1-2 اقپان كۇندەرى قىزىلوردا وبلىسىنا يران يسلام رەسپۋبليكاسى (ير) مازانداران پروۆينتسياسى گۋبەرناتورىنىڭ ورىنباسارى يۋنەسي روستامي اليرەزا اليدجان جانە قر يران يسلام رەسپۋبليكاسىنداعى توتەنشە جانە وكىلەتتى ەلشىسى باعداد امىرەەۆ باستاعان دەلەگاتسيا ەكى كۇندىك جۇمىس ساپارىمەن بولدى. ساپار ماقساتى – ەكونوميكا جانە ينۆەستيتسيا سالالارىنداعى ىنتىماقتاستىق, سونداي-اق, بىرلەسكەن بيزنەس جوسپارلارعا قاتىسۋ.
1 اقپان كۇنى دەلەگاتسيا مۇشەلەرى شىنى زاۋىتىنىڭ قۇرىلىس الاڭىن كوردى, «ابزال جانە ك», «سمارت راببەر», «جان-اراي جەم» كاسىپورىندارىنىڭ جۇمىسىمەن تانىستى. قىزىلوردا وبلىسىنىڭ اكىمى قىرىمبەك كوشەرباەۆ دەلەگاتتارمەن كەزدەسىپ, ءوڭىردىڭ ينۆەستيتسيالىق الەۋەتى مەن ىنتىماقتاستىقتىڭ پەرسپەكتيۆتى باعىتتارى تۋرالى ايتىپ بەردى. ماسەلەن, ينۆەستورلاردى قۇس ءوسىرۋ, مال جانە ەگىن شارۋاشىلىعى, جىلىجايلار سالۋ, وندەۋ ونەركاسىبى جانە ت.ب. جوبالار مەن قىزىلوردا وبلىسىنا يران بالىعىن, تسيترۋستىق, باسقا دا جەمىس-جيدەك تۇرلەرىن ەكسپورتتاۋ قىزىقتىرۋى مۇمكىن.
سونداي-اق, وسى كۇنى وبلىس اكىمدىگىنىڭ سيتۋاتسيالىق ورتالىعىندا يران دەلەگاتسياسى مەن قىزىلوردالىق كاسىپكەرلەردىڭ قاتىسۋىمەن جيىن ءوتتى. 2 اقپان كۇنى قوناقتار قىزىلوردا وبلىسىنىڭ وڭىرلىك كاسىپكەرلەر پالاتاسىنىڭ جۇمىسىمەن تانىسىپ, بيزنەس قوعامداستىقپەن ۆ2ۆ فورماتىندا كەزدەسۋ وتكىزدى. جاڭاقورعان جانە شيەلى اۋداندارىندا بولىپ, اۋدان اكىمدەرىنىڭ جيىندارىنا قاتىستى.
