جەرلەستەرىمىز جەڭىسكە جەتتى

جوعارى حوككەي ليگاسىندا سىنعا ءتۇسىپ جاتقان قازاقستاندىق قوس كلۋب – وسكەمەننىڭ «تورپەدوسى» مەن قاراعاندىنىڭ «سارى­ارقاسى» كەزەكتى جەڭىس­تەرىنە قول جەتكىزدى. شىعىس­قازاقستاندىق شەبەرلەر ءوز مۇز ايدىنىندا كراس­نويارسكىنىڭ «سوكول» كومانداسىن 3:2 ەسەبىمەن تىزە بۇكتىرسە, قاراعاندىلىق حوك­كەي­شىلەر انگارسكىدەن كەلگەن «ەرماكتىڭ» قاقپا­سىنا جاۋاپسىز ءۇش شايبا سوقتى. وسكەمەندەگى ويىندا ەسەپتى ءبىرىنشى بولىپ قوناقتاردىڭ ويىنشىسى دميتري پولياكوۆ اشتى. بۇدان كەيىن ۆلاديمير كوروتكوۆ, ەۆگەني بەلۋحين جانە دەنيس يگناشين قاتا­رىنان ءۇش شايبا سوعىپ, «تورپەدونى» العا شىعاردى. ال ماتچتىڭ سوڭىنا تامان «سوكولدىڭ» ويىنشىسى الەكساندر رەپياح ءبىر گول سالىپ, ەسەپ ايىرماشىلىعىن قىسقارتقانىمەن, ويىن 3:2 ەسەبىمەن وسكەمەندىكتەردىڭ پايداسىنا شەشىلدى. قازىر «تورپەدو» تۋرنير كەستەسىندە 97 ۇپايمەن بۇرىنعىسىنشا توپ باستاپ كەلەدى. بىراق ولار ەكىنشى ورىنداعى سكا-نەۆا (سانكت-پەتەربۋرگ) كومانداسىنان ۇزاپ كەتە قويعان جوق. جالپى سانى 45 كەزدەسۋدەن وتكىزگەن ەكى ۇجىمنىڭ اراسىن ءبىر عانا ۇپاي ءبولىپ تۇر. «سارىارقا» بولسا, «قاراعاندى ارەنانىڭ» مۇز ايدىنىندا انگارسكىنىڭ «ەرماك» كومانداسىمەن وتكەن ويىندا 3:0 ەسەبىمەن باسىم ءتۇسىپ, 93 ۇپايمەن (45 ويىن) ءۇشىنشى ساتىداعى ورنىن ساقتاپ قالدى. بۇل كەزدەسۋدە قاراعاندىلىقتار ساپىنان دانيل ەرداكوۆ ەكى مارتە جانە يليا انتو­نوۆسكي ءبىر رەت مەرگەندىك تانىتتى. كەشە «تورپەدو» وسكە­مەندە «ەرماكپەن» كۇش سىناسسا, «سارىارقا» كراس­نويار­سكىنىڭ «سوكولىن» ءوز ايدىنىندا سىناقتان وتكىزدى.