كاسىپوداقتاردىڭ قاتارى تولىعىپ جاتىر

ورتالىق كوممۋنيكاتسيالار قىزمەتىندە ەلباسى نۇرسۇلتان نازارباەۆتىڭ قازاقستان حالقىنا جولداۋىنا ارنالعان بريفينگ ءوتتى. وندا كاسىپوداقتار فەدەراتسياسىنىڭ توراعاسى ابىلعازى قۇسايىنوۆ «ءۇشىنشى مودەرنيزاتسيا» جولداۋى اياسىندا كاسىپوداقتار ءۇشىن باسىمدىقتاردىڭ ءبىرى بولىپ سانالاتىن جاڭا جۇمىس ورىندارىن قۇرۋ ماسەلە تۋرالى ايتتى. جيىندا ول مەملەكەت باسشىسىنىڭ قازاقستان حالقىنا جولداۋىندا اتاپ وتكەن  ونلاين-تەحنولوگيالار مەن «تسيفرلى قازاقستان» باعدارلاماسىنىڭ جاستارعا  وزدەرىنىڭ بىلىمدەرى مەن بىلىكتىلىكتەرىن تولىعىمەن پايدالانۋعا مۇمكىندىك بەرەتىنىن, ويتكەنى قازىرگى كەزدە ەلىمىزدە جۇمىس ورىندارىن ساقتاپ قالۋ وتە وزەكتى ماسەلەگە اينالىپ وتىرعانىن جەتكىزدى. ­-بۇگىندە بارلىق ەلدەردە قارجى-ەكونوميكالىق داعدارىس بولىپ جاتىر. ول بىرنەشە جىلدان بەرى جالعاسىپ كەلەدى. داعدارىس ءبىزدىڭ ەلىمىزدى دە اينالىپ وتكەن جوق. ەكونوميكالىق داعدارىس قازىرگى كۇننىڭ ەڭ باستى پروبلەماسىنا اينالىپ وتىر. وسىعان بايلانىستى ەلىمىز جۇمىس ورىندارىن ساقتاۋ ماسەلەسىمەن اينالىسۋدا. مىسالى, ەۋروپانىڭ يتاليا, گرەكيا سياقتى مەملەكەتتەرىندە جاستار اراسىندا جۇمىسسىزدىق 23 پايىزعا جەتتى. ال ءبىزدىڭ ەلىمىزدە ەلباسىنىڭ رەفورمالارىنىڭ ارقاسىندا جۇمىسسىزدىق دەڭگەيى 5 پايىزدى عانا كورسەتىپ تۇر. پرەزيدەنتتىڭ بيىلعى جولداۋى وسى ماسەلەنى تۇبەگەيلى شەشۋگە ارنالعان, - دەدى ول. سونىمەن بىرگە ول  ەلىمىزدە شاعىن جانە ورتا بيزنەستىڭ ارقاسىندا كوپتەگەن ازاماتتار جۇمىس ورىندارىن اشۋعا مۇمكىندىك العانىن, سونىڭ ناتيجەسىندە ميلليونداعان وتانداستارىمىز «ەكى قولعا ءبىر كۇرەك» الىپ, ءوزىنىڭ كاسىبىمەن اينالىسىپ جاتقانىن اتاپ ءوتتى. «قازىرگى تاڭدا ەلىمىزدە 3,3 ملن ادام جالدامالى جۇمىسپەن اينالىسۋدا. ونەركاسىپ, ءوندىرىس, كولىك-لوگيستيكا سالاسىندا جۇمىس ورىندارىن ساقتاۋ ءىسى جالعاسىپ جاتىر. بۇدان باسقا 20 000-نان استام جاڭا جۇمىس ورىندارى پايدا بولدى. ال «نۇرلى جول» باعدارلاماسىن اياسىندا 4,400 شاقىرىم جول سالىنۋدا. ەگەر 100 كم-گە 1000 ادام جۇمىس ىستەسە كوپتەگەن ازاماتتاردىڭ ەڭبەكتەنىپ جاتقانىن كورۋگە بولادى. ەلىمىزدە كاسىپكەرلىكتى دامىتۋدا قولدا بار مۇمكىندىكتىڭ ءبارى جاسالىپ وتىر. مىسالى, جولداۋعا سايكەس ەندى ادامدار ءوز ءناسىبىن كاسىبىنەن تاپقىسى كەلسە 16 ملن تەڭگە كولەمىندە نەسيە الادى. وسىنىڭ ءبارى وتباسىلىق بيزنەسپەن اينالىسۋعا مۇمكىندىك بەرىپ تۇر», - دەدى ءا.قۇسايىنوۆ. سول سياقتى ول بريفينگتە كاسىپوداقتار فەدەراتسياسىنىڭ قىزمەتىنە توقتالىپ, قازىردە كاسىپوداق مۇشەلەرىنىڭ ۇشتەن ءبىرى جاستار ەكەنىن, بارلىق ايماقتاردا «كەلەشەك» جاستار كەڭەستەرى بەلسەندى جۇمىس اتقارىپ, ولار جاڭا جۇمىس ورىندارىن قۇرۋعا ءوز ۇلەستەرىن قوسىپ جاتقانىن اتاپ ءوتتى.  «ماسەلەن, قوستاناي وبلىسىندا «كەلەشەك» كاسىپوداق جۇمىسكەرلەرىنىڭ بالالارى ءۇشىن جاڭا بالاباقشا اشىلدى»,  – دەپ مالىمدەدى فەدەراتسيا توراعاسى. ونىڭ ايتۋىنشا, تەك سوڭعى ەكى جىل ىشىندە كاسىپوداقتار مۇشەلەرىنىڭ سانى 116 مىڭنان استام ادامعا كوبەيگەن. سوندىقتان دا جاستاردى جۇمىسپەن قامتۋ كاسىپوداقتاردىڭ ماڭىزدى مىندەتتەرىنىڭ ءبىرى بولىپ قالا بەرەدى. اتاپ وتەر ءجايت, مەملەكەت باسشىسىنىڭ باستاماسىمەن ۇيىمداستىرىلعان  كونستيتۋتسيالىق رەفورمالار اياسىندا كاسىپوداقتار فەدەراتسياسى كاسىپوداقتار قاتارىندا دا رەفورما جۇرگىزۋدى جوسپارلاۋدا. ەڭ باستىسى مۇندا باسىمدىق كادرلاردى جاڭارتۋعا بەرىلەدى. داستان كەنجالين, «ەگەمەن قازاقستان»