ۇكىمەت باسشىسى سۇلەيمەنوۆكە بيزنەسكە جۇكتەمەنىڭ نەلىكتەن كوبەيگەنىن انىقتاۋدى تاپسىردى

ۇلتتىق ەكونوميكا مينيسترلىگى بيزنەسكە جۇكتەمەنىڭ نەلىكتەن ارتقاندىعىن انىقتاۋى ءتيىس. بۇل تۋرالى بۇگىن ۇكىمەتتىڭ كەزەكتەن تىس وتىرىسىندا پرەمەر-مينيستر باقىتجان ساعىنتاەۆ ءمالىم ەتتى, دەپ حابارلايدى قازاقپارات. «قۇرمەتتى ارىپتەستەر! كەشەگى وزدەرىڭىز قاتىسقان ۇكىمەتتىڭ كەڭەيتىلگەن وتىرىسىندا ەلباسى تارابىنان بىرقاتار سىن-ەسكەرتپە ايتىلىپ, ناقتى تاپسىرما  بەرىلدى. ءبىز بۇگىن سول تاپسىرمالاردى ىسكە اسىرۋ ءۇشىن باعىت-باعدارىمىزدى ايقىنداپ,  ءتيىستى شەشىمدەردى قابىلداۋىمىز كەرەك. ەڭ الدىمەن مەملەكەت باسشىسى دامۋدىڭ ۇزاقمەرزىمدى كەزەڭىندە 5 پايىزدىق ءوسىمدى قامتاماسىز ەتۋدى  تاپسىردى. قازاقستاننىڭ ۇلتتىق تەحنولوگيالىق باستاماسى دەپ اتالاتىن 2025 جىلعا دەيىنگى ستراتەگيالىق دامۋ  جوسپارىنىڭ باستى ماقساتى وسى بولۋى ءتيىس. ەلباسى اتاپ كورسەتكەندەي, بۇعان جەتۋگە ەكونوميكامىزدىڭ مۇمكىندىگى دە, الەۋەتى دە جەتكىلىكتى», - دەدى وتىرىستى اشقان ۇكىمەت باسشىسى. وسى ورايدا ول بيزنەس احۋالدى جاقسارتۋ ءۇشىن  قابىلداناتىن شارالارعا توقتالدى. مەملەكەت باسشىسى اتاپ وتكەندەي, بۇل باعىتتا از جۇمىس اتقارىلعان جوق. بىراق, بيزنەس جۇكتەمە ارتىپ كەلەدى. ءبىر جاعىنان ءبىز بيزنەس جۇرگىزۋدى جاقسارتۋ ءۇشىن زاڭناماعا وزگەرىستەر ەنگىزىپ, پروتسەدۋرالاردى جەڭىلدەتۋدەمىز. سوڭعى 5 جىلدا رۇقات بەرۋ قۇجاتتارىن 3,2 ەسە قىسقارتتىق. ەكىنشى جاعىنان ءدال وسى كەزەڭدە بيزنەستىڭ مۇددەسىنە قاتىستى نورماتيۆتىك-قۇقىقتىق اكتىلەر كەرىسىنشە 1,7 ەسەگە ارتىپ كەتكەن. ونىڭ 80 پايىزى اكىمدىكتەر مەن ءماسليحاتتاردىڭ اكتىلەرى.  ۇلتتىق ەكونوميكا مينيسترلىگىنە   بۇل ماسەلەنىڭ ءمان-جايىن انىقتاۋدى تاپسىرامىن», - ساعىنتاەۆ.