«الماتى ارەنا» 10-شى التىندى سىيلادى

جۇمانى جۇپ التىنمەن ءتامامداپ, سەنبىدەگى جارىستاردان ۇلكەن ءۇمىت كۇتكەن ەدىك. بۇل سەنبىنىڭ دە جۇگى اۋىر, ويتكەنى ۋنيۆەرسيادانىڭ باس عيماراتى – «الماتى ارەنادا» مانەرلەپ سىرعاناۋدان باستى ۇمىتكەرىمىز دەنيس تەننىڭ ونەرىن تاماشالاۋ كۇتىپ تۇرعان...

«بۇيىرعان كەتپەيدى...» – 9-شى التىندى ءبارىبىر الدىق!

ۋىسىمىزدا تۇرعان 9-شى التىن مەدالدان قالاي ايىرىلىپ قالعانى­مىز تۋرالى وتكەن نومىرلەردەن حابار­دار وقىرمانعا ايتارىمىز, بۇيىرعان كەتپەيدى ەكەن. شاڭعىشىلار بۇل جولى ارالاس كوماندالىق سپرينتەرلىك جارىستا ناعىز شەبەرلىك تانىتتى! جارىس جولىنا اننا شەۆچەنكو مەن ولجاس كليمين شىققاندا-اق ءۇمىتتىڭ جەتەگىندەگى جانكۇيەردىڭ وي قۇشاعىندا قالعانى تەكتەن تەك ەمەس. ويتكەنى, بۇل اننا مەن ولجاسقا بەرىل­گەن ەڭ ءبىر تاماشا مۇمكىندىك بولا­تىن. اننا شەۆچەنكو – الماتى ۋني­ۆەرسياداسىندا قازاقستانعا ەڭ ال­عاشقى مەدالدى سىيلاعان سپورت­شى. كلاسسسيكالىق ستيلدە 5 شا­قى­رىمدىق قاشىقتىققا جۇگىر­گەن اننا ەكى مارتە دە قولا مەدال­عا قول جەتكىزگەن. رەسەيدىڭ شاڭعى­شى­لارى اننا نەچاەۆسكايا مەن ليليا ۆاسيلەۆا سول جولدا اننامىزدىڭ الدىن كەزەك-كەزەك كەس-كەستەپ, التىن­دى دا, كۇمىستى دە قولدان بەرمەدى. ەرلەر اراسىنداعى كلاسسيكالىق سپرينتەرلىك شاڭعىمەن جۇگىرۋدە ولجاس كليمينگە ساناۋلى سانتيمەتر­لەر جەتپەي قالىپ, ءتورتىنشى ورىنمەن جارىستى تامامداعان. مىنە, سوندىقتان دا بۇگىنگى ارالاس كو­مان­دالىق سپرينتەرلىك جارىستا بار ءمۇم­كىندىكتى قولدان كەلگەنشە پايدالانىپ قالۋدىڭ وڭتايى كەلىپ تۇردى. جۇپتىق جارىس بارشا قازاق­ستان­دىق جانكۇيەردىڭ ءۇمىتىن اقتاپ شىقتى. ۇزىن ءسوزدىڭ قىسقاسى, سول باسكەدە ەرەك­شە ونەر كورسەتكەن اننا شەۆ­چەن­كو مەن ولجاس كليمين ۇجىمى ەلىمىز­د­ىڭ قورجىنىنا 9-شى التىندى سالدى. اننا مەن ولجاستىڭ جارىس قورىتىندىسىنداعى كورسەتكىشى (18:23,48) ەڭ ۇزدىك دەپ سانالدى. فرانتسۋزدار ەكىنشى (18:26,67) ورىندى يەلەنسە, بۇل جولى رەسەيلىك شاڭعىشى جۇپ ءۇشىنشى ورىندا (18:29,50) قالىپ, قولا مەدالدى قاناعات تۇتتى. وكىنىشكە قاراي, قازاقستاندىق تاعى ءبىر جۇپ – ولگا ماندريكا مەن سەرگەي مالىشەۆ جۇبى التىنشى ورىندا (19:11,72) قالىپ قويدى.

