بۇگىن اياگوز اۋدانىندا قازاقستان رەسپۋبليكاسىنىڭ ەرەسەكتەر اراسىندا بۇركىتشىلەردىڭ ءحى رەسپۋبليكالىق چەمپيوناتى باستالدى. ەكى كۇنگە سوزىلاتىن قۇسبەگىلەردىڭ سايىسىنا ەلىمىزدىڭ 9 وبلىسى مەن 1 قالاسىنان 39 بۇركىت پەن 6 قارشىعا, ۇزىن سانى 45 قۇس اكەلىنگەن.
ايتا كەتەيىك, بۇعان دەيىنگى ەل چەمپيوناتتارىندا مۇنداي كورسەتكىش تىركەلمەگەن.
«بۇل – رەكورد. تاماشا ناتيجە. بۇدان بۇرىنعى بىرىنشىلىكتەردە بۇركىتشىلەر سانى 30-دان اسپايتىن. بابالارىمىزدان قالعان ۇلتتىق ونەردىڭ جىل سايىن قانات جايىپ كەلە جاتقانى قۋانتادى» دەيدى ءدۇبىرلى دودانى ۇيىمداستىرۋشىلاردىڭ ءبىرى تاتتىمبەت كاپ ۇلى.
وسىمەن ەكىنشى جىل قاتارىنان شىعىس قازاقستاندا وتكىزىلىپ وتىرعان بۇركىتشىلەر باسەكەسىنىڭ العاشقى كۇنىندە قىراننىڭ بابىن بايقايتىن قۇستى قولعا شاقىرۋ, ەركىن ۇشىرۋ, شىرعا سالۋ سەكىلدى سايىستار وتكىزىلىپ, جينالعان جۇرتتىڭ دەلەبەسىن قوزدىردى. ناعىز قىزىق ەرتەڭ, جارىستىڭ ەكىنشى كۇنىندە بولاتىن سەكىلدى. سەبەبى, بۇركىتتەر مەن قارشىعالاردى بۇل كۇنى قويان مەن تۇلكىگە, ءتىپتى قاسقىرعا ءتۇسىرۋ جوسپارلانىپ وتىر.
اياگوز قالاسىنىڭ ىرگەسىندەگى اتشاباردا شىمىلدىعى تۇرىلگەن ساياتشىلار سايىسىنا ۇلتتىق سپورت تۇرلەرى قاۋىمداستىعىنىڭ ءبىرىنشى ۆيتسە-پرەزيدەنتى ەرلەن وسپانوۆ, ۇلتتىق سپورتتان مەملەكەتتىك جاتتىقتىرۋشى رامازان ساتتىباەۆ, الماتى وبلىسىنىڭ «قىران» فەدەراتسياسىنىڭ ديرەكتورى باعدات مۇپتەكەقىزى قۇرمەتتى قوناق رەتىندە قاتىستى. بەلگىلى ءانشى توقتار سەرىكوۆ تە تۋعان جەرىندەگى تارتىستى كورۋگە الماتىدان وتباسىمەن بىرگە ارنايى كەلىپتى.
«اياگوزدە سالبۋرىن بولادى, بۇركىتشىلەر سايىسى وتەدى دەگەندە ۇيدە جاتا المادىم, سالىپ ۇرىپ جەتكەن جايىم بار. ايازعا, بورانعا قاراماستان قانشاما حالىقتىڭ جينالعانىن كورىپ قۋانىپ وتىرمىن. توعىزداعى ۇلىمدى سوناۋ الماتىدان ارنايى ەرتىپ كەلدىم. بۇركىتتى جاقسى كورەدى. «بۇركىتشى بولعىم كەلەدى, قارشىعا الىپ بەر» دەيدى. قۇداي قالاسا, ۇلىمدى ۇلتىمىزدىڭ وسىناۋ ۇلى ونەرىنە باۋلىسام دەگەن ويىم بار», – دەيدى ءانشى.
سايىسقا قاتىسۋشىلاردىڭ جاس جاعىنان ەڭ ۇلكەنى – الماتى وبلىسىنىڭ سارقان قالاسىنان كەلگەن 75 جاستاعى تالىمبەك ايسابەك ۇلى اقساقال. ەڭ جاسى – جامبىل وبلىسى مەركى اۋدانىنىڭ ءۇمىتىن ۇكىلەپ جەتكەن 17 جاستاعى باباجان باقداۋلەت.
(بۇركىتشىلەر سايىسى تۋرالى تولىق ماتەريالدى گازەتىمىزدىڭ الداعى سانىنان وقيتىن بولاسىزدار)
ازامات قاسىم, «ەگەمەن قازاقستان»
شىعىس قازاقستان وبلىسى
سۋرەتتەر اۆتوردىكى
