بيىل اقتوبە وبلىسىندا 650 مىڭ ش. م. تۇرعىن ءۇي بەرىلەدى

بيىل اقتوبە وبلىسىندا 650 مىڭ شارشى مەتر تۇرعىن ءۇي پايدالانۋعا بەرىلەدى. سونىمەن قاتار, «نۇرلى جەر» باعدارلاماسى اياسىندا الەۋمەتتىك ءالسىز توپقا جالدامالى پاتەرلەر ۇلەستىرىلەدى, دەپ حابارلايدى قازاقپارات. «بيىل «نۇر اقتوبە» ىقشام اۋدانىندا تۇرعىن ءۇي قۇرىلىس جيناق بانكى مەن «بايتەرەك دەۆەلوپمەنت» اق-ى التى كوپقاباتتى ءۇي سالادى. سونىمەن قاتار, اۋدانداردا ءۇي الۋ كەزەگىندە تۇرعان باسپاناعا مۇقتاج ازاماتتار ءۇشىن 1-2 جانە 8 پاتەرلى ءۇي تۇرعىزامىز. قازىرگى ۋاقىتتا «جۇمىسپەن قامتۋدىڭ 2020 جول كارتاسى» باعدارلاماسى اياسىندا بەس قاباتتى جاتاقحانا قۇرىلىسى ءجۇرىپ جاتىر. ەسەپ بويىنشا بيىل 5 مىڭ وتباسى باسپانالى بولادى», - دەيدى وبلىستىق قۇرىلىس جانە ساۋلەت باسقارماسىنىڭ باسشىسى سەرىك تولەنبەرگەنوۆ. جەرگىلىكتى بيلىك «نۇرلى جەر» باعدارلاماسى بويىنشا الەۋمەتتىك ءالسىز توپقا ساتىپ الۋ قۇقىعىنسىز جالدامالى پاتەر سالۋدى جوسپارلاپ وتىر. جەر مەن تۇرعىن ءۇي كەزەگىندە تۇرعان ازاماتتار تۇرعىن ءۇي قۇرىلىس جيناق بانكى ارقىلى نەسيە الىپ, باسپانالى بولا الادى. «جەر الۋ كەزەگىندە تۇرعان ازاماتتار جيناق بانكى ارقىلى نەسيە الىپ, بىردەن ءۇيىن سالىپ الادى. ال جەرگىلىكتى بيلىك ينجەنەرلىك جەلىلەردى تارتىپ, گاز, سۋ, جارىقپەن قامتاماسىز ەتەدى. بيىل بۇل ماقساتقا 7,1 ميلليارد تەڭگە قاراستىرىلىپ وتىر», - دەدى س.تولەنبەرگەنوۆ.