تاپسىرمالار تياناقتالدى

ۇكىمەت ەلباسىنىڭ سىنىنان قورىتىندى شىعارۋعا كىرىستى پرەمەر-مينيستر باقىتجان ساعىنتاەۆتىڭ توراعالىعىمەن سەنبىدە ۇكىمەتتىڭ كەزەكتەن تىس وتىرىسى ءوتتى. وندا كەڭەيتىلگەن وتىرىستا بەرىلگەن پرەزيدەنت تاپسىرمالارىن ورىنداۋ ماسەلەلەرى قارالدى. ەسكە سالساق, جۇما كۇنى ەلباسىنىڭ قاتىسۋىمەن كەڭەيتىلگەن وتىرىس ءوتىپ, وندا ۇكىمەتكە بىرقاتار ناقتى ءمىن­دەتتەر قويىلعان بولاتىن. مىنە, سول تاپ­سىرمالارعا وراي ۇكىمەت ءتيىستى شەشىم­دەر قابىلداپ, ءتيىمدى شارالاردى قولعا الۋى ءتيىس. سەنبىدەگى شۇعىل جيىن­نىڭ دا سىرى وسىندا. سونىمەن, پرەمەر-مينيستر ەلىمىز­دەگى بيزنەس-احۋالدى جاقسارتۋ بويىن­شا ءبىراز جۇمىس اتقارىلعانىن, الايدا بيزنەسكە رەتتەۋ جۇكتەمەسى ارتۋىن جال­­عاستىرعانىن اتاپ ءوتتى. بۇل رەتتە پرەمەر-مينيستر ۇلتتىق ەكونوميكا جانە ادىلەت مينيسترلىكتەرىنە وسى ماسەلەنى شەشۋدى تاپسىردى. بۇدان وزگە, ۇلتتىق ەكونوميكا مينيسترلىگىنە ءمۇد­دەلى ورگاندارمەن جانە «اتامەكەن» ۇكپ-مەن بىرگە ءبىر ايدا بارلىق باقىلاۋ-قاداعالاۋ فۋنكتسيالارىن اۋقىمدى تەكسەرۋدى اياقتاۋ تاپسىرىلدى. «ءبىرىنشى كەزەكتە بيزنەسكە كوتەرىڭكى تالاپتار مەن اكىمشىلىك كەدەرگىلەردى قىسقارتۋ قاجەت. زاڭنامالىق اكتىلەرگە بارلىق قاجەتتى وزگەرىستەردى اعىمداعى جىلى قابىلداۋ كەرەك», دەدى ب.ساعىنتاەۆ. پرەمەر-مينيستر مەملەكەت باس­شى­­سى تاراپىنان سالىق ورگاندارىنا كوپ سىن ايتىلعانىن ەسكە سالدى. وسى­عان بايلانىستى ب.ساعىنتاەۆ قارجى مينيسترلىگى مەملەكەتتىك كىرىستەر كومي­تەتىنىڭ بيزنەستى تەكسەرۋدى وڭتايلاندىرۋ تۇرعىسىنداعى جۇمىسىن قايتا قۇرۋدى تاپسىردى. بۇدان بولەك, پرەمەر-مي­نيستر باس پروكۋراتۋرامەن بىرگە نەگىزسىز جۇرگىزىلگەن ىستەردى ءبىر اي ىشىندە رەتتەۋدى جۇكتەدى. سونداي-اق, پرەمەر-مي­نيستر ۇلت­تىق ەكونوميكا مينيستر­لى­گى­­نە ءمۇد­دەلى ورگاندارمەن بىرگە جاڭا سا­لىق كودەكسىن ازىرلەۋ كەزىندە اكىم­شىلەن­دىرۋدى تۇبەگەيلى جەڭىلدەتۋدى جانە ونى بارىنشا قاراپايىم ەتۋدى تاپسىردى. «ونىڭ الدىندا بىرىكتىرىل­گەن سالىق جانە كەدەندىك كودەكس ءازىر­لەۋ جوسپارلانعان بولاتىن. الايدا, پرە­زي­دەنتتىڭ تاپسىرماسىنا سايكەس ۇلت­تىق ەكونوميكا جانە قارجى مي­نيسترلىكتەرىنە جەكە سالىق جانە كەدەن­دىك كودەكستەردى ازىرلەۋ قاجەت», دەدى ب.