دەنيس تەن قازاقستانعا 10-شى التىن مەدال سىيلادى

ىشىنە ارتىق-كەمسىز 12 مىڭ كورەر­مەن سىياتىن «الماتى ارەنا» مۇز ايدىندى سپورت سارايى حالىققا لىق تولدى. جارىس ءتورت جارىم ساعاتقا سوزىلدى. حالىقتىڭ سۇيىكتىسى ءارى ءۇمىتى – مانەرلەپ سىرعاناۋشى دەنيس تەن كەزەگى بويىنشا ايدىنعا ەڭ سوڭىنان, 24-ءشى بولىپ شىقتى. الەمنىڭ ءار بۇرىشىنان كەلگەن كونكيمەن مانەرلەپ سىرعاناۋشىلار بىرىنەن سوڭ ءبىرى ايدىنعا شىعىپ, ونەرىن ورتاعا سالدى. ناعىز مامان, ياكي سپورتتىڭ بۇل تۇرىنەن حابارى بار ادام بولماسا, كوپشىلىك كورەرمەن شىر اينالىپ سەكىرىپ, اق ايدىندا جۇلدىزشا اققان سپورتشىلاردىڭ بىلىكتىلىگىن سارالاپ بىلە المايتىن ەدى. ءبىر رەت قۇلاماسا دا, تومەننەن, بىرنەشە رەت سۇرىنسە دە بيىكتەن ورىن العان سپورتشىلاردىڭ شىنايى ونەرىن ءتۇسىنۋ دە قيىننىڭ قيىنى بولاتىن. بۇلايشا ءوز ويىمىزدى ورتاعا سالۋى­مىزعا قازاقستان نامىسىن جىرتۋشى ابزال­ راحىمعاليەۆتىڭ ايدىنعا العاش­قى توپپەن شىققان ءساتى سەبەپشى بولدى. قازاق سپورتشىنىڭ اتى اتالعان ساتتە «الماتى ارەنا» جانكۇيەردىڭ قيقۋىنان جارىلىپ كەتە جازدادى... شىنىداي جىل­تىراعان اق ايدىننىڭ ۇستىندە جۇلدىزداي اعىپ مانەردىڭ ون سان ءتۇرىن كورسەتكەن ابزالعا دەگەن جەر­لەس­تەرىنىڭ سونداعى قوشە­مەتىن سوزبەن ايتىپ جەتكىزۋ ءمۇم­كىن ەمەس ەدى. ابزال قاۋىر­سىن­داي جەڭىل كوتەرىلىپ, سان رەت شىر­كوبەلەك اينالىپ, ايدىننىڭ بەتىنە وتە جەڭىل قوناقتاپ جاتتى. ءمىن كورمەگەندەيمىز! الايدا, مانەرلەپ سىرعاناۋدىڭ اقىرعى قورىتىندىسىندا تورەشىلەر ءبىزدىڭ ابزالعا 7-ءشى ورىن لايىق دەپ تاپتى. ەكى جارىستىڭ قورىتىندىسى بويىنشا ول 12-ورىنعا تابان تىرەدى. مۇز سارايىنداعى ارگەنتي­نالىق, كورەيالىق, يتاليالىق مانەرلەپ سىرعاناۋشىلاردان سوڭ ايدىنعا شىققان شۆەد الەكساندر مايوروۆ پەن جاپون كەيدزي تاناكانىڭ ونەرىن سۇيسىنە تاماشالاپ, جاقسى ۇپاي بولىسكەندەرىنە كۋا بولعان كورەرمەننىڭ دەنيس تەن ايدىنعا شىققاندا جارىلا داۋىستاپ, قىزىنا قولداۋ كورسەتۋىنىڭ سىرى بار. سوڭعى ەكى سپورتشىنىڭ وتە جوعارى العان باعالارىنا قاراپ, كورەرمەن دجاكوما ءپۋچچينيدىڭ مۇڭلى سازدى مۋزىكاسىنا قۇلاق ءتۇرىپ تىنا قالدى. ىشتەي دەنيستىڭ قاتەلەسپەۋىن تىلەپ, مازاسىز كۇي كەشتى. دەنيس تەننىڭ قۇلاشىن جازىپ كەلىپ كوككە كوتەرىلگەن ساتىندە ىشقىنا ايقايعا باسادى دا, ايدىنعا توپ ەتكەندە