ۇمىتتەردى ۇكىلەيتىن ورتالىق

ءار ادامنىڭ, ءار وتباسىنىڭ ارمان-مۇراتى ۇرپاق جالعاستىرۋ ەكەنى ءسوزسىز. الايدا, تاعدىردىڭ جازۋىمەن, ءارتۇرلى سەبەپتەرمەن بالالى بولۋ باقىتىنا قول جەتكىزە المايتىن جاندار دا كەزدەسىپ قالادى. ادام بالاسىنىڭ وسىنداي وزەكتى ماسەلەسىن شەشۋدە مەديتسينا عىلىمى كومەككە كەلدى. بۇل – انالاردى جاساندى ۇرىقتاندىرۋ جولىمەن ومىرگە ءسابي اكەلۋ مۇمكىندىگىن سىيلاۋ. الەم ەلدەرىندە بەدەۋلىك 8-29 پايىز شەگىندە بولىپ كەلەدى. قازاقستاندا وتباسى جۇپتارىنىڭ 16 پايىزىندا بەدەۋلىك كەزدەسەدى. 2016 جىلى بەدەۋلىك دەرتىنەن ەمدەلۋگە 1348 وتباسىلىق جۇپ دارىگەرلىك كومەككە جۇگىنگەن, سونىڭ ىشىندە 674 جۇپتىڭ ەمدە­لۋىنىڭ جالعىز جولى قوسالقى رەپرودۋكتيۆتىك تەحنولوگيالاردى, سونىڭ ىشىندە ەقۇ جانە يكسي بولعاندىقتان وبلىستىق پەريناتالدىق ورتالىعىنىڭ كەڭەس بەرۋ-دياگنوستيكالىق ءبولىمىنىڭ بەدەۋلىك كابينەتىنە باعىتتالدى. وسى جۇپتاردىڭ بەدەۋلىگىنىڭ ەڭ قىسقا مەرزىمى – 7 جىل. جىل سايىن قازاقستاندا ەقۇ باعدارلاماسىنا 700-800 كۆوتا, ال اقتوبە وبلىسىنا 40 كۆوتا بولىنەدى. سونىمەن قاتار, ەقۇ قاجەت 674 جۇپتىڭ 300-ءى كۆوتا الۋ ءۇشىن قاجەتتى ولشەمدەرگە ساي بولعان. وسىعان وراي وبلىستىق پەري­نا­تالدىق ورتالىعىنىڭ كەڭەس بەرۋ-دياگنوستيكالىق ءبولى­مىن­دە ەكستروكورپورالدىق ورتا­لىعى اشىلدى. ورتالىقتا بەدەۋ­لىكتى قوسالقى رەپرودۋكتيۆتى تەحنو­لوگيالارمەن ەمدەۋ ءادىسى قولدانىلادى. وبلىستىق پەريناتالدىق ورتالىقتىڭ باسشىسى اسحات بالىقوۆتىڭ ايتۋىنشا, بۇگىندە 2000-عا جۋىق بەدەۋلىك بەلگىسى بار انالار كەزەكتە تۇرعان كورى­نەدى. بۇعان دەيىن الماتى, استانا قالالارىندا جاساندى ۇرىق­تاندىرۋ جولىمەن بالالى بولۋعا 40 كۆوتا بولىنسە اتالمىش ورتالىقتا 50 اناعا وسىنداي مەدي­تسينالىق كومەك كورسەتىلۋدە. انالاردى جاساندى ۇرىقتاندىرۋ ءارتۇرلى جاعدايلارعا بايلانىس­تى 250-280 مىڭ تەڭگە كولەمىندە تۇسەدى. ال بۇل كورشىلەس ورىنبور وبلىسىندا 2-5 مىڭ اقش دوللارى بولادى. ورتالىقتى كۇردەلى ءجون­دەۋگە 60 ميلليون تەڭگە قارجى جۇمسالدى. مەكەمەنى مەدي­تسينالىق جاراقتارمەن جابدىقتاۋ 420 ميلليون تەڭگەگە ءتۇستى. – ءبىزدىڭ ورتالىق مەديتسي­نالىق قوندىرعىلارمەن جاراق­تاندىرىلۋى بويىنشا تمد ەلدەرىندەگى بىرەگەي مەكەمە. شەتەل­دىك قوندىرعى ارقىلى بالا­لاردىڭ انا جاتىرىنداعى دامۋىن ايقىن انىقتايمىز. وسى قوندىرعى ارقىلى مۇگەدەك بالالاردىڭ ومىرگە كەلۋىنىڭ الدىن الۋعا مۇمكىندىگىمىز بار, بۇل تمد ەلدەرىندە جوق. بىزگە وسىنداي جاعداي جاساعانى ءۇشىن ەلباسىمىزعا, ءوڭىر باسشىسىنا العىسىمىز شەكسىز, – دەيدى ورتالىقتىڭ مەديتسينالىق-گەنەتي­كالىق قىزمەتىنىڭ مەڭگەرۋ­شىسى ليۋبوۆ بويكو. ساتىبالدى ءساۋىرباي, «ەگەمەن قازاقستان» اقتوبە وبلىسى