ءار جولداۋدىڭ ءوز جاڭالىعى بار

پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى كەزەكتى جولداۋىنىڭ باسىم باعىتتارىن ءتۇسىندىرۋ جانە ناسيحاتتاۋ ماقساتىندا پارلامەنت ءماجىلىسىنىڭ دەپۋتاتتارى گۇلميرا يسىمباەۆا مەن ءابدىماناپ بەكتۇرعانوۆ جانە «نۇر وتان» پارتياسى الماتى قالالىق فيليالى توراعاسىنىڭ ءبىرىنشى ورىنباسارى جۇلدىز وماربەكوۆا اباي اتىنداعى ۇلتتىق پەداگوگيكالىق ۋنيۆەرسيتەتتىڭ وقىتۋشىلىق-پروفەسسورلار قۇرامىمەن, ستۋدەنتتەرمەن كەزدەستى.  ەڭبەك جولى مەن قىزمەت لاۋازىمى ءبىلىم سالاسىمەن بىرگە ورىلگەن دەپۋتاتتاردىڭ قاراشاڭىراق وقۋ ورداسىنا ات باسىن بۇرۋ ماقساتى – ەگەمەن ەلدىڭ تۇراقتى دامۋىن قامتيتىن, مەملەكەتتىڭ بارلىق سالاسىنا سەرپىن بەرەتىن, پوستيندۋستريالىق قوعامدى قالىپتاستىراتىن ونەركاسىپتىك-يننوۆاتسيالىق دامۋ باعدارلاماسىنىڭ سايا­سا­تىن ۇسىناتىن, جاڭا تەح­نولوگيالىق-يننوۆا­تسيا­لىق دا­مۋدى قولدايتىن تاريحي قۇجات جايلى تولىق ءارى تەرەڭ تۇسىنىكتەمە بەرىپ, مازمۇنى مەن ماڭىزىن ۇجىممەن بىرگە تالقىلاۋ. ەلباسىنىڭ ستراتەگيالىق جوسپارلارىنىڭ العا با­سۋى­نىڭ ناتيجەسىندە ەكى قادام­دى ارتقا تاستاپ, ءۇشىنشى جاڭ­عىرۋعا قادام باستى. مەم­لەكەت باسشىسى ءمان بەرىپ وتىرعان باسىمدىقتار مەن با­عىت­تاردىڭ ارقايسىسى حالىق ءۇشىن ماڭىزدى. ءا.بەكتۇرعانوۆ نەگىزگى بەس باسىم­دىقتىڭ ارقايسىنا جەكە توق­تالا تۇرىپ, جولداۋداعى ءبىلىم, ءتىل, تەح­نولوگيالىق دامۋ ماسەلە­لەرىنە قاتىستى وي-پىكىرىن تاراتا ايتتى. عىلىم مەن تەحنيكانىڭ دامىعان زامانىندا ەلىمىزدە ونەركاسىپتىڭ رەۆوليۋتسيالىق ەلەمەنتتەرىن ەنگىزۋ قاجەت. وسىعان وراي جاڭا يننوۆاتسيالىق ستارتاپتاردى مەڭگەرۋ, عىلىمي-تەحنيكالىق الەۋەتتى دامىتۋ, تەحنولوگيانىڭ سوڭعى جاڭالىقتارىنان حاباردار بولىپ, وعان قول ارتۋ – قازاقستان جاستارى ءۇشىن ارمان ەمەس, كۇندەلىكتى ومىردە ۇيرەنۋگە, تالپىنۋعا ءتيىس قاجەتتىلىگى بولۋى كەرەك. دەپۋتاتتار بالانى  التى جاسىنان مەكتەپكە بەرۋ, ون ەكى جىلدىق ءبىلىم جۇيەسى, ۇشتىلدىلىك ماسەلەسىنە وراي قويىلعان ساۋالدارعا ناقتى جاۋاپ بەرىپ, ءتۇيىنى ءالى تولىق تابىلماعان تۇيتكىلدى جايتتارمەن ءسات سايىن بەتپە-بەت كەلىپ, تىعىرىققا تىرەلىپ جۇرگەن ۇستازداردىڭ ۇسى­نىسىن تىڭدادى. «ەلباسى 1997 جىلى جاساعان العاشقى جولداۋىنان كەيىن قازاقستان حالقىنا ارناپ 21 رەت جولداۋ جاسادى. ءار جولداۋدىڭ ءمانى دە, ورنى دا بولەك, ەشقاشان ءبىرى ەكىنشىسىن قايتالاعان ەمەس, ءار جولداۋدىڭ ءوز جاڭالىعى بار. جولداۋدا ءبىلىم, ونىڭ ىشىندە جاستارعا كاسىپتىك-تەحنيكالىق ءبىلىم بەرۋ, وسى سالادا ماماندار دايار­لاۋ, اۋىل مەن قالا مەكتەپ­تەرىن تەڭەستىرۋ, جاڭا مەك­تەپتەر سالۋ – وتە ماڭىزدى جۇمىس. بۇعان ءبىلىم سالاسى­نىڭ قىزمەتكەرلەرىن وتە جاۋاپ­كەرشىلىكپەن قاراۋعا شاقى­رامىن. جولداۋدىڭ تۇپكى ءمانى حالىق قامى بولعان­دىقتان, ءبىلىم بەرۋ, دەنساۋ­لىق ساقتاۋ, اۋىل شارۋا­شىلىعى سالاسى بويىنشا اي­تىلعان باعىتتار مەن ىلگەرى­رەكتە قابىلدانعان ىلكىمدى باع­دارلامالار بويىنشا ىستە­لەتىن جۇمىس ءبىر ساتكە توق­تاماۋى كەرەك», – دەدى گۇلميرا يسىمباەۆا. دەپۋتاتتار بيلىك قۇرى­لى­مىنداعى وكىلەتتىك ءبولۋ ماسەلەسىنە وراي تۋىن­داعان كونستيتۋتسيالىق وزگە­رىسكە بايلانىستى دا دايەك­تى تۇسىنىكتەمە جاسادى. جا­ھاندانۋ ۇردىسىنەن قالىسپاي, زاماناۋي يگىلىكتەردى ءوز بويىنا بىرىكتىرىپ, قوعاممەن ۇشتاستىرا الاتىن جاستاردى جاڭا تۇرپاتتى كەزەڭگە ساي ءبىلىم بەرىپ, تاربيەلەۋ ۇستازدار الدىنداعى ۇلى جاۋاپكەرشىلىك ەكەنىن ەسكە سالىپ, جولداۋدان تۋىندايتىن مىندەتتەردى جۇزەگە اسىرۋعا بار كۇش-جىگەردى جۇمىلدىرىپ, بىرگە اتقارۋعا شاقىردى. ايگۇل احانبايقىزى, «ەگەمەن قازاقستان» الماتى