ساعىنتاەۆ. كەڭەيتىلگەن وتىرىستا ايتىلعان 2018 جىلدىڭ سوڭىنا دەيىن كاسىپورىن­داردى جەكەشەلەندىرۋ جۇمىستارىن جەدەلدەتىپ, اياقتاۋ تۋرالى تاپسىرما دا پىسىقتالدى. ۇكىمەت باسشىسىنىڭ مالىمدەۋىنشە, نىسانداردىڭ باسىم بولىگى بيىل وتكىزىلۋى ءتيىس. قارجى مينيسترلىگى اتالعان جۇمىستىڭ اي سايىنعى كەستەسىن باقىلاۋدا ۇستاۋى قاجەت. بۇدان وزگە, مەملەكەت باسشىسى مەملەكەتتىك مەنشىك پەن كۆازيمەملەكەتتىك سەكتوردا قالاتىن نىسانداردىڭ تولىق ءتىزىمىن ازىرلەۋدى تاپسىردى. وسى ورايدا, ب.ساعىن­تاەۆ ۇلتتىق ەكونوميكا ءمينيسترى ت.سۇلەي­مەنوۆكە Yellow pages rules قاعي­دا­لارىنا سايكەس كەلمەيتىن, اتالعان ءتىزىم­د­ەرگە كىرمەيتىن نىسانداردى جويۋ­دى تاپسىردى. بۇل جۇمىس 1 ناۋ­رىزعا دەيىن اياقتالۋى ءتيىس. ۇكىمەت باسشىسى, سونداي-اق, مەم­لە­كەتتىك ساتىپ الۋلار جانىنداعى وتاندىق تاۋارلار ۇلەسىن ارتتىرۋدى تاپسىردى. پرەمەر-مينيستر ب.ساعىن­تاەۆ اۆتوكولىكتەر بويىنشا ورتا­لىق­تان­دىرىلعان مەملەكەتتىك ساتىپ الۋلار تەتىگىن ەنگىزۋ وتاندىق وندىرۋشىلەردىڭ الەۋەتىن ارتتىرىپ, ولاردىڭ ءوندىرىسىن جاڭعىرتۋعا مۇمكىندىك بەرگەنىن ايتىپ ءوتتى. «ءبىز بيىلعى جىلى اتالعان جۇمىستى جيھاز بەن جەڭىل ونەركاسىپتە جۇرگىزۋ جونىندە كەلىسىپ قويدىق. وسىعان ۇقساس ءتاسىلدى ەنگىزەتىن سالالاردىڭ ءتىزىمىن ۇلعايتۋ كەرەك», دەدى ب. ساعىنتاەۆ. وسى­عان وراي, ينۆەستيتسيالار جانە دامۋ مينيسترلىگىنە ۇكپ-مەن بىرلەسىپ ءبىر اپتادا اتالعان ماسەلە بويىنشا ناقتى ۇسىنىستار ەنگىزۋ تاپسىرىلدى. بۇدان وزگە, قارجى مينيسترلىگىنە ءتيىستى مەملەكەتتىك ورگاندارمەن بىرلە­سىپ, بارلىق مەملەكەتتىك ساتىپ الۋلاردى جۇرگىزۋ كەزىندە وتاندىق ءونىمدى پاي­دالانۋ تۇرعىسىنان كونكۋرستىق قۇجات­تامانى تياناقتى تۇردە تەكسەرۋ تاپسى­رىلدى. بۇدان بولەك, ب.