ەۆگەنيگە ەل ريزا

تەمىرتاۋ قالاسىنىڭ قارا­پايىم تۇرعىنى مانەرلەپ سىر­عاناۋ مەن حوككەي جانكۇيەرلەرى ءۇشىن 8-ءشى شاعىن اۋدانىنا جاڭادان مۇز ايدىنىن قۇيدى. سىرعاناۋشىلارعا تەگىن ۇيىم­داستىرىلعان مۇز ايدىنىنا قازىردىڭ وزىندە كەلۋشىلەردىڭ قارا­سى قالىڭ. بۇل – بۇگىندە قالا تۇرعىندا­رىنىڭ اۋزىندا جۇرگەن ەۆگەني پەستوۆتىڭ مۇز ايدىنىن قۇيۋداعى العاشقى جۇمىسى ەكەن. – نە ىستەسەڭ دە قايىرىمدى جانە پايدالى ءىس اتقارعان دۇرىس. بۇل جەر جاس سپورتشىلاردىڭ وسى قىستا باس قوساتىن جاڭا كەزدەسۋ ورنىنا اينالدى. تۇرعىندار بۇكىل وتباسىمەن وسىندا كەلىپ, دەمالىستارىن قىزىقتى وتكىزەدى. كۇن سايىن وسى جەردە اۋلا حوككەي كوماندالارى ويىندارىن وتكىزىپ, شەبەرلىكتەرىن شىڭداۋدا. بۇدان باسقا, قاردان سىرعاناق توبە جاساۋ قولعا الىندى. بالالار دا, اتا-انالار دا ءدان ريزا. كورت قاراڭعى تۇسكەنشە عانا جۇمىس ىستەپ تۇر. ويتكەنى, جارىق شامدارى جوق. الداعى ۋاقىتتا جارىقتاندىرۋ, قوقىس سالاتىن جاشىكتەردى ورناتۋ جانە ورىندىقتار قويۋ قاجەت. قاقپالارعا تور ورناتىپ, كاسىبي تۇردە اۋلا چەمپيوناتتارىن وتكىزۋ ويىمىزدا بار. بارلىعىمىز كۇش بىرىكتىرسەك, ول دا قولىمىزدان كەلەر, – دەيدى قالا تۇرعىنى ەۆگەني پەستوۆ. ميراس اسان, «ەگەمەن قازاقستان» قاراعاندى وبلىسى, تەمىرتاۋ قالاسى