نازارباەۆ باس پروكۋروردى قابىلدادى

مەملەكەت باسشىسى نۇرسۇلتان نازارباەۆ باس پروكۋرور جاقىپ اسانوۆتى قابىلدادى, - دەپ حابارلايدى اقوردانىڭ ءباسپاسوز قىزمەتى. كەزدەسۋ بارىسىندا جاقىپ اسانوۆ نۇرسۇلتان نازارباەۆقا قۇقىق قورعاۋ ورگاندارىنىڭ 2016 جىلعى قىزمەتىنىڭ قورىتىندىلارى جانە الداعى كەزەڭگە ارنالعان جۇمىس جوسپارى تۋرالى باياندادى. قازاقستان پرەزيدەنتى ەلدەگى قوعامدىق قاۋىپسىزدىك احۋالىن جاقسارتۋعا باعىتتالعان رەفورمالاردىڭ ماڭىزدىلىعىن اتاپ ءوتتى. "وسى جىلدار ىشىندە ءبىز بارلىق سالادا رەفورما جاساپ كەلەمىز. ەل تاۋەلسىزدىگىنىڭ 25 جىلدىعىنىڭ قورىتىندىسى بويىنشا ەكونوميكالىق ءوسىم جانە تۇرعىنداردىڭ ءال-اۋقاتى ارتقانىن بايقايمىز. الايدا, قۇقىق قورعاۋ ورگاندارى قىزمەتىنىڭ ماسەلەلەرى ەشقاشان وزەكتىلىگىن جوعالتقان ەمەس. ءبىز ءتيىستى شارالار قابىلداپ, زاڭنامالارعا وزگەرىستەر ەنگىزۋدەمىز", - دەدى ەلباسى. مەملەكەت باسشىسى بۇرىنعى كەزدە تىركەلگەن قىلمىستار سانى الدىڭعى جىلعى كورسەتكىشتەن كوپ بولسا, قۇقىق قورعاۋ ورگاندارى جازالانىپ وتىرعانىن ايتتى. "جازادان قاشىپ, مالىمەتتەردى جاسىرعان نەمەسە وزگەرتكەن جايتتار كەزدەسىپ جاتاتىن. ال قازىر فاكتىلەر مىندەتتى تۇردە تىركەلۋى ءتيىس", – دەدى نۇرسۇلتان نازارباەۆ. قازاقستان پرەزيدەنتىنە ۇكىمەتتىڭ كەڭەيتىلگەن وتىرىسىندا بەرىلگەن تاپسىرمالاردى ورىنداۋ بارىسىندا بيزنەس وكىلدەرىنە جۇرگىزىلەتىن تەكسەرىستەر سانىن ازايتۋ ماقساتىمەن قابىلدانعان شارالار تۋرالى ايتىلدى. بۇدان بولەك, باس پروكۋرور قۇقىق قورعاۋ سالاسىنداعى مەملەكەتارالىق قارىم-قاتىناستاردى نىعايتۋ, ەكونوميكالىق قۇقىق بۇزۋ جايتتارىمەن كۇرەسۋ ءۇشىن كادرلار دايارلاۋ جونىندە جۇرگىزىلىپ جاتقان ءىس-شارالاردى اتاپ ءوتتى. اسانوۆتىڭ ايتۋى بويىنشا, بەس ينستيتۋتسيونالدىق رەفورمانى جانە قازاقستان پرەزيدەنتىنىڭ "قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك" اتتى جولداۋىن ىسكە اسىرۋ بارىسىندا قازىرگى ۋاقىتتا پروكۋراتۋرا ورگاندارى الدىنا قويىلعان مىندەتتەردى ورىنداۋ, اتاپ ايتقاندا, اكىمشىلىك جانە قىلمىستىق ۇدەرىستەردى ەلەكتروندىق-تسيفرلىق فورماتقا كوشىرۋ, سونداي-اق جەكەلەگەن جوبالاردى ىسكە اسىرۋ ءۇشىن بارلىق قاجەتتى شارالار قابىلدانۋدا. "قوعامدىق قاۋىپسىزدىكتى جاقسارتۋدىڭ تاعى ءبىر ينديكاتورى - باس بوستاندىعىنان ايىرىلعاندار سانى. قازاقستاندا ولاردىڭ سانى 90-شى جىلداردىڭ باسىندا 100 مىڭعا جۋىق ەدى, بۇگىندە باس بوستاندىعىنان ايىرۋ ورىندارىندا ودان ءۇش ەسە تومەن - 36 مىڭ ادام وتىر", - دەدى باس پروكۋرور. سوڭىندا مەملەكەت باسشىسى ەل زاڭناماسى نورمالارىنىڭ ساقتالۋىن باقىلايتىن ورگان رەتىندە پروكۋراتۋرانىڭ ايرىقشا ءرولىن اتاپ ءوتىپ, بەس ينستيتۋتسيونالدىق رەفورما مەن قازاقستان حالقىنا جولداۋدىڭ ىسكە اسىرىلۋ بارىسىن قاتاڭ باقىلاۋ قاجەتتىگىن ايتتى. ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.