چەح كاسىپكەرلەرى قازاقستاننىڭ قاي سالالارىنا قارجى سالادى؟

قازاقستان مەن چەحيا ەكىجاقتى ساۋدا-ەكونوميكالىق قارىم-قاتىناستاردىڭ دامۋ الەۋەتىنىڭ جوعارى ەكەنى ايتىلۋدا. ەنەرگەتيكا ۆيتسە-ءمينيسترى باقىتجان جاقساليەۆتىڭ مالىمەتتەرى بويىنشا, بۇگىندە قازاقستان اۋماعىندا چەحيالىق كاپيتالدىڭ قاتىسۋىمەن 185 بىرلەسكەن كاسىپورىن تىركەلگەن, ونىڭ ىشىندە جۇمىس ىستەپ تۇرعاندارى - 107. ونىڭ سوزىنە قاراعاندا, چەحيا قازاقستانعا اۆتوكولىك, اۆتوبولشەكتەر, ەلەكتر جابدىقتارىن, جيھاز, شىنى ونىمدەرىن, فارماتسەۆتيكالىق تاۋارلار ساتادى. «قازاقستان ءۇشىن ەكىجاقتى قارىم-قاتىناستاردىڭ ماشينا جاساۋ سالاسى, اتاپ ايتقاندا چەحيالىق ماشينا جاساۋ تەحنولوگيالارى ماڭىزدى باعىتتاردىڭ ءبىرى بولىپ تابىلادى. بۇل سالا ەكسپورتتىق الەۋەتتىڭ نەگىزىن قالاپ وتىرعان, چەحيا ەكونوميكاسىنىڭ ەڭ كۇشتى باعىتى سانالاتىنى جاسىرىن ەمەس. بىزدە «ازيا اۆتو» مەن «Skoda Auto» اراسىنداعى ناتيجەلەردىڭ بارىن بىلەمىز. «Skoda قازavia» كولىگىن جانە «President Edition» ساناتىنداعى كولىكتەردى قۇراستىرۋدىڭ كونۆەيەرلىك جەلىسى قۇرىلدى. 2005 جىلدان بەرى 70 ملرد. تەڭگەگە 19 888 «Skoda» كولىگى ساتىلدى», - دەدى جاقساليەۆ. دەگەنمەن, ۆيتسە-ءمينيستردىڭ پىكىرىنشە, قازاقستان مەن چەحيا اراسىنداعى سەرىكتەستىك ولاردىڭ شىن الەۋەتىن اشا الماي وتىر. ساۋدا اينالىمنىڭ كورسەتكىشتەرى شيكىزاتتىق تاۋارلار مەن ەنەرگوتاسىمالداعىشتاردىڭ قۇنىنىڭ تومەندەگەنىنە بايلانىستى تومەن دوڭگەيدە ساقتالۋدا. «2005 جىلدان 2016 جىلدىڭ توعىزىنشى ايىنا دەيىن, چەحيادان قازاقستانعا باعىتتالعان ينۆەستيتسيالاردىڭ جالپى كولەمى نەبارى 186 ملن. دوللاردى قۇراعان. ءبىز جەمىستى سەرىكتەستىك ءۇشىن بارلىق وڭتايلى جاعدايلار جاساپ بەرىپ وتىرمىز. وسىنداي ەكونوميكالىق سەرىكتەستىكتە ماڭىزدى ءرولدى قازاقستان-چەحيا ۇكىمەتارالىق كوميسسياسى وينايدى, اسىرەسە ەكونوميكالىق, ونەركاسىپتىك جانە عىلىمي-تەحنيكالىق بايلانىستار بويىنشا. كوميسسيانىڭ كەلەسى وتىرىسى پراگادا 28 اقپاندا وتەدى. قازاقستان مەن چەحيا اراسىندا 16 حالىقارالىق كەلىسىمشارت جاسالدى», - دەپ حابارلادى ۆيتسە-مينيستر. ءوز كەزەگىندە, چەحيا پارلامەنتى دەپۋتاتتارى پالاتاسىنىڭ توراعاسى يان گاماچەك, چەح دەلەگاتسياسى قازاقستانعا «ءبىزدىڭ ەلدەر اراسىنداعى ساياسي ديالوگقا دايىن ەكەندىكتەرىن» راستاۋعا كەلگەندىگىن اتاپ ءوتتى. ونىڭ سوزىنشە, مۇنداي كەزدەسۋلەر داستۇرگە اينالىپ وتىر. «قازاقستان ءبىز ءۇشىن ورتالىق ازياداعى ەڭ ءىرى ساۋدا سەرىكتەسى بولىپ تابىلادى. ەكىجاقتى قارىم-قاتىناستاردان كورىپ وتىرعان جەمىس تە ودان كوپ بولۋى ءتيىس. سوڭعى ەكى جىلدا ءبىزدىڭ ساۋدا اينالىم ازداپ تومەندەدى. الايدا بۇل قازاقستان نەمەسە چەحيا شىعاراتىن ونىمدەردىڭ ساپاسى ءتۇستى دەگەن ءسوز ەمەس. بۇعان جاھاندىق سىرتقى فاكتورلار ءوز اسەرىن بەردى. مۇناي باعاسىنىڭ قۇلدىراۋى, رەسەيگە قارسى جاسالعان سانكتسيالار جانە باسقالار بار. ءبىزدىڭ ەلدەر اراسىندا كوپ مۇمكىندىكتەر بار, ولاردى تاۋىپ, دامىتا ءبىلۋىمىز شارت», - دەدى گاماچەك.