«ارلاندار» ماۋسىمدى جەڭىسپەن باستادى

بۇكىلالەمدىك بوكس سەرياسىنىڭ (WSB) 2017 جىلعى جاڭا ماۋسىمى باستالدى. وسى جوباعا العاشقى ماۋسىمنان بەرى ۇزدىكسىز قاتىسىپ كەلە جاتقان ەلىمىزدىڭ «Astana Arlans» كلۋبى رەسەيدە جەرگىلىكتى «Patriot Boxing Team» كلۋبىن 3:2 ەسەبىمەن ۇتتى. حالىقارالىق اۋەسقوي بوكس فەدەراتسياسى ۇيىمداستىرعان بۇل جارىسقا قاتىساتىن كوماندالار سانى بيىل قىسقارعان. قازاقستاندىق جانكۇيەرلەرگە جاقسى تانىس ۋكراينا, ءازىربايجان, پولشا, اقش, پۋەرتو-ريكا كوماندالارى بيىلعى دودادان تىس قالدى. سوندىقتان, وزگە قاتىسۋشى كوماندالار قۇرلىق بويىنشا ءۇش توپقا بولىنگەن. پلەي-وفف باسەكەلەرى باستالعانشا مۇحيت اسۋدىڭ كەرەگى جوق. مەكسيكا, ارگەنتينا, كۋبا كوماندالارىمەن ازىرگە جولىقپايمىز. الەمدىك قارجىلىق داعدارىس كەزىندە بۇل ەكونوميكالىق تۇرعىدا ۇنەم بولاتىنى انىق. قازاقستاننىڭ «استانا ارلاندارى» كومانداسى س توبىنا تۇسكەن. ءبىزدىڭ توپتا رەسەيدىڭ «Patriot Boxing Team», قىتايدىڭ «چاينا دراگونس» جانە وزبەكستاننىڭ «وزبەك تايگەرس» كلۋبتارى بار. وتكەن سەنبى كۇنى جەرلەستەرىمىز العاشقى كەزدەسۋىن وتكىزۋ ءۇشىن ماسكەۋگە باردى. شارشى الاڭدا «س1» دارەجەسىندەگى بوكسشىلار جۇدىرىقتاستى. بۇل بوكس كەشى ءبىز ءۇشىن اسا ءساتتى باستالا قويمادى. ەڭ جەڭىل سالماقتاعى تەمىرتاس ءجۇسىپوۆ قارسىلاسى باتور ساگالۋەۆتەن ۇتىلىپ قالدى. ءبىرجان جاقىپوۆ كەتكەننەن كەيىن 49 كيلوداعى تاجىريبەلى دەگەن بوكسشىمىزدىڭ 2015 جىلعى ەۋروپا ويىندارىنىڭ جەڭىمپازىنا شاماسى جەتپەدى. ەسەسىنە جاقىندا سالماق اۋىستىرعان 56 كيلوداعى استانالىق ءىلياس سۇلەيمەنوۆ سەنىمدى اقتادى. ول ۇپاي سانى بويىنشا ارتەم حوتەنوۆتان باسىم ءتۇستى. ودان كەيىن رەسەي قۇراماسى ەكىنشى رەت العا شىقتى. «ارلانداردىڭ» 64 كيلوداعى ورەنى ءدىلمۇرات ميجيتوۆ راديمير ابدۋراحمانوۆتان جەڭىلىپ قالدى. پاۆلوداردا وتكەن ەل چەمپيوناتىندا جەڭىسكە جەتكەن 75 كيلوداعى تارازدىق ءابىلحان امانقۇل 20 جاستاعى رادجاب رادجابوۆتى ايقىن باسىمدىقپەن جەڭىپ, جالپى ەسەپتى تەڭەستىردى. نەگىزى رادجابوۆ تا وسالداردىڭ قاتارىنان ەمەس. حاباروۆسكىدە وتكەن حالىقارالىق