الاش تۇلعاسى تۇتىنعان بۇيىمدار

سۋرەتتەگى بۇيىمدار مەملەكەت قايرات­كەرى, «الاش» پارتياسى مەن «الاشوردا» قوزعالىسى جەتەكشىلەرىنىڭ ءبىرى, قازاقتىڭ تۇڭعىش ماتەماتيگى, پروفەسسور, عۇلاما عالىم, قازاق تىلىندەگى تۇڭعىش «جوعارعى ماتەماتيكا كۋرسى» وقۋلىعىنىڭ يەسى ءالىمحان ەرمەكوۆكە تيەسىلى. كوزىلدىرىك, كۆارتستى قول ساعات جانە ورگانيكالىق اينەكتەن ۇلكەيتكىش اينەگىمەن قوسا جاسالعان سىزعىش عۇلامانىڭ كوزىندەي بولىپ ۇلتتىق مۋزەيدىڭ تاريح زالىندا تۇر. ونى قاراعاندى قالاسىنىڭ تۇرعىنى ق.وسكەنباەۆ 2007 جىلى سايا­سي قۋعىن-سۇرگىن جانە توتاليتاريزم قۇرباندارىنىڭ «الجير» مۋزەي-مەموريالدى كەشەنىنە تاپسىرعان. ال ۇلتتىق مۋزەيدىڭ قورىنا 2014 جىلى ءتۇسىپتى. «1917 جىلى الاش اۆتونومياسى قۇرىل­عاندا ءالىمحان ەرمەكوۆ 26 جاستا بولعان. سول جاستا ۇكىمەتتىڭ پرەمەر-ءمينيسترىنىڭ ورىنباسارى ءارى ەل شارۋاشىلىعىن جوس­پارلاۋ كوميتەتىنىڭ توراعاسى بولىپ تاعايىندالعان. 1935 جىلى مال ءدارى­گەرلىك ينستيتۋتتا كافەدرا باسقارىپ ءجۇرىپ, ينستيتۋتتىڭ عىلىمي كەڭەسىنىڭ ۇيعا­رىمىمەن تۇڭعىش رەت ماتەماتيكا سالاسى­نان پروفەسسور اتاعىن الادى. كەڭەس وكىمەتىنە, كوممۋنيستىك-رەپرەسسيالىق جۇيەگە قارسى قىزمەتى, «الاش» پارتياسىن قۇرىسىپ, الاشوردا ۇكىمەتىنە مۇشە بولعانى ءۇشىن 1930 جىلدىڭ 22 قىركۇيەگىندە ءىستى بولىپ, م.اۋەزوۆپەن بىرگە تۇرمەدە وتىرىپ, ۇزدىكسىز تەرگەۋدە بولعان», – دەيدى ۇلتتىق مۋزەيدىڭ عىلىمي قىزمەتكەرى لاۋرا تۇمەنوۆا. جالپى, 37-ءنىڭ قارا بۇلتى ءا.ەرمە­كوۆتىڭ دە باسىنا ءۇيىرىلىپ, سوندا ۇستال­عاننان ارا-اراسىندا بوستاندىققا شىعىپ تۇرعانىمەن, ۇلكەن تۇلعا 1955 جىلى عانا تۇرمەمەن قوشتاسادى. 1957 جىلى 26 قاراشادا تولىق اقتالادى. ودان كەيىنگى جىلدارى قاراعاندى تاۋ-كەن ينستيتۋتىندا ماتەماتيكادان ءدارىس وقيدى. 1970 جىلى قايتىس بولعان. ايگۇل سەيىلوۆا, «ەگەمەن قازاقستان»