دوللاردىڭ نىعايۋى مۇناي باعاسىن تومەندەتتى

بۇگىن استانا ۋاقىتىمەن تاڭعى ساعات 09:00-دا برەنت ماركالى مۇناي باعاسى 0,5 پايىزعا دەيىن ارزانداپ, 55,91 دوللارعا ساۋدالاندى. "قارا التىننىڭ ارزانداۋىنا ءبىرىنشى سەبەپ دوللاردىڭ قىمباتتاۋى", - دەيدى Commerzbank ساراپشىسى كارستەن فريتچ. ال كەشە مۇناي قۇنى سوڭعى اپتاداعى رەكوردتىق كورسەتكىشكە جەتىپ, باررەلىنە 57 دوللاردان اسىپ كەتكەن ەدى. وعان تۇرتكى بولعان وپەك كەلىسىمىنىڭ ساقتالۋى مەن يران-اقش قاتىناسىنىڭ شيەلەنىسۋى. تەگەراننىڭ بالليستيكالىق زىمىران ۇشىرۋى ەكى ەل اراسىنداعى شيەلەنىستى جاعدايدى ودان سايىن ۋشىقتىرا ءتۇسىپ, ترامپ اكىمشىلىگى پارسىلارعا قارسى جاڭا سانكتسيا ازىرلەگەن. ناتيجەسىندە, وتكەن جۇما كۇنى اقش يراننىڭ 12 كاسىپورنى مەن 13 تۇلعاسىنا سانكتسيا سالعان. ترەيدەرلەردىڭ پىكىرىنشە, تەگەرانعا قارسى سالىنعان سانكتسيانىڭ كۇشەيتىلۋى يران مۇنايىنىڭ ەكسپورتىنا كەدەرگىسىن كەلتىرمەك. رەيتەردىڭ حابارلاۋىنشا, وپەك ەلدەرىنىڭ مۇناي ءوندىرىسى بيىل قاڭتار ايىندا 1 ملن باررەلگە دەيىن ازايعان. ال جوسپار بويىنشا, بۇل ەلدەر جىل ورتاسىنا دەيىن 1,8 ملن باررەل ازايتۋى ءتيىس ەدى. قازاقستان بولسا, وزىنە تيەسىلى 20 مىڭ باررەلدى ارتىعىمەن ورىنداپ جاتقانىن وتكەن اپتا حابارلاعان ەدىك.