انگليانىڭ «ۆەست حەم», «سۋونسي», «چەلسي», «مانچەستەر سيتي», سونداي-اق امەريكانىڭ «نيۋ-يورك سيتي» كلۋبتارىندا ويناعان فرەنك لەمپارد فۋتبولداعى عۇمىرىن اياقتادى. بۇل تۋرالى eurosport.ru حابارلادى.
«فۋتبولدا عاجايىپقا تولى 21 جىلىمدى وتكىزدىم. بىراق ەندىگى مانسابىمدى اياقتاۋ تۋرالى شەشىم قابىلداپ وتىرمىن. جاسىم 38-گە كەلسە دە, ماعان بىرقاتار ۇسىنىستار كەلىپ ءتۇستى, بىراق ءومىرىمنىڭ جاڭا ءبىر كەزەڭىنە قادام باسۋدى ءجون كورىپ وتىرمىن.
فۋتبولدا ءبىراز كۋبوكتار ۇتىپ العانىم, انگليا قۇراماسىنىڭ ساپىندا 100-دەن استام ماتچ وتكىزگەنىم, مانسابىمدا 300-دەن استام گول سوققانىم ءۇشىن قاتتى قۋانامىن. مۇنداي جەتىستىكتەرگە جەتۋىمە دوستارىم, جاقىندارىم, اتا-انام ۇلكەن كومەگىن تيگىزدى. ولارعا العىسىم شەكسىز. فۋتبولدا مەنى جاتتىقتىرعان ءاربىر جاتتىقتىرۋشىم مەنى جاڭا ءبىر دەڭگەيگە شىعارىپ وتىردى. ولاردىڭ ورنى مەن ءۇشىن ەرەكشە.
سونىمەن قاتار, ويناعان كلۋبتارىما دا شەكسىز ريزامىن. ەڭ ءبىرىنشى 1996 جىلى العاش رەت الاڭعا شىعۋىما سەپتىگىن تيگىزگەن «ۆەست حەمگە» قارىزدارمىن. ال سوڭعى جىلدارى «مانچەستەر سيتي» مەن «نيۋ-يورك سيتي» كوماندالارىندا فۋتبولدان وزگەشە ءبىر ءلاززات الدىم.
ارينە, جۇرەگىمنىڭ باسىم بولىگى «چەلسيگە» تيەسىلى. مۇندا ەستەن كەتپەس ون ءۇش جىلىمدى وتكىزدىم. ارىپتەستەرىممەن بىرگە جەتكەن جەڭىستەرىمدى ەشقاشان ۇمىتپاسپىن. ال جانكۇيەرلەردىڭ ماعان, كوماندامىزعا كورسەتكەن قولداۋىنا باعا جەتپەيدى.
ەندى ءومىرىمدى باسقا ارناعا بۇراتىن مەزگىل جەتتى. جاتتىقتىرۋشى رەتىندە سىناقتان ءوتۋ مۇمكىندىگىن بەرىپ وتىرعان انگليا فۋتبول قاۋىمداستىعىنا العىسىمدى بىلدىرەمىن», – دەپ جازدى لەمپارد.
The Times مالىمەتى بويىنشا انگليا فۋتبول قاۋىمداستىعى وعان جاستار كومانداسىن جاتتىقتىرۋ مۇمكىندىگىن ۇسىنىپ وتىر. ال «چەلسي» كومانداسى ءوز كەزەگىندە جاتتىقتىرۋشىلىق ءارى ەلشىلىك قىزمەت ۇسىنباق.
ايتا كەتەيىك, فرەنك لەمپارد ءتورت دۇركىن انگليا چەمپيونى اتانىپ, ءتورت مارتە ەل كۋبوگىندا جەڭىسكە جەتكەن. ەكى رەتتەن ليگا كۋبوگى مەن انگليا سۋپەركۋبوگىن ۇتقان. سونىمەن قاتار, چەمپيوندار ليگاسى مەن ەۋروپا ليگاسىندا توپ جارعان.
