۆوكالى مەن حورەوگرافياسى جوعارى دەڭگەيدەگى ۇزىن بويلى ءۇش قىزدىڭ ونەر كورسەتۋى جۇرتتى جالىقتىرىپ جىبەرگەن سياقتى. ەندى تريو ەمەس كۆارتەت قۇرۋ تۋرالى شەشىم قابىلدادىق. وسىعان ساي باعىتىمىزدى دا وزگەرتۋىمىز مۇمكىن. ال بۇرىنعى كەشYOU توبىنىڭ مۋزىكالىق رەپەرتۋارى جاعىنان ەشنارسە قالمايدى. دەگەنمەن, بۇرىنعى حيت اندەردى قايتادان ورىندايتىن بولامىز, ال جاڭا شىعارماشىلىعىمىز مۇلدەم باسقا باعىتتا بولادى», – دەدى ەسەنتاەۆا.
ول سونداي-اق, الداعى ۋاقىتتا توپتىڭ دايىنداپ جاتقان ەكى ءانىنىڭ بىرىنە كليپ تۇسىرىلەتىنىن اتاپ ءوتتى.
«قاتارىمىزعا كاستينگ ارقىلى نازىم ءابىلدينا قوسىلدى. نەگىزى ودان دا جاقسى انشىلەر قاتىسقان. الايدا, نازىمنىڭ جان-دۇنيەسى مۇلدەم بولەك. جىميىپ كۇلگەنىنىڭ ءوزى-اق كەز كەلگەن جاندى ەرىكسىز باۋراپ الادى. تاڭداۋ كەزىندە ونىڭ وسى ءبىر قاسيەتىنە ەرەكشە توقتالدىم. ونىڭ ۇستىنە بالا كۇنىنەن ساحنادا ءان ايتىپ كەلگەن ەكەن», – دەدى پروديۋسەر.
ال توپتىڭ بۇرىنعى ءانشىسى جۇلدىز ومىرعالي پروديۋسەرىنىڭ ءۇمىتىن اقتاماعان كورىنەدى. «قىزدارىمنىڭ ءوزىم كۇتكەن ناتيجەدەن اسىپ تۇسكەنىن قالايمىن. بىراق بىرگە جۇرگەن ەكى جىل ىشىندە جۇلدىز ونى ورىنداي المادى. دەگەنمەن, پروديۋسەرلىك ورتالىقتا جۇمىسىن جالعاستىرا بەرەدى. ادامي تۇرعىدان الىپ قارايتىن بولساق, وتە سىپايى جان», – دەدى بايان ەسەنتاەۆا.
