عالىمدار قاۋىمى جولداۋدى قولدايدى

ورتالىق كوممۋنيكاتسيالار قىزمەتىندە مەملەكەت باسشىسىنىڭ قازاقستان حالقىنا جولداۋىنا ارنالعان بريفينگ ءوتتى. وعان بەلگىلى عالىم, ەكونوميست, قازاقستان جوعارعى وقۋ ورىندارى قاۋىمداستىعىنىڭ توراعاسى راحمان الشانوۆ, اتىراۋ مۇناي جانە گاز ۋنيۆەرسيتەتىنىڭ رەكتورى ءالي ابىشەۆ پەن حالىقارالىق اقپاراتتىق تەحنولوگيالار ۋنيۆەرسيتەتىنىڭ رەكتورى دامير شىنىبەكوۆ قاتىستى. بريفينگتە عالىمدار ەلباسى جولداۋىنداعى ءبىلىم جانە عىلىم ماسەلەسىنە قاتىستى ءوز پىكىرلەرىن ءبىلدىردى. «بۇگىنگى كۇندە قازاقستان حالقى ءۇشىن كوپتەگەن باعدارلامالار ىسكە اسىرىلىپ كەلەدى. ءبىز, عالىمدار قاۋىمى ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا اتاعان باستامالارىن تولىقتاي قولدايتىنى تۋرالى مالىمدەيمىز. ەلىمىز ازاتتىعىمىزدى العان كۇننەن باستاپ قازاقستان الەم ساحناسىندا بەدەلدى ورىنعا يە بولدى. پرەزيدەنت ءوزىنىڭ جولداۋىندا دامىعان 30 ەلدىڭ قاتارىنا قوسىلۋعا مۇمكىندىك بەرەتىن كەلەسى ماڭىزدى باعىتتارعا ەكپىن قويدى. ولار – ەكونوميكانى قارقىندى تۇردە تەحنولوگيالىق جاڭعىرتۋ, ءداستۇرلى نەگىزگى سالالاردى دامىتۋ, ەڭبەك نارىعىن جاڭعىرتۋ, ماكروەكونوميكالىق تۇراقتىلىق; ادامي كاپيتالدىڭ ساپاسىن كوتەرۋ, ينستيتۋتسيونالدىق تۇرلەندىرۋ, قاۋىپسىزدىك, سىبايلاس جەمقورلىقپەن كۇرەس», ­– دەدى ر.الشانوۆ. سونىمەن بىرگە ول پرەزيدەنت باستامالارىنىڭ قازىرگى زامان تالاپتارىنا ساي ەكەنىن,  ونىڭ جولداۋدا ەڭ الدىمەن ءبىلىم بەرۋ جۇيەسىنىڭ ءرولىن وزگەرتۋگە ەرەكشە نازار اۋدارعانىن اتاپ ءوتتى. «مەملەكەت باسشىسى جولداۋدا ءىت-ءبىلىم, قارجىلىق ساۋاتتىلىقتى قالىپتاستىرۋ مەن پاتريوتتىق تاربيەنىڭ وزەكتىلىگىن كورسەتتى. مۇنىڭ بارلىعى جاستاردا مەملەكەتىمىزدىڭ جاڭا دامۋ كەزەڭىندە قاجەتتى, ءومىر ءۇشىن ماڭىزدى جاڭا داعدىلار مەن قابىلەتتەردى قالىپتاستىرادى. ءبىلىم بەرۋ جۇيەسىندە ءىت-سالانىڭ قارقىندى دامۋى جانە مۇعالىمدەردىڭ كۆاليفيكاتسيالارىنىڭ جوعارىلاۋى قالا مەن اۋىل مەكتەپتەرىنىڭ اراسىنداعى ءبىلىم ساپاسىنىڭ ايىرماشىلىعىن ازايتۋعا سەپتىگىن تيگىزەرى ايقىن», – دەدى ول. كەزدەسۋدە ءالي ابىشەۆ جاستار ءۇشىن ەڭ ماڭىزدى ماسەلە – جۇمىسقا ورنالاسۋ ماسەلەسى ەكەنىن, وسىعان بايلانىستى ەلباسى ءوز جولداۋىندا جۇمىسكەرلەردىڭ جاڭا زامان سالالارىنىڭ ماماندىقتارىنا كوشۋى ءۇشىن قولايلى جاعدايلار جاساۋ مىندەتىن قويعانىن ايتتى. وسىعان وراي, ول ءوزى قىزمەت ەتەتىن اتىراۋ مۇناي جانە گاز ۋنيۆەرسيتەتىندە دۋالدى وقۋ باعدارلاماسىنىڭ جۇرگىزىلىپ جاتقانىن مىسالعا كەلتىردى. «پرەزيدەنت ەڭبەكپەن قامتۋدىڭ جاڭا جول كارتاسىن ازىرلەۋ قاجەتتىلىگىن اتاپ ءوتتى. ءبىزدىڭ ءبىلىم ورداسى ستۋدەنتتەردىڭ بوس ۋاقىتىندا جۇمىس ىستەپ, تاجىريبە جيناۋىنا مۇمكىندىك بەرىپ وتىر. مىسالى, ءبىز ستۋدەنتتى وقىتىپ قانا قويماي, ونى كاسىبي مامان رەتىندە تاربيەلەپ, ءوز ءىسىنىڭ ناعىز شەبەرىنە, مامانىنا اينالدىرۋ ءۇشىن جۇمىس ىستەپ جاتىرمىز», – دەدى ول. ال حالىقارالىق اقپاراتتىق تەحنولوگيالار ۋنيۆەرسيتەتىنىڭ رەكتورى جولداۋداعى «ساندىق قازاقستان» باعدارلاماسىنىڭ ءمانى مەن ماڭىزىن ايتىپ, بولاشاقتا ەلىمىز اقپاراتتىق جاعىنان دامىعان, ەڭ وزىق مەملەكەتتەردىڭ قاتارىنان كورىنگىسى كەلسە, قازىردەن باستاپ جەر-جەردە, ەل-ەلدە ينتەرنەت جۇيەسىن جەتىلدىرۋ كەرەكتىگىن اتاپ ءوتتى. داستان كەنجالين, «ەگەمەن قازاقستان»