مۇمكىندىك سىيلاعان «مەيىرىم»

كەڭەس كەزىندە بالالار نەمەسە جاس­وس­پىرىمدەر ءۇيى اتاۋى بەرىلگەن الەۋ­مەت­تىك مەكەمەلەرگە قارجىلاي قول­داۋ كور­سەتىلگەنى راس. سولاي بولا تۇرسا دا, مۇنداعى تاربيەلەنۋشىلەرگە كادىمگى وتباسىلىق ادامي قارىم-قاتىناس, الاقان مەن جۇرەك جىلۋى جەتىسپەي جاتتى. مۇنداي كەرەعار­لىق بەسىكتەن بەلدەرى شىعىپ ۇلگەر­مەي, تاعدىر تەپەرى­شىنە تاپ بولعان ءبۇل­دىرشىندەردىڭ جۇرە­گىن جىبىتۋگە سەپتىگىن تيگىزە المادى. ەڭ ءبىر قىنجىلارلىعى, ولار 17 جاس­قا تولعاننان كەيىن مەملەكەتتىك مەكە­مە­دەن شىعارىلدى. وسى كەزدە بالا­لار ءۇيىنىڭ تۇلەكتەرى نە ىستەرىن بىلمەي, باستارىن تاۋعا دا, تاسقا دا سوقتى. ءسويتىپ ءجۇرىپ, كەيبىرەۋلەرى اداسىپ, اياقتارىن شالىس باستى. ءارى تەرىس ءىس-ارەكەتتەرگە بويلارىن ۇيرەتە باستادى. بالالار ءۇيى ءتار­بيە­لەنۋشىلەرىنىڭ ءومىر جولىن دۇرىس ايقىنداي الماۋىنا كادىمگى وتباسى ۇلگىسىنەن تىم الىس تۇرعانى, ەڭبەك تاربيەسىنەن تىس قالعانى, ادامي مەيى­رىم مەن قامقورلىققا بولەن­بەگەنى, ءبىر سوزبەن ايتقاندا, دەربەس ءومىر سۇرۋگە بەيىمدەلمەگەنى باستى سەبەپ بولدى-اۋ دەگەن وي كەلەدى. ەلىمىز تاۋەلسىزدىك العاننان كەيىن جەتىم بالالارعا وتباسى ۇلگىسىنە ساي تاربيە بەرۋ جولدارى بەلگىلەنە باستادى. ونىڭ جارقىن مىسالدارىن اقتوبە وبلىسىنان دا تابا الامىز. اتاپ ايتقاندا, وڭىردەگى «مەيىرىم» جاس­تاردى الەۋمەتتىك بەيىمدەۋ ورتا­لىعى جەتىمدەر مەن اتا-اناسىنىڭ قام­قور­لىعىنسىز قالعانداردى 17 جاس­قا تولعاندا شىعارىپ جىبەرمەي, ۋاقىت­شا تۇرعىن ۇيمەن قامتۋ ماق­ساتىن كوزدەيدى. بۇل ءتارتىپ ءوزارا كەلى­سىم­­شارتقا نەگىزدەلگەن. بۇعان دەيىن بالا­­لار ۇيىندە بولعاندار ورتالىقتا 29 جاس­قا جەتكەنشە الەۋمەتتىك تۇرعىدان بەيىم­دەلۋ كەزەڭىنەن وتە الادى. سونداي-اق, ولاردىڭ قاتارىندا جەتىمدەر ساناتىن­داعى دامۋ مۇمكىندىكتەرى شەكتەۋلى جەت­كىن­شەكتەر دە بار. مۇندا ولاردى ءىشى­نارا جۇمىسپەن قامتۋ شارالارى بەلگىلەنگەن. رەسپۋبليكامىزدا ەش­قان­داي بالاماسى جوق بۇل جوبانى «ءسابي» قايىرىمدىلىق قورى اقتوبە وبلىسى اكىمدىگىمەن بىرگە ىسكە اسىردى. اتالعان قور جەتەكشىلەرى جەكە قاراجاتى ەسەبىنەن