كەشە 4-ءشى التىن مەدالدى قازاقستان قۇراماسىنا قارسىلاستارىنىڭ قولىنان ج ۇلىپ العان التىن قىز يۋليا گالىشەۆاعا مىنەزدەمە بەرگەنىمىز ەسىمىزدە. وقىرماننىڭ دا ەسىندە بولار! سوندا يۋليانىڭ كوزدەگەنى كوز ۇشىنداعى بيىكتەر ەكەنىن بىلگەندەي ايتقان ەدىك. ويتكەنى, جاستار اراسىنداعى بارشا جارىستى بىلاي قويعاندا, 2010 جانە 2014 جىلدارى ەكى بىردەي قىسقى وليمپيالىق ويىنداردىڭ وتىنا «سۇڭگىپ» شىققان قازاقستاندىق فريستايل-موگۋلشى شىن مانىندە ءوزىن سونداي سالقىنقاندى ۇستادى.
بۇگىنگى وتكەن جۇپتاسىپ ونەر كورسەتۋدە الەم چەمپيوناتىنىڭ (2015 ج.) چەمپيونى, دۇنيەجۇزىلىك ۋنيۆەرسيادانىڭ ەكى دۇركىن (2015, 2017 جج.) چەمپيونى يۋليا گالىشەۆانىڭ رەسەيلىك ارىپتەسىنە قاراعاندا جۇلدىزى جوعارى بولدى. سۇلۋ دا سىمباتتى سپورتشى قىزدىڭ كوركەم دە كەربەز ونەرىنە تورەشىلەر ءبىر اۋىزدان جوعارى باعا قويدى. جۇپتاسىپ تەڭ جارىسقان فريستايل-موگۋلشىلار كوز ىلەسپەس جىلدامدىقپەن جارىسىپ, اسپاندا دا قاۋىرسىنشا قالىقتاي اينالىپ, بارشا كورەمەندەرىن تامساندىردى.
الايدا, ءيا, الايدا... الاتاۋدىڭ قويناۋىندا الماس قىلىشتاي جارقىراپ تۇرعان شىمبۇلاق شاتقالى يۋليا قىزدى تاعى دا ءبىر جەبەپ جىبەردى. يۋليا گالىشەۆا – چەمپيون!
قازاقتا جەتى سانى كيەلى, قاسيەتى قانداي!!! سول جەتىنشى التىن مەدالدى يۋليا قازاقستاننىڭ قورجىنىنا ەش قينالماستان اكەلىپ سالدى. جارىس باستالعان العاشقى كۇننەن قىر سوڭىنان قالماي قاباتتاسىپ كەلە جاتقان رەسەيلىك سپورتشى ەليزاۆەتا بەزگودوۆوي بۇل جولى كوش بويى ارتتا قالدى. تورەشىلەر قارسىلاستارعا 17:8 دەگەن باعا قويدى.
يۋليانىڭ جەڭىسىن كوزبەن كورگەن دميتري رەيحەردتىڭ دەلەبەسى قوزبادى دەپ قالاي ايتامىز!؟ ايتپەسە, وسى دميتري كەشەگى كۇنى قازاقستانعا اسا قىمبات 5-ءشى التىن مەدالدى الىپ تۇرىپ, «بۇل مەنىڭ سوڭعى ۋنيۆەرسيادام, وسى التىنعا دا قاناعات», دەگەندەي بولىپ ەدى.
...الاتاۋدىڭ ەتەگىندە قىرانداي قايتا سىلكىنگەن دميتري رەيحەرد تاعى دا ايدى اسپانعا شىعاردى. ديمانىڭ كەشەگى سوزىنە «يلانعان» كورەرمەن بار ءۇمىتىن ونى ۇزەڭگىلەس ارىپتەسى پاۆەل كولماكوۆقا ارتىپ وتىرعان. ەرلەر اراسىنداعى جۇپتاسىپ جارىسۋدا فريستايل-موگۋلشى پاۆەل كولماكوۆ تا جۇرتتى ۇياتقا قالدىرمادى. جۇلدەلى ءۇشىنشى ورىنعا تابان تىرەپ, قولا مەدال يەلەندى.
سونىمەن, XXVIII ۋنيۆەرسيادادا 28 جاستاعى وسكەمەندىك دميتري رەيحەرد فينالدىق باسەكەگە شارشاماي جەتىپ, ەكىنشى مارتە التىن مەدالدى موينىنا تاقتى. بۇل – قازاقستاندىق سپورتشىلاردىڭ ءححVىىى دۇنيەجۇزىلىك قىسقى ۋنيۆەرسياداداعى 8-ءشى التىن مەدالى!
9-شى التىن مەدال قالتادا ەدى, اتتەڭ... گاليا!
