وقو-دا تۇركيالىق «Ostim» يندۋستيرالدى ايماعىنىڭ وكىلدىگى اشىلدى.

وڭتۇستىك قازاقستان وبلىسى مەن تۇركيا رەسپۋبليكاسىنىڭ يندۋستريالدى ايماقتارى بۇدان كەيىن تىعىز بايلانىستا جۇمىس ىستەپ, بىرلەسكەن جوبالار اياسىندا ىنتىماقتاستىق ورناتپاق. جۇمىستاردىڭ شۇعىل جانە ناتيجەلى بولۋى ءۇشىن «وڭتۇستىك» يندۋستريالدى ايماعىنىڭ عيماراتىنان تۇركيا رەسپۋبليكاسىنىڭ «Ostim» يندۋستيرالدى ايماعىنىڭ وكىلدىگى اشىلدى, دەپ حابارلادى وقو اكىمىنىڭ ءباسپاسوز قىزمەتى. «وڭتۇستىك» يندۋستريالدى ايماعىنىڭ جەتەكشىلىگى بۇدان كەيىنگى جۇمىستارىن جۇيەلەپ, جەتىلدىرۋدە تۇركيانىڭ دامۋ تاجىريبەسىن پايدالاناتىن بولادى. ويتكەنى, انكاراداعى 5200 كاسىپورىننىڭ باسىن بىرىكتىرگەن «Ostim» يندۋستريالدى ايماعى 50 جىلدان بەرى دامۋدىڭ ۇزدىك تاجىريبەسىن كورسەتىپ كەلەدى. اتالعان شەتەلدىك يندۋستريالدى ايماقتىڭ قۇرىلتايشىلار كەڭەسىنىڭ توراعاسى ورحان ايدىن بۇل جۇمىستاردىڭ قوس مەملەكەت كاسىپكەرلەرى ءۇشىن دە ءتيىمدى بولارىنا سەنىم ءبىلدىرىپ, «وڭتۇستىك» يندۋستريالدى ايماعىنىڭ دا وكىلدىگى, ياعني, باس كەڭسەسى تۇركيانىڭ استاناسىنان اشىلاتىنىن جەتكىزدى. ال «وڭتۇستىك» يندۋستريالدى ايماقتارى باسقارۋشى كومپانياسىنىڭ باس ديرەكتورى مۇحتار تۇرابەكوۆتىڭ ايتۋىنشا, بىرلەسكەن ىنتىماقتاستىق جۇمىستارىنىڭ ارقاسىندا ورتاق برەندپەن, نە بولماسا, جەكە دارا ءونىم شىعارىلىپ, نارىققا شىعارىلادى.