ۇكىمەت پرەزيدەنت تاپسىرمالارىن ورىنداۋ بويىنشا جالپىۇلتتىق جوسپار ازىرلەدى

قر ۇكىمەتىنىڭ وتىرىسى بارىسىندا قر پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» قازاقستان حالقىنا ارناعان جولداۋىندا بەلگىلەنگەن دامۋ باسىمدىقتارىن ورىنداۋ بويىنشا جالپىۇلتتىق جوسپار ۇسىنىلدى. ۇلتتىق ەكونوميكا ءمينيسترى ت.سۇلەيمەنوۆ ءبىرىنشى باسىمدىق – جەدەلدەتىلگەن تەحنولوگيالىق جاڭعىرتىلۋ اياسىندا تسيفرلىق يندۋستريانى, ەكونوميكانىڭ نەگىزگى سالالارىنىڭ تەحنولوگيالىق قايتا جاراقتالۋىن دامىتۋعا باعىتتالعان 19 شارا قاراستىرىلعانىن باياندادى, ونىڭ ىشىندە ءتورتىنشى ونەركاسىپتىك رەۆوليۋتسيا, ينۆەستيتسيالار تارتۋ, كولىك ينفراقۇرىلىمىن دامىتۋ, سونىمەن قاتار عىلىمي الەۋەتتى دامىتۋ بار. جوبادا «تسيفرلىق قازاقستان» مەملەكەتتىك باعدارلاماسى, ەلدىڭ ەكسپورتتىق-ينۆەستيتسيالىق ستراتەگياسى, اوك مەملەكەتتىك باعدارلاماسىنىڭ قابىلدانۋى ءتارىزدى جاڭا باعدارلامالىق قۇجاتتاردىڭ ازىرلەنۋى, سونىمەن قاتار «نۇرلى جول» مەملەكەتتىك باعدارلاماسىنا وزگەرىستەر ەنگىزۋ جانە ءونىمدى جۇمىسپەن قامتۋ مەن جاپپاي كاسىپكەرلىكتى دامىتۋ قاراستىرىلعان. ەكىنشى باسىمدىق – بيزنەس ورتانى تۇبەگەيلى كەڭەيتۋ جانە جاقسارتۋ اياسىندا 18 شارا قاراستىرىلعان, ولار ەڭ جاقسى بيزنەس ورتانى قالىپتاستىرۋعا جانە مەملەكەتتىڭ ەكونوميكاعا قاتىسۋىن تومەندەتۋگە باعىتتالعان. ايماقتىق دەڭگەيدە جاپپاي كاسىپكەرلىكتى دامىتۋ, بيزنەستىڭ بارلىق تۇرلەرى ءۇشىن شىعىنداردى ازايتۋ بويىنشا شارالار كەشەنى قابىلداناتىن بولادى. بيزنەستى جۇرگىزۋ جەڭىلدىگى بويىنشا قالالار مەن ايماقتاردىڭ رەيتينگى ەنگىزىلىپ, ولارعا ارنايى سىياقى تاعايىندالادى. ءۇشىنشى باسىمدىق – ماكروەكونوميكالىق تۇراقتىلىق اياسىندا 11 باعىت قاراستىرىلعان, ولار ينفلياتسيانى كەزەڭ-كەزەڭىمەن 3-4% دەيىن تومەندەتۋگە, بانك سەكتورىن ساۋىقتىرۋ,ا وتاندىق قور نارىعىن جانداندىرۋعا, بيۋدجەتتىك راسىمدەردى جەڭىلدەتۋگە باعىتتالعان. ءتورتىنشى باسىمدىق اياسىندا – ادامي كاپيتالدى دامىتۋ بويىنشا 10 شارا قاراستىرىلعان. ءبىلىم سالاسىندا وقۋ باعدارلامالارى جاڭارتىلىپ, ءۇش تىلدە ءبىلىم بەرۋگە كەزەڭ-كەزەڭىمەن كوشۋ قامتاماسىز ەتىلەدى, ەڭبەك نارىعىنىڭ تالاپتارىنا سايكەس كاسىپتىك ستاندارتتار جاڭارتىلادى.  دەنساۋلىق ساقتاۋ سالاسىندا مىندەتتى الەۋمەتتىك مەديتسينالىق ساقتاندىرۋ جۇيەسىن اقپاراتتاندىرۋ جانە بۇل جۇيەنى حالىق اراسىندا ءتۇسىندىرۋ بويىنشا جۇمىستار اتقارىلادى. زەينەتاقى تولەمدەرىن جانە بالانىڭ تۋىنا بەرىلەتىن ءبىر رەتتىك جاردەماقى مولشەرىن كوتەرۋ ماقساتىندا الەۋمەتتىك قامسىزداندىرۋ ماسەلەلەرى بويىنشا زاڭنامالىق اكتىلەر قابىلدانادى. سونىمەن قاتار كۇنكورىستىڭ ەڭ تومەنگى دەڭگەيى كولەمىنىڭ قۇرىلىمى قايتا قارالادى. بەسىنشى باسىمدىق – ينستيتۋتتىق وزگەرىستەر, قاۋىپسىزدىك جانە سىبايلاس جەمقورلىقپەن كۇرەس اياسىندا 9 شارا قاراستىرىلعان. مەنشىك قۇقىقتارىن قورعاۋدى كۇشەيتۋ بويىنشا بارلىق زاڭناماعا رەۆيزيا جۇرگىزىلەدى, ەىدۇ ۇسىنىستارىن ەنگىزۋ بويىنشا جول كارتاسى ازىرلەنەدى. ۇلتتىق قاۋىپسىزدىكتى قامتاماسىز ەتۋ ماقساتىندا 2017-2020 جىلدارعا ارنالعان ءدىني ەكسترەميزمگە جانە تەرروريزممەن كۇرەس بويىنشا مەملەكەتتىك باعدارلامالار مەن كيبەرقاۋىپسىزدىك تۇجىرىمداماسى ازىرلەنەدى. سونىمەن قاتار مەملەكەتتىك ساتىپ الۋلار سالاسىندا زاڭنامانى جەتىلدىرۋ ماقساتىندا ورتالىقتاندىرىلعان قىزمەت قاعيداتى بويىنشا مەملەكەتتىك ساتىپ الۋلاردىڭ بىرىڭعاي جۇيەسىن ەنگىزۋدى قاراستىراتىن زاڭ جوباسى ازىرلەنەدى. الداعى ونجىلدىقتا جاڭا يندۋستريالار مەن جاڭا ءوسىم مودەلىن قۇرۋ ءۇشىن قازاقستاندا ەلدىڭ جاڭا تەحنولوگيالىق قۇرىلىمعا كوشۋىنىڭ بىرىڭعاي ستراتەگياسى دايىندالادى. وسى ماقساتتا «قازاقستان 2025 – ۇلتتىق تەحنولوگيالىق باستاما» ستراتەگيالىق جوسپار ازىرلەنەدى.