ديماش قۇدايبەرگەن دجەكي چانمەن كەزدەستى

قىتايدا Singer 2017 ءان بايقاۋىنا قاتىسىپ جاتقان قازاقستاندىق ءانشى ديماش قۇدايبەرگەنوۆ قىتايدىڭ ايگىلى اكتەرى دجەكي چانمەن كەزدەسىپ, وعان شاپان كيگىزدى. «بۇگىن مەنىڭ ومىرىمدە تاريxي ەستە قالاتىن ەرەكشە كۇن! اتاقتى اكتەر دجەكي چان مىرزا مەنى تەلەديداردان كورىپ, كەزدەسۋگە شاقىردى! كەزدەسۋدە اكتەر ماعان ءوزىنىڭ ەكسكليۋزيۆتى كۇرتەشەسىن جانە ارنايى فيرمالىق ءان تىڭداۋ قۇرىلعىسىن سىيعا تارتتى! ال مەن اكتەرگە قازاقتىڭ شاپانىن جاۋىپ, دومبىرانى سىيعا تارتتىم! دومبىرامەن ءبىر كۇي شەرتىپ بەرۋىمدى وتىنگەن دجەكي چانعا نۇرعيسانىڭ "القيساسىنان" شاشۋ شاشتىم! ءوز كەزەگىندە اكتەر ماعان سوڭعى "Kung Fu Yoga" كينوكارتيناسىنداعى بي قيمىلدارىن ۇيرەتتى. بالا كەزىمنەن بەرى كەلە جاتقان سۇيىكتى اكتەرىم ماعان ءوز اقىل كەڭەستەرىن بەرىپ, شىعارماشىلىعىمدى باقىلايتىنىن ايتتى. ءسوز سوڭىندا, بارشا قازاقستان xالقىن جاڭا جىل مەرەكەسىمەن قۇتتىقتاپ, ادەمى لەبىز-تىلەگىن ءبىلدىردى! كەلەسى كەزدەسۋدى اسىعا كۇتەمىز! ارماندار ورىندالادى!», -  دەپ جازدى ديماش قۇدايبەرگەن ءوزىنىڭ ينستاگرام پاراقشاسىندا.