وسكەمەن ايالدامالارىنداعى جىلى پاۆيلونداردى قاڭعىباستار پانالاۋدا

وسكەمەن قالاسىنىڭ بىردەن ءۇش ايالداماسىندا جۋىردا عانا پايدا بولعان جىلى پاۆيلوندار قاڭعىباستاردىڭ سۇيىكتى ورنىنا اينالدى. جوبانىڭ تاپسىرىس بەرۋشىلەرى مۇنداي جاعدايلارعا جول بەرمەس ءۇشىن بارلىعىن جاساعاندىعىن اتاپ وتۋدە, دەپ حابارلادى YK-news.kz. جانە قازىر قاڭعىباستاردى پاۆيلونداردان قالاي قۋىپ شىعارلارىن بىلمەي وتىر. ەسكە سالساق, 2016 جىلى وسكەمەندە جىلىتىلاتىن ءۇش ايالداما ورناتىلدى («سپورت سارايى» ايالداماسىندا, قايسەنوۆ كوشەسىنە بۇرىلىستاعى «اۆتوباسقارۋ» ايالداماسىندا جانە كۇلەنوۆ اتىنداعى كەنتتە - مولداعۇلوۆا كوشەسىندە). «پاۆيلونعا كىرەبەرىستە ەلەكتروندى ق ۇلىپتار تۇر, ولار 22.00-دە اۆتوماتتى تۇردە ىسكە قوسىلىپ, ەسىكتەر بۇعاتتالادى. ءۇي-كۇيى جوقتار الدىن الا كەلىپ, ەسىكتەر جابىلىپ قالماس ءۇشىن, ونىڭ استىنا ءارتۇرلى زاتتار قويادى. وسىدان كەيىن توپتاسىپ, ايالداماعا جينالادى. بىراق ءبىز بۇعان باقىلاۋ جۇرگىزە المايمىز عوي. بۇل پوليتسەيلەردىڭ جۇمىسى. كەزەكشىلىكتەگى جاياۋ پوليتسەيلەر ايالدامالارعا ارا-تۇرا بارىپ, كەزبەلەردى ول جەرلەردەن قۋىپ تۇرۋى كەرەك. ايتا كەتەيىك, مۇنداي پروبلەما استانادا دا بار», - دەيدى وسكەمەن قالالىق جولاۋشىلار تاسىمالى جانە اۆتوموبيل جولدارى باسقارماسى تۇرعىن ءۇي-كوممۋنالدىق شارۋاشىلىعى ءبولىمىنىڭ باستىعى اسقار جاقسىلىقوۆ. ءوز كەزەگىندە ءتارتىپ ساقشىلارى قالىپتاسىپ وتىرعان جاعدايدان حاباردار ەكەندىكتەرىن جانە جىلى ايالداما يدەياسىنىڭ قۇردىمعا كەتپەۋى ءۇشىن بارىن سالىپ جاتقاندىقتارىن ايتۋدا.