قازاقستاندا بەينەباقىلاۋ كامەرالارىنىڭ سانى ارتادى

قازاقستاننىڭ ىشكى ىستەر مينيسترلىگى رەسپۋبليكا بويىنشا بەينەباقىلاۋ كامەرالارى مەن بەينەتىركەۋىشتەر سانى ۇلعايتۋدى جوسپارلاۋدا. بۇل تۋرالى بۇگىن ۇكىمەت وتىرىسىندا ۆەدومستۆو باسشىسى قالمۇxانبەت قاسىموۆ مالىمدەدى. ونىڭ ايتۋىنشا, جول-پاترۋلدىك پوليتسيا قىزمەتكەرلەرىن بەينەتىركەۋىشتەرمەن قامتۋ كوزدەلگەن. قۇرىلعىلار بيىلعى جىلدىڭ اقپان ايىندا ساتىپ الىنا باستاماق. «الا تاياقتان» باس تارتۋعا بايلانىستى جەرگىلىكتى جەرلەردەگى جول-پاترۋلدىك پوليتسيا قىزمەتكەرلەرى تولىعىمەن جارىقشاممەن جابدىقتالعان قولعاپتارمەن, جارىق شاعىلىستىراتىن ارنايى فورمامەن قامتاماسىز ەتىلەدى. سونىمەن قاتار, ءىىم جەرگىلىكتى اكىمدىكتەردىڭ قولداۋىمەن اۋىلدىق ينسپەكتورلاردىڭ كولىكتەرىن داۋىس زورايتقىش قۇرىلعىلارمەن جابدىقتاۋدى قولعا الماق. جولداعى قاۋىپسىزدىككە باقىلاۋ نەگىزىنەن پاترۋلدىك كولىكپەن جۇرگىزىلەتىندىكتەن, ايماقتاردا اۆتوپاترۋل پوليتسەيلەرىنىڭ سانىن ۇلعايتۋ جوسپارلانىپ وتىر. ءمينيستردىڭ پىكىرىنشە, جەرگىلىكتى جەرلەردە جولداعى قاۋىپسىزدىك پەن ءتارتىپتى فوتو جانە ۆيدەوتىركەۋ قۇرىلعىلارى ارقىلى قاداعالاۋ ءوز جەمىسىن بەرەدى. «ولاردىڭ تيىمدىلىگى تايعا تاڭبا باسقانداي انىق. وتكەن جىلدىڭ وزىندە اتالمىش قۇرىلعىلار ارقىلى 900 مىڭعا جۋىق قۇقىقبۇزۋشىلىق تىركەلدى», - دەدى ق. قاسىموۆ. بەينەباقىلاۋ كامەرالارىن ورناتۋ كەزەڭ-كەزەڭمەن جۇرەدى. الدىمەن xالىق كوپ جۇرەتىن جەرلەردە: بازارلاردا, ساۋدا ورىندارىندا ورناتىلادى.