ساعىنتاەۆ كۆازي­مەملەكەتتىك سەكتوردىڭ ساتىپ الۋ جۇمىسىنا توقتالدى. ول بۇل ماسەلەدە بىرىڭعاي ساياساتتىڭ جوق ەكەنىن ايتىپ, ءبىر اپتالىق مەرزىمدە وسى كومپانيالارعا ارنالعان, ايقىندىق پەن قولجەتىمدىلىك ەسكەرىلگەن, ساتىپ الۋلاردىڭ بىرىڭعاي ەرەجەلەرى بويىنشا ورتاق تاسىلدەمە ازىرلەۋدى جۇكتەدى. سونىمەن قاتار, پرەمەر-مينيستر ينۆەستيتسيالار جانە دامۋ, قارجى مينيسترلىكتەرىنە ۇكپ جانە ۇلتتىق حولدينگتەرمەن بىرلە­سىپ, كۆازيمەملەكەتتىك سەكتور مەن جەر قوي­ناۋىن پايدالانۋشىلاردى قوسىپ, ءتيىس­تى دەرەكتەر بازاسىن بىرىكتىرە وتى­رىپ, ساتىپ الۋلار مەن وندىرۋشىلەر­دىڭ ءبىرىڭ­عاي ءىت-پلاتفورماسىن قۇرۋدى ءمىن­­دەت­تەدى. سونداي-اق, ينۆەستي­تسيا­لار جانە دامۋ, ەنەرگەتيكا مينيستر­لىك­­تەرىنە «سامۇرىق-قازىنا» قورى جانە اكىمدەرمەن بىرلەسىپ, ءاربىر ءىرى كاسىپ­­ورىن­مەن جۇمىس جۇرگىزىپ, جەرگى­لىكتى قامتۋ­دى ۇلعايتۋ بويىنشا ماقسات­تى ين­ديكاتوردى بەلگىلەۋ تاپسىرىلدى. جۇماداعى كەڭەيتىلگەن وتىرىستا مەملەكەت باسشىسى تاراپىنان مەم­­لەكەتتىك-جەكە مەنشىك ارىپتەستىگى تەتىك­تەرىن قولدانۋدىڭ تومەن قارقىن­دارىنا, اسىرەسە, وڭىرلەرگە قاتىستى دا سىن ايتىلعان بولاتىن. وسىعان باي­لانىستى پرەمەر-مينيستر ۇلتتىق ەكونوميكا مينيسترلىگىنە ءبىر ايدا پروتسەدۋرالاردى ودان ءارى جەڭىلدەتۋ بويىنشا جۇمىس جۇرگىزۋدى تاپسىردى. ءبىرىنشى توقساننىڭ سوڭىنا دەيىن ءتۇرلى سالالارداعى تيپتىك جوبالار ءتىزىمىن كەڭەيتۋ جانە وسى ماسەلە بويىنشا وڭىرلەرگە تولىق ادىستەمەلىك قولداۋ كورسەتۋ تاپسىرىلدى. ۇكىمەت باسشىسى, سونداي-اق, ەكسپورت جانە يمپورت جونىندەگى ۇلت­تىق كوم­پانيالار قۇرۋ ماسەلەسىن پىسىقتاۋدى جۇكتەدى. ب.ساعىنتاەۆ ينۆەستيتسيالار جانە دامۋ مينيسترلىگىنە سالالىق مي­نيستر­­­لىكتەرمەن جانە اكىمدىكتەرمەن بىرگە پرەزيدەنت مىسالعا كەلتىرگەن 72 نىساننىڭ ارقايسىسى بويىنشا پىسىقتاۋدى جانە سايكەس شارالار كەشەنىن ازىرلەۋدى تاپسىردى. سون­داي-اق, اتالعان مينيسترلىككە ءمۇد­دەلى مەملەكەتتىك ورگاندارمەن, اكىمدىكتەر­مەن جانە ۇلتتىق پالاتامەن بىرگە جاڭا جوبالاردى ىرىكتەۋ بويىنشا ءتيىمدى