اپاتتى مەكتەپتەر الاڭداتادى

قازىرگى تاڭدا اپاتتى مەك­تەپتەردىڭ جايى بارشانى الاڭداتاتىنى بەلگىلى. ەلىمىز جاڭارتىلعان ءبىلىم بەرۋ ماز­مۇنىنا كوشىپ وتىرعان كەزەڭدە ءبىلىم بەرۋ جۇيەسىندەگى تۇيتكىلدى ماسەلەلەردىڭ ءتۇيىنىن تارقاتۋ ماڭىزدى ءىس. بالانى بولاشاعىم دەپ ۇققان ءاربىر اتا-انا ونىڭ زامان تالابىنا ساي ءبىلىم العانىن ءارى ءبىلىم وشاعىنىڭ قاۋىپسىز بولعانىن قالايدى. ەلىمىزدە اپاتتى مەكتەپتەردى جويۋ جانە اپاتتى مەكتەپتەردىڭ سالدارىنان تۋىندايتىن ماسەلەلەردى بولدىرماۋ ماقساتىندا بىرقاتار جۇمىستاردىڭ جۇرگىزىلىپ جات­قانى بەلگىلى. ال جامبىل ءوڭىرىن­دەگى اپاتتى ءبىلىم وشاق­تارىنىڭ احۋالى بۇگىندە قانداي دەڭگەيدە؟ قۇرىلىسى قايتا ءجۇرىپ جاتقان مەكتەپتەر سانى قانشا؟ اعىمداعى جىلدىڭ العاشقى ماجىلىسىندە ءوڭىر باسشىسى كارىم كوكىرەكباەۆ «2017 جىلى اپاتتى دەگەن سوزدەن ارىلۋىمىز كەرەك», دەگەن بولاتىن. وبلىستىق ءبىلىم باسقارماسىنىڭ مالىمەتىنشە, بۇگىندە اپاتتى جاعدايدا 9 مەكتەپ بار. باسقارما باسشىسى سۇلۋشاش قۇرمانبەكوۆا ونداي مەكتەپتەردى جويۋ جونىندە ءتيىستى جۇمىستاردىڭ جۇرگىزىلىپ جاتقانىن ايتادى. وتكەن جى­لى ەلىمىزدىڭ ۇلتتىق قورى ەسە­بىنەن تاراز قالاسىنداعى «سال­تانات» شاعىن اۋدانىنداعى 1000 ورىندىق ورتا مەكتەپتىڭ, جەرگىلىكتى بيۋدجەت ەسەبىنەن سارىسۋ اۋدانى دوسبول اۋى­لىن­داعى 50 ورىندىق ورتا مەكتەپ پەن تالاس اۋدانى قاراوي اۋىلىنداعى 50 ورىندىق ورتا مەكتەپ قۇرىلىسى باستالدى. بۇل نىساندار بيىل اياقتالادى دەپ كۇتىلۋدە. جەرگىلىكتى بيۋدجەت ەسەبىنەن 2017 جىلعا 4 مەكتەپتىڭ قۇرى­لىسىنا 802,429 ميلليون تەڭگە ءبولىندى. ونىڭ ىشىندە مەركى اۋدانى ارال-قىستاق اۋىلىنداعى 50 ورىندىق باستاۋىش مەكتەپ, قورداي اۋدانى سوعاندى مەن كوكتوبە اۋىلدارىنداعى ارقايسىسى 50 ورىندىق نەگىزگى مەكتەپتەر جانە تالاس اۋدانى قاسقابۇلاق اۋىلىنداعى 120 ورىندىق ورتا مەكتەپ بار. قالعان 2 مەكتەپتىڭ ماسەلەسى 2018-2019 جىلدارى كەزەڭ-كەزە­ڭىمەن شەشىلەدى دەپ جوسپارلانۋدا. ال بۇگىندە وبلىستا ءۇش اۋىسىمدا 5 مەكتەپ جۇمىس ىستەيدى. سونداي-اق, وتكەن جىلى ۇلتتىق قور ەسەبىنەن باستالعان مەركى اۋدانى سارىمولداەۆ اۋى­لىنداعى 600 ورىندىق ورتا مەك­تەپتىڭ قۇرىلىسى بيىل اياق­تالادى. ال تاراز قالاسىنداعى №24 ورتا مەكتەپتىڭ 300 ورىندىق قوسىمشا عيماراتىنىڭ, ءشول­دالا ماسسيۆىندەگى 900 ورىندىق ورتا مەكتەپتىڭ جانە بايزاق اۋدانى بايزاق اۋىلىنداعى 300 ورىندىق ورتا مەكتەپتىڭ قۇرىلىسىنا ۇلتتىق قور ەسە­بىنەن بيىل 1 ميلليارد 887 ميل­ليون 308 مىڭ تەڭگە ءبولىندى. قالعان 1 مەكتەپتىڭ ماسەلەسى 2018 جىلى جەرگىلىكتى بيۋدجەت ەسە­بى­نەن شەشىلەدى دەپ جوسپارلانۋدا. مەكتەپ – ءبىلىم مەن تاربيەنىڭ قاينار كوزى. سوندىقتان ءبىلىم وشاعىنىڭ تالاپقا ساي بولۋى تالانتتى شاكىرتتەردى كوپتەپ تاربيەلەۋگە مۇمكىندىك بەرەدى. بۇل تۇرعىدا جامبىل وبلىسى دا اپاتتى جاعدايداعى مەكتەپتەرگە ەرەكشە كوڭىل ءبولىپ وتىر. حاميت ەسامان, «ەگەمەن قازاقستان» تاراز