جەمقورلىقپەن كۇرەس جەلى ارقىلى جەڭىلدەمەك

مەملەكەت باسشىسىنىڭ جولداۋىندا جەمقورلىققا قارسى كۇرەسۋ ءىسىن زامان اعىمىنا ساي جەتىلدىرۋ قاجەتتىگى ناقتى باياندالعان. سونداي ماقساتپەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە سىبايلاس جەمقورلىقتىڭ الدىن الۋدا ازاماتتىق قوعامنىڭ ءرولىن ارتتىرۋ ماسەلەلەرى بويىنشا تالقىلاۋ ءوتتى. شاراعا پارلامەنت ءماجىلىسىنىڭ دەپۋتاتى ج.دۇيسەباەۆ پەن ا.سولوۆەۆا, ع.بايتۇق, ر.سارسەنباەۆا سىندى قوعام قايراتكەرلەرى جانە ءتۇرلى مەملەكەتتىك ورگانداردىڭ وكىلدەرى قاتىستى. «قاۋىپسىزدىك جانە سىبايلاس جەم­قورلىققا قارسى ءىس-قيمىل – ەلباسىنىڭ قازاقستان حالقىنا جولداۋىنىڭ نەگىز­گى باسىمدىقتارى» تاقىرىبىمەن وتكەن جيىنعا اگەنتتىك توراعاسىنىڭ ورىن­باسارى ا. شپەكباەۆ جەتەكشىلىك ەتىپ, ءسوز العاندار سىبايلاس جەمقورلىق كورىنىس­تەرىن تۋدىراتىن سەبەپتەردى ايتىپ, ونىڭ سالدارىمەن كۇرەسۋدىڭ ءادىس-تاسىلدەرىن قىزۋ تالقىلادى. سونداي-اق, جيىن بارىسىندا بۇل كۇندە ەل اراسىندا «پارا بەرمە جانە الما!» دەگەن اتاۋمەن قوعامدىق شارالار جۇرگىزىلىپ جاتقاندىعى ايتىلدى. ال قوعام بەلسەندىلەرىنىڭ تۇسىندىرۋىنشە, بۇل جوباعا ءتۇرلى ۇكىمەتتىك ەمەس ۇيىمدار كوپتەپ تارتىلىپ, ول تۋرالى باق-تار مەن الەۋمەتتىك جەلىلەر ارقىلى كەڭىنەن ناسيحاتتالۋى قاجەت كورىنەدى. سەبەبى, قاي قوعام بولسا دا ەڭ الدىمەن تۇرمىستىق جەمقورلىقتى تۇبەگەيلى جەڭبەي جانە ونى ءتۇپ-تامىرىمەن جويماي مەملەكەتتىك دەڭگەيدە ىلگەرىلەۋشىلىك بولمايتىنى بەلگىلى. مەملەكەتتىك باسقارۋ اكادەمياسىنىڭ رەكتورى ف.جاقىپوۆا وسى تاقىلەتتەس ويلارىن ءوز سوزىمەن ساباقتاي كەلە, قو­عام اراسىندا سىبايلاس جەمقورلىقتى جويۋ­مەن قاتار, ەتيكالىق قۇندىلىقتاردى نىعايتۋعا باعىتتالعان «ادالدىق جولى» جوباسىنىڭ تۇساۋىن كەستى. «قالىڭ بۇقارانى اتالعان جوباعا كەڭىنەن قاتىسۋىن قامتاماسىز ەتە وتىرىپ, سىبايلاس جەمقورلىققا قارسى اكتسيالار وتكىزۋ, سىبايلاس جەمقورلىق ناتيجەلەرىن جۇيەلى تۇردە جاريالاۋ, باق ارقىلى ادال ءارى ءادىل مەملەكەتتىك قىزمەتشىلەر تۋرالى شىنايى وقيعالاردى كورسەتۋ ارقىلى «اقپاراتتىق تانىمنىڭ» ماڭىزدىلىعىن ارتتىرۋىمىز قاجەت. سونىمەن قاتار, جوبا اياسىنداعى قىزمەتتى الەۋمەتتىك جەلى­لەر ارقىلى دا بەلسەندى جۇرگىزۋ كەرەك­تىگىن قاپەرگە العانىمىز ابزال. ءناتي­جەسىندە, جەمقورلىقپەن كۇرەستەگى جۇمى­سى­مىزدى جەلى ارقىلى جەڭىلدەتە تۇسەتىن بولامىز», – دەدى ف.جاقىپوۆا. وتىرىس اياسىندا قاتىسۋشىلار تاراپىنان سىبايلاس جەمقورلىققا قارسى ءىس-قيمىلدىڭ ءتۇرلى ءتيىمدى ۇلگىلەرى مەن تاسىلدەرى ۇسىنىلدى. ولاردىڭ قاتارىندا مادەنيەت پەن اقپارات, ادەبيەت پەن ازاماتتىق قوعام سالالارىنداعى اۋقىمدى ماسەلەلەردى تالقىلاۋدى قاراستىراتىن الەۋمەتتىك جوبالار كوپشىلىك تاراپىنان قىزۋ قولداۋعا يە بولدى. نۇرلىبەك دوسىباي, «ەگەمەن قازاقستان»