تۋرنيردە الەم چەمپيوناتىنىڭ قولا جۇلدەگەرى ارتەم چەبوتارەۆتىڭ ءوزىن ۇتقان بولاتىن. سوڭعى شەشۋى كەزدەسۋ 91 كيلوداعى بوكسشىلاردىڭ اراسىندا ءوتتى. «ارلانداردىڭ» نامىسىن انتون پينچۋك قورعادى. ازيا ويىندارىنىڭ جەڭىمپازى رەسەيلىك يليا كۆاسنيكوۆقا ەش مۇمكىندىك بەرمەدى. ءسويتىپ, «Astana Arlans» 3:2 ەسەبىمەن جەڭىسكە جەتتى. ال ءبىزدىڭ توپتاعى ەكىنشى جۇپتا قىتايدىڭ «چاينا دراگونس» كومانداسى ءوز جەرىندە وزبەكتەردى ءدال وسىنداي ەسەپپەن ۇتتى. ايتا كەتەيىك, جاڭا ماۋسىم الدىندا كوماندانىڭ بۇرىنعى بوكسشىلارى مەن باپكەرلەرى كلۋبتى سوتقا بەرگەن ەدى. سەبەپ بىرەۋ. وسىدان ەكى جىل بۇرىن «استانا ارلاندارى» ەكىنشى رەت بۇكىلالەمدىك بوكس سەرياسىندا چەمپيون اتانعان. جەڭىمپاز كلۋبتىڭ ەسەپشوتىنا حالىقارالىق اۋەسقوي بوكس فەدەراتسياسى (AIBA) 400 مىڭ دوللار اۋدارعان ەدى. بىراق باسشىلىق بۇل اقشانى سىياقى رەتىندە ۇلەستىرۋدى ءجون كورمەگەن. بوكسشىلار مەن كلۋب اراسىندا ماۋسىم باسىندا ونداي كەلىسىمشارت تا بولماعان ەكەن. ماسەلەنى ءوزارا شەشە الماعان سوڭ, 24 ادام سوتقا جۇگىندى. ولاردىڭ اراسىندا باپكەر بەيبىت ەسجانوۆ جانە بوكسشىلار ەرىك ءالجانوۆ, سامات باشەنوۆ, ماردان بەرىكباەۆ, جومارت ەرجان, مۇحامەدجان ەركىن, قايرات ەراليەۆ, ميراس جاقىپوۆ, نۇرداۋلەت جارمانوۆ, ەرجان مۇسافيروۆ, زاكىر سافيۋللين, مەيىربولات تويىتوۆ بار. بوكسشىلار سىياقىدان بولەك «Astana Arlans» كلۋبىنان ارقايسىسىنا 200 000 مىڭ تەڭگە كولەمىندە مورالدىق شىعىن  وتەۋىن تالاپ ەتكەن ەدى. بىراق سوت ولاردىڭ وتىنىشتەرىن قاناعاتتاندىرعان جوق. انىعىن ايتقاندا, بوكسشىلار سوتتا جەڭىلىپ قالدى. «استانا» كاسىبي پرەزيدەنتتىك كلۋبىنىڭ اتقارۋشى ديرەكتورى امانبەك كۇلشىكوۆ بوكسشىلار مەن باپكەرلەردىڭ الدىندا ەشقانداي قارىزىمىز جوق دەپ وتىر. بارلىعىن كەلىسىمشارت بويىنشا تولەگەنىن مالىمدەدى. جالپى, بيىلعى ماۋسىمدا «Astana Arlans» كلۋبىنىڭ قۇرامىنا 20 بوكسشى ەنگەن. دەگەنمەن, كوماندا باپكەرلەرى رەزەرۆتىك قۇرامعا 19 بوكسشى الىپ وتىر. جەتىنشى ماۋسىمدا «Astana Arlans» كاپيتانى بولىپ, 52 كيلو سالماقتاعى ولجاس ساتتىباەۆ سايلانعان بولاتىن. بەك تولەۋوۆ