جاستارعا ارنال­عان الەۋمەتتىك بەيىمدەۋ ورتالىعى­نىڭ ساۋلەتتى عيماراتىن سالىپ, سىيعا تارت­­­تى. وسىناۋ كەلىستى كەشەننىڭ ىشكى جاب­­­دىق­­­تارىمەن قوسا ەسەپتەگەندەگى جال­­­پى قۇنى 1 ميلليارد 500 ميل­ليون تەڭگە قۇرايدى. مۇنداعى ارقايسى­سى 43 شارشى مەتردى قۇرايتىن ءبىر ءبول­مە­لى سەكسەن پاتەر نەگىزىنەن 18-29 جاس ارا­لىعىنداعى جاستارعا ارنال­عان. ەكى كىرەبەرىسى بار تاۋنحاۋستار­دان تۇرا­تىن قوس قاباتتى عيمارات­تىڭ تومەن­گى بولىگى ارباسىز قوزعالا الماي­تىن مۇگە­دەك بالالارعا ارنال­عان. ءبىز «ءسابي» قايى­رىمدىلىق قورى­نىڭ قۇرىلتاي­شىسى كەڭەس راقى­شەۆكە جولىق­قان ەدىك. وي-پىكىرىن تومەندەگىشە تارقات­قان ول: – قالاي دەگەندە دە كەڭەستىك داۋىردە ورنىققان بالالار ۇيلەرىنىڭ مۇمكىندىگى تىم شەكتەۋلى بولعانى ەشكىمگە دە قۇپيا ەمەس. شاعىن ءارى تار بولمەلەردە 5-6 بالا بىرگە تۇردى. بۇل تۇلەكتەر ءۇشىن اسا كۇردەلى ماسەلەلەردى تۋىنداتىپ كەلدى. ەڭ باستىسى, مۇنداي جاعدايدا ولاردى الەۋمەتتىك تۇرعىدان بەيىمدەۋ دەگەنىڭىز بوس اڭگىمە بولىپ قالار ەدى. ونىڭ ۇستىنە بۇل ءۇردىس ءبىر كۇننىڭ نەمەسە ءبىر ايدىڭ ەمەس, بۇدان دا كوپ ۋاقىت الاتىنىن ەسكەرگەن ءجون. بىزگە الەۋمەتتىك-بەيىمدەۋ ورتالىعى عيماراتىن تۇرعىزۋ جوسپارى وسىدان كەيىن تۋىپ ەدى, – دەدى. ىزگىلىك, مەيىرىمدىلىك پەن قايى­رىمدىلىقتى العا قويعان ازاماتتىڭ ايتۋىنشا قوماقتى قاراجاتتى قاجەت ەتكەن ايرىقشا نىساننىڭ قۇرىلى­سىن ەكى كەزەڭ بويىنشا سالۋ بەلگىلەن­­گەن. ونىڭ ءبىرىنشى كەزەڭىنىڭ پايدا­لانۋ­عا بەرىلۋ ءساتى وتكەن 2016 جىلدىڭ 16 جەلتوقسانىنا, ياعني تاۋەلسىزدىكتىڭ 25 جىلدىق تورقا­لى تويىنا تۇسپا-تۇس كەلىپتى. ال ەكىنشى كەزەڭى الداعى ناۋرىز ايىنا بەلگىلەن­گەن. ورتا­لىقتا ونىڭ تۇرعىندارى­نىڭ الەۋ­مەتتىك-پسيحولوگيالىق تۇرعى­دان ومىرگە يكەمدەلە ءبىلۋىنىڭ بار­لىق العى­­­شارت­تارى قالانعان. جەتىم بالا­لار­عا ار­نالعان وزگە الەۋمەتتىك مەك­ە­مەلەر مەن قۇرىلىمداردان باستى ار­تىق­شىلىعى – بەينەبىر ۇيدەگىدەي جايلى جاعدايلار جاسالعان. ءبىز ورتالىقتان «مەيىرىم» دەسە, مەيىرىم ەكەن-اۋ دەگەن وي ءتۇيىپ شىقتىق. تەمىر قۇسايىن, «ەگەمەن قازاقستان» اقتوبە