العاشقى سايىستاردا كوزگە تۇسۋگە قىسىلا-قىسىلا ءجۇرىپ وتانداستارىنا كۇمىس مەدال سىيلاعان گالينا ۆيشنەۆسكايا ەكىنشى سايىستا ادام تانىماستاي وزگەردى. العاشقى التىندى دۇركىرەتىپ الىپ كەلگەن الينا رايكوۆانىڭ ءوزىن 12-ءشى ورىندا قالدىرىپ, ۋنيۆەرسيادا جەڭىمپازى اتاندى ەمەس پە؟! ءۇشىنشى كەزەك. پاسيۋت. ءبىر-بىرىنە ءىلىنىسىپ قۇيرىق تىستەسە جۇگىرگەن بياتلونشىلار اراسىنان سۋىرىلىپ العا شىققان مەرگەن قىز گالينامىز ءا دەگەننەن-اق كورسەتكىش بويىنشا 23 سەكۋند العا شىقتى. ءبىرىنشى شەپتە جاتا قالىپ وق اتقاندا دا ءمۇلت كەتپەدى. تاماشا! ءبارىن دە ءوز كوزىمەن كورىپ, قۋانىشىن جاسىرا الماي «ءيا, ءسات!», دەپ اق جول تىلەپ وتىرعان كورەرمەن گالينانىڭ ۆينتوۆكا ۇستاعان ۋىسىنان التىن مەدال كورگەندەي سەزىمدە جەلپىنىپ وتىردى. 10 شاقىرىمدىق قاشىقتىقتاعى كەلەسى شەپكە كەلگەن گالينا ۆيشنەۆسكايا رەسەيلىك ارىپتەسى لاريسا كۋكلينادان 1 مينۋت 32 سەكۋند (!) الدا كەلە جاتتى. ۆينتوۆكاسىن كەزەنىپ تۇرا قالعان گالينا ءدال وسى جەردە بۇلدىرەدى دەپ كىم ويلاعان!؟..
گالينا مىلتىعىن كەزەنىپ تۇرا قالماي, جارىس شارتى بويىنشا جاتا قالىپ نىسانانى كوزدەۋى ءتيىس ەدى. وتە ساق وتىرعان تورەشىلەر بۇگىنگە دەيىن التىن دا, كۇمىس تە الىپ ۇلگەرگەن مارتەبەلى سپورتشىمىزدى ءدال وسى جەردەن جارىستان شىعاردى دا تاستادى.
ءبارى دە كەش. رەت سانى جاعىنان 9-شى التىنىمىز وسىلايشا گالينانىڭ قولىنان سۋسىپ ءتۇستى. وتە وكىنىشتى!
الماتى ۋنيۆەرسياداسىن گالينا ۆيشنەۆسكايا ءبىر التىن, ءبىر كۇمىس مەدالمەن مەرزىمىنەن بۇرىن اياقتادى.
جالپى بياتلونداعى پاسيۋت – ءبىر-بىرىنە ىلەسە جۇگىرەتىن سپورت ءتۇرى ومىرگە كەش كەلگەنىنە قاراماستان, عالامدىق جارىستاردا ءوز ورنىن تاپقان. گالينانىڭ بۇگىنگى قاتەلىگىنە كۇيىنگەن ۆانكۋۆەر قىسقى وليمياداسىنىڭ كۇمىس جۇلدەگەرى ەلەنا حرۋستالەۆادان بولعان وقيعاعا ساراپتاما بەرۋىن وتىنگەن ەدىك.
– ءبىرىنشى شەپتەن وزدەرىڭىز دە كۋا بولدىڭىزدار, گالينا قينالماي ءارى وتە جەڭىل ءوتتى, – دەدى ەلەنا. – جۇگىرىسىندە دە ءمىن جوق. اتۋى دا جامان بولعان جوق. بۇل جارىستىڭ ءبىر قيىندىعى سول – ءبىر جاتىپ اتىپ, ءبىر تۇرىپ اتۋ كەرەك. وسى ارادا گالينا ءوزىن-ءوزىن ۇستاي الماي قالدى. شاتاستى. جاتتىعۋ ساتىندە دە شاتاسىپ جاتاتىنىمىز بار, سول قايتالاندى. پاسيۋت پەن ماسس-ستارتتىڭ ەرەكشەلىگى دە سوندا. امال قانشا, وتە وكىنشتى-اق...
جارىستار جالعاسۋدا.
مۇز ايدىنىنا مانەرلەپ سىرعاناۋشىلارىمىز شىقتى...
الماتى
باقتيار تايجان,
تالعات ءسۇيىنباي,
«ەگەمەن قازاقستان»