قايتادان تىنا قالادى. وسىلايشا ارادا ءتورت جارىم مينۋتتىڭ قالاي وتكەنى دە بىلىنبەدى... مامانداردىڭ ساراپتاماسىنا سەنەمىز. زالداعى شۋ دامىلداعان ساتتە تورەشىلەر ەركىن باعدار­لامادا دەنيس تەن 172,06 بالل جينا­دى دەگەن ۇيعا­رىم جاسادى. الداعى قىسقا باعدارلامامەن ەكەۋىن قوسقاندا قازاق سپورتشىسى 266,97 بالل جيناپ, التىن مەدال الدى. قازاقستان قۇرماسىنىڭ 10-شى التىن مەدالى! كەيدزي كۇمىسپەن كۇپتەلسە, الەكساندر قولامەن ءۇشىنشى ورىنعا تابان تىرەدى. جۋرناليستەرگە دەرەۋ ارادا بەرگەن سۇحباتىندا دەنيس تۋعان قالاسى «الماتىداعى بۇل التىندى جارىس 2018 جىلعى كورەيادا وتەتىن قىسقى وليمپيادا ال­دىنداعى ەڭ اۋىر جاتتىعۋداي بولدى», دەپ اعىنان جارىلدى. بارشا قاۋىم «نيەتىڭە جەت, باۋىرىم!», دەگەن تىلەك ايتتى چەمپيونعا. * * * جەكسەنبىدەگى باستى جارىس بياتلونشىلار اراسىنداعى ارالاس ەستافەتادان باستالعان. جۇلدەگەر گالينا ۆيشنەۆسكايا نىسانا كوزدەۋدەن ءۇش رەت قاتەلەسكەنىمەن, ارىپتەستەرىنەن 30 سەكۋند الدا كەتىپ قالعان. داريا ۋسانوۆا دا 20 سەكۋند الدا ەدى... ءۇشىنشى قاشىقتىقتا ۆاسيلي پودكورىتوۆ 4 رەت قاتەلەسىپ, رەسەيلىك سپورتشى ەكى اراداعى ۋاقىت كورسەتكىشىن 15 سەكۋندقا دەيىن قىسقارتتى. اقتىق قاشىقتىقتا انتون پانتوۆ ويلاعانداي شەبەرلىك كورسەتە الماي, اقىر سوڭىندا قازاقستان بياتلونشىلارى التىندى رەسەي كومانداسىنا قولدان بەرىپ قويىپ, كۇمىس مەدالدى قاناعات تۇتتى. ۋكراينا ءۇشىنشى ورىندا قالدى. * * * شورت-ترەك قازاقستان جان­كۇيەر­لەرىنىڭ اسىعا كۇتكەن سپورت ويىندارىنىڭ بىرەگەيى. جۇلدىزداي اققان جىگىتتەرىمىز وسىندا. قىزدارىمىز دا كوشتەن قالىپ جاتقان جوق. بالۋان شولاق اتىنداعى سپورت سارايىندا وتكەن ءبىرىنشى كۇنگى 1500 مەترلىك باسەكەدە شورت-ترەكشى الماتىلىق نۇر­بەر­گەن جۇماعازيەۆ قولا جۇلدەنى يەلەندى. – الدا ەكى كۇن بار, ءبىزدىڭ جىگىت­تەر التىن الامىز دەگەن ۇمىتتە, – دەدى جۇماعازيەۆ. – 1500 مەتر­لىك قاشىقتىقتا كورەيالىق سپورتشىلار ءبىرىنشى ورىندى ەشكىمگە بەرگەن ەمەس. ەسەسىنە 1000 مەترلىك, 500 مەترلىك قاشىقتىقتا ءبىزدىڭ جۇلدىزىمىز جانۋى ابدەن مۇمكىن... باتىل ايتىلعان ءسوز. دەمەك, التىن – الدىمىزدا. بۇگىنگە دەيىن كوماندالىق تىزىمدە بارلىعى 23 مەدالمەن (ونىڭ 10-ى التىن) رەسەيلىكتەردەن سوڭ ەكىنشى ورىندا كەلەمىز. تالعات ءسۇيىنباي, «ەگەمەن قازاقستان» الماتى