استانادا گەرونتولوگيا قىزمەتى بويىنشا check-up ورتالىق اشىلادى

استانادا گەرونتولوگيا قىزمەتى بويىنشا check-up ورتالىق اشىلادى. بۇل تۋرالى اكىمدىكتىڭ وتىرىسىندا بەلگىلى بولدى. «بىزدە گەرونتولوگيا قىزمەتى جوق. ۇستىمىزدەگى جىلدىڭ 9 مامىرىنا قاراي ءبىز وسى باتىل جوبانى تولىق دايىنداپ شىعارامىز. 4-ءشى قالالىق ەمحانانىڭ بازاسىندا ءبىز سوعىس ارداگەرلەرىنە جانە ولارعا تەڭەستىرىلگەن تۇلعالارعا, قارتتارعا جانە كوپ بالالى انالارعا ارنالعان زاماناۋي check-up ورتالىق اشۋدى جوسپارلاپ وتىرمىز. اتالعان ورتالىق تولىقتاي زاماناۋي مەديتسينالىق قۇرال-جابدىقتارمەن جاراقتالاتىن بولادى. بارلىعى ءبىر جەردە ورنالاسىپ, قارت ادامداردىڭ يگىلىگىنە جۇمىس ىستەيدى», - دەدى استانا قالاسىنىڭ دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆ. اكىم اسەت يسەكەشەۆ اتاپ كورسەتكەندەي, باعدارلامادا حالىق دەنساۋلىعىن باسقارۋدىڭ سەكتورارالىق جۇيەسىنە كوشۋ قاراستىرىلعان. «مەملەكەت باسشىسى دەنساۋلىق كوپ جاعدايلارعا بايلانىستى دەپ بىرنەشە رەت ايتقان بولاتىن: ءبىرىنشى – سالاۋاتتى ءومىر سالتى, بۇقارالىق سپورتتى دامىتۋ. ەكىنشى – ساپالى تاماقتانۋ. ءۇشىنشى – ساپالى اۋىز سۋ. ءتورتىنشى – ەكولوگيا. بەسىنشى – دەنساۋلىق ساقتاۋ سالاسىنداعى قىزمەتتەردىڭ ساپاسى. وسى 5 باعىتتىڭ ارقايسىسى بويىنشا ناقتى ءىس-قيمىل جوسپارىن ازىرلەۋ قاجەت. بىراق ولار ءوزارا بايلانىستى بولۋى ءتيىس», - دەدى قالا باسشىسى. استانا قالاسىنىڭ دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆتىڭ اقپاراتىنا سايكەس, قازىرگى ۋاقىتتا تۇرعىنداردىڭ دەنساۋلىعىن جاقسارتۋ بويىنشا جۇمىس جۇرگىزىلۋدە. ايماقتىڭ الەۋمەتتىك ساۋلىعىنىڭ باستى كورسەتكىشتەرىنىڭ ءبىرى ازاماتتاردىڭ ءومىر ءسۇرۋ ۇزاقتىعىنىڭ بولجامى بولىپ تابىلادى. استانادا اتالعان كورسەتكىش سوڭعى ءۇش جىلدا 74,3 -تەن 75,4 جاسقا دەيىن ۇزاردى جانە ەل بويىنشا ەڭ جوعارعى كورسەتكىش بولىپ تابىلادى. ءۇش جىلدا بالا ءولىمى جاڭا تۋعان 1000 سابيگە شاققاندا 7,5-تەن 6,4-كە دەيىن تومەندەدى, ال انا ءولىمى 100 مىڭعا 16,3-تەن 7,3-كە دەيىن تومەندەگەن جانە بۇل قارقىن ۇستىمىزدەگى جىلى دا ساقتالىپ وتىر. سونداي-اق, بۇگىنگى كۇنى استانادا تۇراتىن حالىقتىڭ 24% بەلسەندى تۇردە سپورتپەن شۇعىلداناتىنى ايتىلدى. دۇنيەجۇزىلىك دەنساۋلىق ساقتاۋ ۇيىمى ماماندارىنىڭ پىكىرىنشە, بۇل كورسەتكىش 30%-عا جەتىپ, ودان اسقان كەزدە حالىقتىڭ قان اينالىمى جۇيەسىنىڭ اۋرۋلارىنان جانە ونكولوگيالىق اۋرۋلاردان ءولىم دەڭگەيى ەداۋىر تومەندەيدى. قادامدىق قولجەتىمدىلىك جوباسى شەڭبەرىندە بىرىڭعاي ەلەكتروندىق مەديتسينالىق كارتا قۇرىلدى. جوبا Astana Innovations اق-ىمەن بىرلەسىپ ازىرلەندى. قازىر بارلىق جۇمىستار اياقتالدى. 1 اقپاننان باستاپ ونى بارلىق مەديتسينالىق مەكەمەلەر بويىنشا ەنگىزۋ جوسپارلانعان. اتالعان جۇيە دارىگەرلەردى قاعاز قۇجات اينالىمىنان بوساتۋعا مۇمكىندىك بەرەدى, ال اۋرۋحانالار مەن ەمحانالاردا تىركەۋ ورىندارىنان كارتانى جانە مۇراعاتتان اۋرۋ تاريحىن ىزدەمەستەن, بىرىڭعاي اۋرۋ تاريحى تولتىرىلاتىن بولادى.