ەلباسى تاسماعامبەتوۆتى نە ءۇشىن باسقا قىزمەتكە تاعايىنداعانىن ءتۇسىندىردى

پرەمەر-ءمينيستردىڭ ورىنباسارى يمانعالي تاسماعامبەتوۆ قازاقستاننىڭ رەسەيدەگى ەلشىسى بولىپ تاعايىندالدى, دەپ جازادى 24.kz. بۇل قىزمەتكە تاسماعامبەتوۆتىڭ ءوزى سۇرانعاندىقتان, ەلباسى نۇرسۇلتان نازارباەۆ وسىنداي شەشىم قابىلداپ وتىر. مەملەكەت باسشىسى وسىعان بايلانىستى مالىمدەمە جاساپ, وندا دەنساۋلىق ساقتاۋ جانە الەۋمەتتىك دامۋ مينيسترلىگىن نەلىكتەن ءبولىپ, قايتا قۇرعانىن دا ءتۇسىندىردى. "ۇكىمەتتىڭ كەڭەيتىلگەن وتە ماڭىزدى جيىنى ءوتتى. اكىمدەر قاتىستى. جاساپ جاتقان شارۋالارى بەلگىلى. ەكى ۇلكەن ماسەلە. ءبىرىنشىسى – ساياسي رەفورمالار, كونستيتۋتسياعا وزگەرىستەر ەنگىزۋ. ەكىنشىسى – قازاقcتاننىڭ ءۇشىنشى جاڭعىرۋى دەگەن ۇلكەن جولداۋ. وسىعان بايلانىستى مالىمدەيىن, كادر ماسەلەلەرىندە ءبىراز وزگەرىستەر جاسادىق. وزدەرىڭىز بىلەسىزدەر. «بايتەرەك» ۇجىمىندا جاسالىپ جاتقان تەكسەرىس ماسەلەسىنە قاتىستى ەكونوميكا ءمينيسترى جۇمىستان بوساتىلدى. تيمۋر سۇلەيمەنوۆ دەگەن ازامات ونىڭ ورنىنا مينيستر بولىپ تاعايىندالدى. ساۋاتتى, تاجىريبەلى. ماسكەۋدە جۇمىس ىستەپ كەلدى. سول مينيسترلىكتىڭ ورىنباسارى بولعان. مەنىڭشە, دايىندىعى جاقسى بولادى, دەپ تاعى دا سەنىم ارتامىز. ەكىنشىدەن, ەكى مينيسترلىكتى اجىراتىپ, دەنساۋلىق ساقتاۋ مينيسترلىگىن جەكەشە قۇرعان سەبەبىمىز, دەنساۋلىق ساقتاۋداعى ساقتاندىرۋ ماسەلەسىندە كوپ جۇمىستار بار. حالىققا سونى ءتۇسىندىرۋ كەرەك جانە سونى ىسكە اسىرۋ كەرەك. بۇل حالىققا قاجەت. دەنساۋلىق جۇيەسىنە وتە قاجەت ماسەلە. ءبىرتانوۆ دەگەن وتە ساۋاتتى ازامات. امەريكادا وقىپ كەلگەن. نازارباەۆ ۋنيۆەرسيتەتىندە جۇمىس ىستەگەن. سول مينيسترلىكتىڭ ورىنباسارى بولدى. جۇمىستى بىلەدى, اتقارادى دەپ سەنەمىن. ۇشىنشىدەن, مەن ماسكەۋدەگى قازاقستاننىڭ ەلشىسىن تاعايىندادىم. ول ەلشى يمانعالي تاسماعامبەتوۆ بولاتىن بولدى. بىرىنشىدەن, ءبىز ءۇشىن رەسەي وتە ۇلكەن كورشى, ارىپتەس, ەكونوميكا, ساياسات جاعىنان وتە جاقىن مەملەكەت. ول جەرگە وتە بەلدى, تاجىريبەلى, سالماقتى, قازاقستان مەن رەسەيدىڭ اراسىنداعى جاعدايدى بىلەتىن ادام بولعاننان كەيىن وسىنداي شەشىم قابىلدادىم. ەكىنشى قابىلداعان سەبەبىم, تاسماعامبەتوۆتىڭ ءوزىنىڭ سۇراۋى سولاي بولدى. ءوزىنىڭ ويى, كوڭىلى. سول جاقتا ىستەپ كەلەمىن دەپ, مەنەن سۇراعاننان كەيىن ونى دا ەسكەرىپ, ەكى جاعىنان دا تۋرا كەلەتىن بولعاننان كەيىن تاعايىندادىم. پرەمەر-مينيستر ورىنباسارلارىنىڭ از بولعانى ءجون. مينيسترلەر ءوز شارۋاسىن ءبىتىرۋ كەرەك ەشكىمگە سىلتەمەي, ەشكىمگە سۇيەنبەي. بەرگەن ماسەلەنى شەشىپ, وزدەرى جاۋاپ بەرۋ كەرەك", - دەدى  نۇرسۇلتان نازارباەۆ.