تاسىلدەردى ازىرلەۋ تاپسىرىلدى. بۇدان وزگە, پرەمەر-مينيستر ەكى اپتا­لىق مەرزىمدە ەكسپورت جانە يمپورت ءجونىن­دەگى ۇلتتىق كومپانيالار قۇرۋ بويىنشا ۇسىنىستار ەنگىزۋدى, سونداي-اق, سىرتقى ىستەر مينيسترلىگىمەن بىرگە ءبىزدىڭ ونىمدەردىڭ ەكسپورتىن شەت ەل نا­رىقتارىندا ىلگەرىلەتۋ بويىنشا ور­تاق جوسپاردى ازىرلەپ, بەكىتۋدى تاپسىردى. پرەمەر-مينيستر دەنساۋلىق ساق­تاۋ سالاسىنا قاتىستى دا بىرقاتار ماسە­لەلەردى قوزعاپ, مينيسترلىككە ناق­تى تاپسىرمالار جۇكتەدى. ۇكىمەت باس­شى­سىنىڭ ايتۋىنشا, دەنساۋلىق ساق­تاۋ سالاسىندا, ءبىرىنشى كەزەكتە, ۇزاق مەرزىمدىك نەگىزدە وتاندىق وندىرۋشىدەن ءدارى-دارمەك پەن مەديتسينالىق ماقسات­تاعى بۇيىمداردى ساتىپ الۋدى ۇلعاي­تۋ جونىندە ءتيىستى شارالار قابىلداۋ قاجەت, سونىمەن قاتار, ولاردى ساتىپ الۋ پرو­تسەدۋرالارىنىڭ ايقىندىعىن قام­تا­ماسىز ەتۋ كەرەك. سونىمەن قاتار, دۇرىس باعا بەلگىلەۋ ءۇشىن مەديتسينالىق تەحنيكانىڭ بىرىڭعاي نومەنكلاتۋراسىن قۇرۋ تاپسىرىلدى. مەديتسينالىق ساق­تان­دىرۋدىڭ مىندەتتى جۇيەسىن ەنگىزۋگە باسا نازار اۋدارۋ قاجەت. «ءبىلىم بەرۋ تۋرالى ايتار بولساق, جالپى, پرەزيدەنت اتالعان سالاداعى جاڭا تاسىلدەرگە قولداۋ ءبىلدىردى», دەدى ۇكىمەت باسشىسى. سونىمەن قاتار, ءبىلىم جانە عىلىم ءمينيسترى ە.ساعاديەۆكە حا­لىق اراسىندا 12 جىلدىق ءبىلىم بەرۋ جۇيەسىنە اۋىسۋ, ۇشتىلدىلىك جانە ۇبت-نىڭ جاڭا جۇيەسى جونىندە ساۋاتتى ءتۇسىندىرۋ جۇمىستارىن ۇيىمداستىرۋ تاپسىرىلدى. بۇل جۇمىسقا اقپارات جانە كوممۋنيكاتسيالار مينيسترلىگى دە اتسالىسۋى كەرەكتىگىن باسا ايتتى. كەڭەيتىلگەن وتىرىستا كەڭىنەن قوز­عال­عان ماسەلەنىڭ ءبىرى مەملەكەتتىك بيۋدجەتتى يگەرۋ ماسەلەسى بولاتىن. پرەمەر-مينيستر بيۋدجەت قاراجاتىن ۇنەمدى پايدالانۋ ماسەلەسىندە شىعىن­داردى ساپالى جانە بىرقالىپتى جوسپار­لاۋ قاجەت ەكەنىن اتاپ ءوتتى. وسىعان باي­لانىستى قارجى مينيستر­لىگىنە مەم­لەكەتتىك ورگاندار مەن اكىمدىكتەردىڭ جوسپارلارىن بەكىتۋ كەزىندە قاتاڭ پوزيتسيا ۇستانۋ قاجەتتىگىن ايتتى. دينارا بىتىكوۆا, «ەگەمەن قازاقستان»