سەلفي سۋعا باتىرا جازدادى

قازىر جاستارعا سەلفي جاساۋ تاۋسىلمايتىن قىزىق ءىس كو­رىنەدى. ليساكوۆ قالاسىندا 25 جاستاعى بويجەتكەن جۇرتتى قاتەر­لىلىگىمەن تاڭعالدىراتىن ءبىر سەلفي جاساماق بولدى. ول بۇل ءۇشىن قالا ماڭىنداعى قى­زىل­جار بوگەتىن تاڭدايدى عوي. بويجەتكەن العاشقى سەلفيىن جاساپ بولا بەرگەندە, ويىلىپ كەتكەن مۇزدىڭ استىنا ءتۇسىپ كەتە­دى. اينالاداعى بالىق­شى­لار, كەزەكشىلىكتە جۇرگەن پو­لي­تسەي­لەر قىزدى كورگەننەن «ول جەرگە بارما, مۇزى جۇقا» دەپ اي­قايلاي بەرگەندە, ول ويىققا ءتۇ­سىپ تە كەتكەن ەدى. ايتەۋىر, ابى­روي بولعاندا ونى تاجىريبەلى بالىقشىلار مەن ارنايى كۇزەت قىزمەتى باسقارماسىنىڭ بوگەتتى باقىلاپ جۇرگەن قىزمەتكەرلەرى قۇتقارىپ قالدى. – ءبىزدىڭ ايقاي سالعانىمىز دا سول ەدى, قىز مۇزعا كۇمپ بەر­دى. ءبىز جەتكەنشە ول ءوزى قار­ما­­­­نىپ مۇزدىڭ بەتىنە شىق­تى, سوسىن جاعاعا تارتىپ الدىق. دەرەۋ «جەدەل ءجار­دەم» مەن قۇتقا­رۋشىلاردى شاقىر­دىق, – دەيدى پوليتسيا سەرجان­تى ۆيا­چەسلاۆ ماليچەۆ. مامان­داردىڭ ايتۋىنشا, كۇن قانداي سۋىق بول­عانمەن, بوگەتتەگى مۇز­دىڭ قالىڭ­دىعى 4 سانتيمەتردەن اسپايدى ەكەن. ويتكەنى, جوعارى توبىل سۋ قويماسىنا قاڭتار ايى­نىڭ اياعىنان باستاپ سۋ تۇسە باس­تايدى دا, ول مۇزدىڭ استىن شايىپ جاتادى. بويجەتكەندى قۇتقارعاننىڭ ءبىرى, پوليتسيا سەرجانتى ءمادي بالابيەۆتىڭ بوگەت سەلفي جاسايتىن ورىن ەمەس, ونىڭ قاۋىپتى ەكەنىن وسىندا قىدىرۋعا كەلگەن جاستارعا تۇسىندىرۋدەن جا­لىقپايتىنىن ايتتى. بىراق قىزىققا ۇمتىلعان جاستار مۇنداي ەسكەرتپەنى جۇرە تىڭدايدى. بويجەتكەننىڭ تەلەفونى سەل­فيىمەن بىرگە مۇزدىڭ استىندا قالدى. ول جاقىندا عانا تەلەفوننىڭ نەسيەسىن تولەپ بىتىرگەن ەكەن. ءبىر اجالدان اۋپىرىممەن امان قالعان بويجەتكەن ەندى بوگەتكە كەلمەيتىندەي, سەلفي جاساماستاي بولدى. وسى وقي­عادان كەيىن سەلفيگە قۇشتارلار ونى مۇز استىندا «جاساماۋى» ءۇشىن ءتيىستى ورىندار بوگەتتىڭ وسى قاۋىپتى اۋماعىن قورشاپ قويدى. ءنازيرا جارىمبەتوۆا,«ەگەمەن قازاقستان» قوستاناي وبلىسى, ليساكوۆ قالاسى