قازاقستانداعى جايىلىمداردا 3,5 مىڭ قۇدىق قازىلادى

قازاقستانداعى جايىلىمداردا 3,5 مىڭ قۇدىق سالۋ جوسپارلانۋدا. بۇل تۋرالى بۇگىن ەلباسى نۇرسۇلتان نازارباەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا قر پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ ايتتى. «وتكەن جىلدىڭ جايىلىمداردى سۋلاندىرۋ بويىنشا جوسپارى ورىندالدى, ياعني 600 قۇدىق سالىندى. اعىمداعى جىلى تاعى 700 قۇدىقتىڭ قۇرىلىسى پايدالانۋعا بەرىلمەك. جالپى باعدارلاما اياسىندا 3,5 مىڭ قۇدىقتى سالۋ جوسپارلانۋدا, بۇل ءوز كەزەگىندە سۋلاندىرىلعان جايىلىمداردىڭ كولەمىن 18 ملن گەكتارعا جەتكىزۋگە مۇمكىندىك بەرەدى», - دەدى مىرزاحمەتوۆ. ءوز كەزەگىندە مەملەكەت باسشىسى نۇرسۇلتان نازارباەۆ جايىلىمدار سۋمەن قامتاماسىز ەتىلسە, ورگانيكالىق ءونىمنىڭ كولەمىن ايتارلىقتاي ارتتىرۋعا بولاتىنىن اتاپ ءوتتى. «قازاقستان دالاسى مال شارۋاشىلىعىنا بەيىمدەلگەن. كەزىندە كەڭەستىك كەزەڭدە بولعان مىڭداعان قۇدىقتار جابىلىپ قالدى. ءبىر قۇدىقتىڭ توڭىرەگىندە 2-3 مىڭ قوي جيناۋعا بولادى. تەك وسى ماسەلە عانا كەدەرگى بولىپ وتىرعان. بارلىق جەردى وسى ماقساتتا پايدالانۋعا بولادى. 150 ملن گەكتار جايىلىمدىق جەرلەرىمىز بار. اكىمدەرمەن بىرگە ءاربىر قۇدىقتى قاراپ, سونىڭ ماڭايىندا بىرنەشە وتار قوي ۇستاساڭدار, ەلىمىزدى ۇلكەن تابىس بولادى», - دەدى پرەزيدەنت مينيسترگە.