شىمكەنتتە وتاندىق تاۋار وندىرۋشىلەردىڭ كورمەسى ءوتتى

بۇگىن شىمكەنتتە ءوتىپ جاتقان «قازاقستان-تۇركيا ينۆەستيتسيالىق فورۋمىنىڭ» ەكىنشى كۇنى اياسىندا 50-دەن استام وتاندىق تاۋار وندىرۋشىلەردىڭ كورمەسى ءوتتى, دەپ حابارلادى وقو اكىمىنىڭ ءباسپاسوز قىزمەتى. شاراعا وبلىس اكىمى جانسەيىت تۇيمەباەۆ, سالاعا جاۋاپتى جەتەكشىلەر مەن تۇرىك دەلەگاتسياسىنىڭ قۇرامىنداعى 200-گە جۋىق كاسىپكەرلەر جانە وتاندىق بيزنەسمەندەر, سونىمەن بىرگە, وڭىرىمىزگە ارنايى ىسساپارمەن كەلگەن قر پارلامەنتى ءماجىلىسىنىڭ دەپۋتاتتارى باقتىقوجا ىزمۇحامبەتوۆ, ەرسۇلتان بەكتۇرعانوۆ, فاحريددين قاراتاەۆ, كارىباي مۇسىرمان, قۇدايبەرگەن ەرجان, مۇحتار ەرمان جانە جانات جاراسوۆتار قاتىستى. «بۇگىن سىزدەرگە قوسىمشا وڭىرىمىزدەگى ەڭ تارتىمدى ينۆەستيتسيالىق جوبالارمەن قاتار, مەملەكەتتىك-جەكەمەنشىك سەرىكتەستىك جوبالارىن دا كورسەتەتىن بولامىز. سونىمەن بىرگە, وبلىستا ينۆەستورلارعا كورسەتىلەتىن قىزمەتپەن دە تانىساسىزدار. ماڭىزدى شاراعا كاسىپكەرلەرگە بارلىق كەزدە دە قولداۋ بىلدىرەتىن قارجىلىق دامۋ ينستيتۋتتارى دا ارنايى قاتىسۋدا. بۇل ينفراقۇرىلىمدىق, قارجىلىق جانە سەرۆيستىك قولداۋلار مەملەكەت تاراپىنان كورسەتىلەتىنىن ايتا كەتكەن ءجون. سىزدەرگە وزدەرىڭىزدىڭ جوبالارىڭىزعا قاتىستى سۇراقتارىڭىزدى قويۋلارىڭىزعا تولىق مۇمكىندىك بار», - دەدى ايماق باسشىسى. پوتەنتسيالدى تۇرىك كاسىپكەرلەرىنە ءوڭىردىڭ ينۆەستيتسيالىق احۋالى مەن ونەركاسىپ كاسىپورىندارىنىڭ ونىمدەرىن تانىستىرۋدى, سول ارقىلى ءوزارا ءتيىمدى سەرىكتەستىكتى ورناتىپ, نىعايتۋعا مۇمكىندىك جاساۋدى ماقسات تۇتقان كورمەدە وتاندىق كومپانيالاردىڭ تاماق ونەركاسىبى, فارماتسەۆتيكا, مەديتسينالىق جابدىقتار ءوندىرىسى, قۇرىلىس ماتەريالدارىن ءوندىرۋ (رەزينا مەن پلاستيكالىق ونىمدەرى, كەراميكا جانە ت.ب.), ماشينا جاساۋ, جيھاز, جەڭىل ونەركاسىپ (كىلەم, ارنايى كيىم, بالالار مەكتەپتىك فورما, ۇيگە ارنالعان توقىما بۇيىمدارى, ەرلەرگە, ايەلدەرگە جانە بالالارعا ارنالعان كيىمدەر, ش ۇلىق بۇيىمدار مەن اياق-كيىم) سالالارىنداعى ونىمدەر ۇسىنىلدى. ايتا كەتۋ كەرەك, مۇندا قويىلعان ونىمدەردىڭ باسىم بولىگى قازاقستاننىڭ يندۋستريالاندىرۋ باعدارلاماسى شەڭبەرىندە ىسكە قوسىلعان كاسىپورىندارىندا وندىرىلەدى. ال ۇسىنىلعان 20-دان استام ينۆەستيتسيالىق جوبالار لوگيستيكا جانە كولىك, ونەركاسىپ جانە اۋىل شارۋاشىلىعى, ەنەرگەتيكا, مادەنيەت جانە تۋريزم سالالارىنا قاتىستى بولدى.