2017-2019 جىلدارى قاراعاندىلىق جەتىم بالالارعا 213 پاتەر بەرىلەدى

2017-2019 جىلدارى قاراعاندىلىق جەتىم بالالارعا 213 پاتەر بەرىلەدى, دەپ حابارلادى وبلىس اكىمدىگىنىڭ ءباسپاسوز قىزمەتى. «بۇگىندە وبلىستا جەتىم بالالارعا ارنالعان 25 ۇيىم جۇمىس ىستەپ تۇر. 1274 ادام مەملەكەت قامقورلىعىنا الىنعان, ولاردىڭ 262 جەتىم بالالار. اتا-انا قاراۋىنسىز قالعان 1012 بالا بار. اتا-انا قامورلىعىنسىز قالعان بالالاردى الەۋمەتتەندىرۋ ماقساتىندا كەشەندى شارالار اتقارىلۋدا. بۇل شارالاردىڭ باستى مىندەتتەرىنىڭ ءبىرى – جەتىمدەردى باسپانامەن قامتاماسىز ەتۋ», - دەلىنگەن حابارلامادا. 2014 جانە 2016 جىلدار ارالىعىندا 510 پاتەر بولىنگەن, ولاردىڭ 314 نەمەسە 62% مەملەكەتتىك تۇرعىن ءۇي قورىنان بولىنسە, باسقاسى «ەڭبەكتى جول كارتاسى -2020», «اۋدانداردى دامىتۋ 2020», «قولجەتىمدى باسپانا – 2020» باعدارلامالارى اياسىندا بولىنگەن. جالپى وسى كورسەتىلگەن ۋاقىت ىشىندە 194 پاتەر بولىنبەي قالدى. بۇل تەمىرتاۋ, بالقاش, جەزقازعان, شاحتينسك, نۇرا, شەت, قارقارالى, اباي, جاڭاارقا, ۇلىتاۋ, اقتوعاۋ اۋداندارىنداعى جۇمىس كولەمىنىڭ جەتكىلىكتى ورىندالماۋى سالدارىنان بولعان. قاراعاندى اكىمدىگى جانىنداعى كامەلەت جاسىنا تولماعاندار ءىسى جونىندەگى كوميسسيا وتىرىسىنىڭ حاتتامالىق تاپسىرماسىنا ساي, جاستار ءىسى جونىندەگى باسقارما تاراپىنان جەتىم بالالاردى جانە اتا-انا قامقورلىعىنسىز قالعان بالالاردى پاتەرمەن قامتاماسىز ەتۋدىڭ 2017-2019 جىلدارعا ارنالعان كەشەندى جوسپارى دايىندالدى. بۇل بويىنشا, 2017-2019 جىلدارى 213 پاتەر ءبولۋ جوسپارلانۋدا, ولاردىڭ ىشىندە 79 پاتەر 2017 جىلى, 2018 جىلى 64 پاتەر, 2019 جىلى 70 پاتەر بولىنەدى. ايتا كەتۋ كەرەك, جەتىم بالالار جانە اتا-انا قامقورلىعىنسىز قالعان بالالار ساناتىندا مەملەكەتتىك تۇرعىن ءۇي قورىنا كەزەككە تۇرعان ازاماتتاردىڭ سانى 6730 ادام. بۇدان بولەك, كەشەندىك جوسپاردا بولىنگەن تۇرعىن ءۇيدى ساقتاۋ, جالدامالى پاتەرمەن قامتاماسىز ەتۋ جانە تۇرعىن ءۇي ءبولۋدىڭ مونيتورينگىن جۇرگىزۋ قاراستىرىلعان.