تاعى ءبىر قازاق قىتايدا تالانتتار بايقاۋىنا قاتىسۋدا (ۆيدەو)

قازاقستان اتىنان عالىمجان اۋەسباي ەسىمدى اكروبات قىتايداعى Reality Show Talent شوۋىنا قاتىسىپ جاتىر. «YouTube-تەن ءتۇرلى ۆيدەولاردى كورىپ, ارنايى كىتاپتاردى وقيتىنمىن. وسىلايشا, بىلگەنىمشە دايىندالاتىنمىن. اسپاناستى ەلىندەگى جارىسقا قاتىسۋ تۋرالى يدەيانى تانىستارىمنىڭ ءبىرى ايتتى. كوپ كەشىكتىرمەي, ۇيىمداستىرۋشىلارعا ءوزىم جايلى مالىمەتتەردى, ۆيدەولارىمدى جىبەردىم. ارادا كوپ ۇزاماي بايقاۋعا قاتىسۋعا شاقىردى», – دەدى عالىمجان اۋەسباي. بايقاۋدىڭ العاشقى كەزەڭى 2016 جىلى قىركۇيەك ايىندا ءۇرىمشى قالاسىندا وتكەن. بۇل سىندا عالىمجان بەس ورىندىقتىڭ كومەگىمەن ونەر كورسەتكەن. قازىلار القاسى ءبىراۋىزدان كەلەسى كەزەڭگە جولداما بەرگەن بولاتىن. ال قاراشا ايىنا ۇيىمداستىرىلعان بايقاۋدا ون ءبىر ورىندىقپەن قولىنان كەلەتىن ونەرىن پاش ەتتى. «بايقاۋدىڭ ءۇشىنشى كەزەڭى اقپان ايىنىڭ ورتاسىندا وتەدى. ءتورت شىنى بوتەلكەگە تورت ورىندىقتى قويىپ, ونىڭ ۇستىنە تاعى ءتورت بوتەلكە مەن ءتورت ورىندىققا شىعىپ, تالانتىمدى كورسەتۋدى جوسپارلاپ وتىرمىن», – دەدى اكروبات. Reality Show Talent شوۋىنىڭ جەڭىمپازى ءتورت كەزەڭنەن كەيىن انىقتالادى. وڭتۇستىك قازاقستان وبلىسىندا تۋعان ول بۇگىندە جۇرگەنوۆ اتىنداعى قازاق ۇلتتىق ونەر اكادەمياسى تەاتر فاكۋلتەتىنىڭ 3-كۋرس ستۋدەنتى. اكروباتيكاعا دەگەن قىزىعۋشىلىعى تەك جوعارى وقۋ ورنىنا تۇسكەن سوڭ عانا ارتقان.