«التىن ءدان» ونىمدەرىنىڭ 60 پايىزى ەكسپورتتالادى

وڭتۇستىك قازاقستان وبلىسىنىڭ اكىمى جانسەيىت تۇيمەباەۆ شىمكەنتتەگى تاماق ونەركاسىبىندەگى تۇتىنۋشىلاردىڭ باسىم بولىگى تۇتىناتىن ماكارون, ۇن جانە ءسۇت ونىمدەرىن جوعارى ساپادا دايىندايتىن «التىن ءدان» جشس-نە ارنايى بارىپ, ونداعى جۇمىستارمەن تانىستى, دەپ حابارلادى وقو اكىمىنىڭ ءباسپاسوز قىزمەتى. سەرىكتەستىكتى ارالاۋ بارىسىندا وبلىس باسشىسى وتاندىق ونىمگە مەملەكەتتىك تاپسىرىستى كۇشەيتۋگە ناقتى جۇمىس جوسپارىن قۇرۋ كەرەك ەكەندىگىن ايتىپ, وسى باعىتتاعى جۇمىستاردى جۇيەلەۋدى تاپسىردى.  سونداي-اق, كاسىپورىن ۇجىمىمەن كەزدەسۋ بارىسىندا ايماق باسشىسى كəسىپكەرلەر ءۇشىن əكىمشىلىك كەدەرگىلەردى جويۋ ماقساتىندا ناقتى ءىس-شارالار قولعا الىنىپ, بۇل باعىتتا جۇمىستار جۇرگىزىلىپ جاتقانىن جەتكىزدى. «كومپانيا سۇرانىسى ەڭ جوعارى تاعامداردى ساپالى تۇردە وندىرۋمەن قاتار, 1200-گە جۋىق ادامدى جۇمىسپەن قامتاماسىز ەتىپ وتىر. مۇنداي كومپانيالار كاسىپ اشىپ, جۇمىس باستاعىسى كەلگەن ازاماتتارعا ءتاپ-ءتاۋىر ۇلگى دەپ بىلەمىن. سوندىقتان, ءبىز وسى سەرىكتەستىك سەكىلدى شاعىن جانە ورتا بيزنەس وكىلدەرىن ودان ءارى كوبەيتىپ, وتاندىق ونىمدەر ءتۇرىن كوبەيتۋىمىز كەرەك», - دەدى جانسەيىت قانسەيىت ۇلى. ايتا كەتۋ كەرەك, ءوز جۇمىسىن 1998 جىلى باستاعان جەرگىلىكتى «التىن ءدان» كاسىپورنى ەل نارىعىندا ۇن جانە ءسۇت ونىمدەرىن وندىرۋدە كوشباسشىلاردىڭ قاتارىندا. سەرىكتەستىكتە جىلىنا 8 مىڭ تونناعا جۋىق ماكارون, 981 توننا ءسۇت, 154 توننا ۇن ونىمدەرى وندىرىلسە, ۇن ونىمدەرىنىڭ 60 پايىزى كورشىلەس مەملەكەتتەرگە ەكسپورتتالادى.