ءىىم الەۋمەتتىك جەلىلەردەگى قاۋىپتى ويىن جايلى مالىمدەمە جاسادى

قر ءىىم الەۋمەتتىك جەلىلەردە تارالعان «سۋيتسيد ويىنى» ءۇشىن قابىلدانعان شارالار جايلى حابارلادى. مەملەكەتتىك ءتىل جانە اقپارات دەپارتامەنتىنىڭ ديرەكتورى الماس ساۋدباەۆ قازىرگى ۋاقىتتا الەۋمەتتىك جەلىلەردەگى ولىمگە اپاراتىن توپتاردى انىقتاۋ ماقساتىندا مونيتورينگ جۇرگىزىلىپ جاتقانىن ايتتى. «سوڭعى كەزدەردە عالامتوردا وزىنە-ءوزى قول جۇمساۋدى ۇگىتتەيتىن «كوك كيت» («سيني كيت»), «تىنىش ءۇي» («تيحي دوم») اتتى توپتار جىلدام تارالىپ كەتتى. جاسوسپىرىمدەردى قىزىقتىرۋ ءۇشىن الدىمەن ويىنعا كىرۋدى ۇسىنادى, بۇل ويىننىڭ سوڭى ولىممەن اياقتالادى ەكەن. ال ونىڭ مودەراتورلارى جاڭادان تىركەلگەن ادام جايلى بۇكىل مالىمەتتى ءبىلىپ, پسيحولوگياسىنا كەرى اسەرىن تيگىزەتىن تۇستارىن قولدانادى. بۇل ارەكەتتەر قىلمىستىق كودەكستىڭ 105-بابى, 3-تارماعى بويىنشا جازاعا تارتىلادى. قر ءىىم مالىمەتى بويىنشا 2016 جىلى كامەلەتكە تولماعانداردى ولىمگە يتەرمەلەۋ ارەكەتى بويىنشا 9 قىلمىستىق ءىس انىقتالعان. الايدا, ولاردىڭ اراسىندا الەۋمەتتىك جەلىلەر ارقىلى سۋيتسيدكە اپاراتىن جايتتار تىركەلمەگەن. «الەۋمەتتىك جەلىلەر وزگە ەلدەردىڭ تەحنيكالىق الاڭىندا ورنالاسقاندىقتان, ءبىزدىڭ قولىمىزدا تەك زاڭعا قايشى كەلەتىن توپتارعا شەكتەۋ قويۋ عانا كەلەدى. سۋيتسيد وقيعالارىنىڭ الدىن الۋ ءۇشىن ءاربىر اتا-انا بالانىڭ ۆيرتۋالدى ءومىرىن قاداعالاۋى ءتيىس, سونداي-اق تەرىس ارەكەتتەر بايقالعان جاعدايدا پوليتسيا قىزمەتكەرلەرىنە حابارلاسىپ, ءىستى تولىعىمەن بايانداۋى كەرەك. وسى ارقىلى ءتيىستى شارالار قابىلادانادى», – دەدى الماس ساۋدباەۆ. بۇعان دەيىن «وتباسىن قولداۋ جانە وتباسىلىق قۇندىلىقتار بويىنشا قازاقستاندىق اتا-انالار قاۋىمداستىعى» جەتكىنشەكتەردى اتالمىش ويىندارعا تىركەلۋدىڭ الدىن الۋعا شاقىرعان بولاتىن. ايتا كەتەيىك, «سيني كيت» توبى ارقىلى جاڭادان پايدا بولعان ويىندارعا تىركەلۋدى  شاقىرادى. ونىڭ شارتى بويىنشا ءاربىر قاتىسۋشى 50 تاپسىرمانى ورىنداۋى ءتيىس. الدىمەن, قولىنا وتكىر زاتپەن كيتتىڭ سۋرەتىن سالۋى كەرەك. ال ەڭ سوڭىندا ءوزىن ءوزى ءولتىرۋى قاجەت. بۇل ءىس ورىندالماعان جاعدايدا ۇيىمداستىرۋشىلار ونىڭ جاقىندارىنا زيانىن تيگىزەتىنىن ايتىپ قورقىتادى.