سۋبسيديالاۋ ەلەكتروندى سيپاتقا كوشەدى

كاسىپكەرلەر ءۇشىن قارجىلاي كومەك الۋ ماسەلەسى وڭتايلاندىرىلادى. بۇل تۋرالى «اتامەكەن» ۇلتتىق كاسىپكەرلەر پالاتاسى اگروونەركاسىپ كەشەنى كوميتەتىنىڭ وتىرىسىندا ايتىلدى, دەپ جازادى palata.kz. كۇنى بۇگىنگە دەيىن اۋىل شارۋاشىلىعى تاۋارلارىن جانە تىڭايتقىشتاردى وندىرۋشىلەر مەملەكەتتىك سۋبيسيديانى الۋ ءۇشىن ءتيىستى قۇجاتتاردى جيناپ, ارنايى جاۋاپتى كۇتۋگە قىرۋار ۋاقىت جۇمسايتىن. الايدا, «اقپاراتتىق-ەسەپتەۋ ورتالىعى» اق باسقارما توراعاسى جاناسىل وسپانوۆتىڭ حابارلاۋىنشا, بولاشاقتا اۋىل شارۋاشىلىعى تاۋارىن وندىرۋشىلەر ەلەكتروندى قىزمەت كورسەتۋ ارقىلى ۋاقىتىن كوپ ۇنەمدەپ, جەدەلدىككە قول جەتكىزبەك. «قازىرگى تاڭدا اگروونەركاسىپتىك كەشەننىڭ ەلەكتروندى قورلارى مەن اقپاراتتىق جۇيەلەرى جاسالىپ, minagro.kz/kz سايتىنان سۋبسيديا الۋعا ءوتىنىم قابىلداۋ ەلەكتروندى جۇيەگە كوشىرىلىپ جاتىر. سۋبسيديا الۋ تالاپتارى قاراپايىم. ءوتىنىم بەرۋشى بۇرىنعىداي, سۋبسيديا الۋ ءۇشىن ءوتىنىم بەرگەن سايىن كوپتەگەن قۇجاتتار جيناپ اۋرەگە تۇسپەيدى. بارلىق قاجەتتى اقپارات ەلەكتروندى بازادا ساقتالاتىن بولادى. قاجەتتى اقپارات ءوتىنىم بەرۋشىنىڭ جەكە سايكەستەندىرۋ ءنومىرى (جسن) مەن بيزنەس سايكەستەندىرۋ ءنومىرى (بسن) ارقىلى اۆتوماتتاندىرىلعان بازادا تەكسەرىلەدى. ال جەر ۋچاسكەسى بويىنشا تەك كاداسترلىق ءنومىر تىركەلەدى. بۇرىنعىداي جەر ۋچاسكەسىنىڭ مەملەكەتتىك اكتىسىن, بەكىتىلگەن جوباسىنىڭ كوشىرمەلەرىن ۇسىنىپ قاجەتى جوق, بارلىق اقپارات پورتال بازاسىنا تىركەلەدى», – دەپ تانىستىرىپ ءوتتى جاناسىل وسپانوۆ. سۋبسيديا الۋ تالاپتارى بارىنشا وڭتايلاندىرىلعان. ەلەكتروندى پورتالداعى اۆتوماتتاندىرىلعان جۇيەگە ەلەكتروندى تۇردە ءوتىنىم بەرۋ كەرەك. ءوتىنىم بەرۋشىنىڭ جسن جانە بسن دەرەكتەرى ارقىلى قاجەتتى مالىمەتتەر اۆتوماتتى جۇيە ارقىلى شىعارىلادى. جەكە جانە زاڭدى تۇلعالاردىڭ بازاسىنان قاجەتتى اقپارات جۇكتەلەدى. اۋىل شارۋاشىلىعى مينيسترلىگىنىڭ ارنايى پورتالىندا اگروونەركاسىپ كەشەنىندەگى سۋبسيديالاۋعا بەرىلەتىن وتىنىمدەردەردىڭ ەلەكتروندىق ءتىزىلىمى جاسالعان. «اي سايىن مالىمەتتەردى جاڭارتىپ, اۋىل شارۋاشىلىعى مينيسترلىگىنىڭ وڭىرلىك مەكەمەلەرىنە جولداۋدىڭ قاجەتى بولمايدى. جەكە باس مالىمەتتەرىن, تولەم دەرەكتەمەلەرىن قولمەن ەنگىزۋدىڭ دە قاجەتتىلىگى جوق. پورتال تەحنيكالىق تۇرعىدا سۋبسيديا ءبولۋدىڭ مەرزىمىن قىسقارتىپ, ۋاقىت ۇنەمدەۋگە مۇمكىندىك بەرەدى. بولاشاقتا جۇيە جۇمىسى جەتىلە تۇسەدى. قازىر ءبىزدىڭ جۇيەگە اۋىل شارۋاشىلىعى مينيسترلىگىنىڭ 16 وبلىستاعى باسقارمالارى, 197 اۋدان اكىمدىكتەرى قوسىلعان. ءبىر اي ۋاقىت ىشىندە سۋبسيديانىڭ ءاربىر تۇرىنە قاراي جۇيە جاسالادى», – دەيدى «اقپاراتتىق-ەسەپتەۋ ورتالىعى» اق باسقارما توراعاسى جاناسىل وسپانوۆ. سونىمەن قاتار, اۆتوماتتاندىرىلعان جۇيە اۋىل شارۋاشىلىعىمەن اينالىساتىن كاسىپكەرلەرگە مەملەكەتتىك قولداۋ شارالارى تۋرالى اقپارات الۋعا, سۋبسيديا ءبولۋ كەزىندە سىبايلاس جەمقورلىققا جول بەرمەۋگە, سۋبسيديا ءبولۋ تۋرالى شەشىم قابىلداۋ مەرزىمىن قىسقارتۋعا, سۋبسيديالاۋ تۋرالى ەسەپتى ناقتى ۋاقىتتا دالمە-ءدال ماعلۇماتتان الۋعا مۇمكىندىك بەرمەك.